فيس بوكهم غير فيس بوكنا ...

Rena Jesus · رقم المشاركة : ( 1 ) 13 - 02 - 2017, 04:18 PM

الفيسبوك عند الرجالة غيرنا خالص ..
عالم تاني ..

- الراجل بيحط بروفايل بيكتشر واحدة و ممكن يفكر يغيرها بعد 10 سنين لما يحط صورة فرحه و بيشيلها بعد اسبوع و يرجع لنفس الصورة اللي كان حاططها تاني ..
مع انها ممكن تكون صورته في اولي جامعة و هو مدي ضهره للبحر و مش باين منه حاجة بس بيحبها ..
مش كل شوية تزني غير صورتك .. غير صورتك .. مش بيحاااااااااب يغيرهاااااااا ..
و لو حاطط صورة ابو تريكة خلي تعليقاتك لنفسك .. ده مبدأ حياة ..
معندهمش مبدأ حط الصورة .. شيل الصورة .. حط الصورة .. شيلها ..

- كل اللي بيشيره فيديوهات لاجمل اهداف ميسي او اجوان محمد_صلاح
او تصريح لنادي بيشتري لعيب او بيبيع لعيب ..
او فيديو ل free styler بينطط الكور بشكل مبهر .

- مفيش check in .. معندوش الجو ده ..
ممكن يكون في باريس و تلاقيه معموله tag انه كان مع ناس هناك ..
مش في بالهم الهري ده .

- مش بيحبوا الستاتس زينا .. بيكتبوا ستاتس لو في حدث عظيم حصل ..
زي مثلا الحمد لله ربنا رزقنا ب ..
نقطة و من اول السطر.. الخبر خلص ..
بس كده مفيش لت و عجن خالص .. ما قل و دل .

- متحطيش راجل في الـ favourite ,
هتجيلك نوتيفيكيشن كل 3سنين انه شير حاجة .

- سياسة تلقيح الكلام دي غالباً مش بيفهموها غير لما بيشوفوا وول مراته او اخته ..
و بيفطس من الضحك .

- لو عربيته اتدشدشت بيحط صورتها و يقول قدر الله و ما شاء فعل ..
مش منه لله رامي ركب معايا من غير ما يسمى .. و يقطع مع رامي .

- لو عجبته حاجة اووووي يعني .. و دي كل فين و فين بيعمل لايك ..
لو جوزك عملك لايك يبقي بجد عجبته .. ملهومش في الكومنتات بتاعتنا..
و لو عمل شير يبقي اتكتبتلك طلعة .

- اعلي نشاط لأي راجل في البوستات و الشير وقت ماتشات الاهلي و الزمالك او قرب نهاية الدوري او اثناء ماتشات الكلاسيكو .. تلاقي البوستات بترف .

- مفيش جو feeling sad و disappointed ..
الكلام ده ملوش مكان في الوجود .. و مش بيهتم بأي حد كاتبه ..
و لا كأنه قراه اصلاً .. هو ناقص هم!!

- مفيش راجل عنده خلق يقرا كل حاجة المدام بتشيرهاله او بتعمله فيها tag ..
طبيعتهم كده ..
لو البوست كورة هيقرا لكن بوست بتلقحي كلام فيه عليه هيقراه ليه؟
ده حتي لو قراه هيعمل عبيط .

- خناقاته مع اصحابه ممكن تكون علي فاول علي ضربة جزاء علي top score في لعبة ذهنية رهيبة ..
ممكن الفاول ده ما ينيموش لحد ما يقنع صاحبه بيه .

- الرجالة بتعصب بعض بانهم يصوروا نتيجة ماتش فيفا و ينزلوها علي الفيس بوك و الموضوع بيقلب هزار و ضحك ..
مش بيقوموا يجيبوا بعض من شعرهم زي ناس .. احمممم احممممم

- عادي يعمل check in في قهوة مع اصحابه و ما يعملش في cilantro ..
قعدة القهوة عنده احلي .

- لو عملتي تاج لراجل في صورة فانوس او حتى شجرة الكريسماس
بيشيل التاج في لحظتها و ممكن جداااا جدااااا يعملك بلوك في نفس اللحظة برضه .

- مفيش جو الكافر فوتو خمسة و خميسة و العين صابتني يا ولاد الجزمة ..
مفيش الكلام ده نهائي .

- عادي تلاقي الوول عنده فيها جمل كده..
* ايه الكلام؟
*ها يا برنس؟
* عاش يا معلم..
كل الجمل كلمتين ..
و المعلومة بتوصل و بيترد عليها بكلمتين بالكتير برضه .

- هقولها تاني لا بيحبوا المنشن و لا ال tag .

- لو فاكرة ان في عيد ميلادك جوزك هيبعتلك صورة تورتة تبقي عبيطة ..
اظن انتي عرفتي غلطتك .

- كفاية ان التايم لاين عندهم خالي من baby و قمراية و كيوتة و طيوبة و زفتونة ..
دي لوحدها كفاية .

- فيس بوكهم خالي من السيلفي و ما ادراك السيلفي بيرفع الضغط ازاي ..
مفيش بوز البطة و رجل البجعة .. و العسل ده .

الفيس_بوك عند الرجالة الحق يتقال مريح للأعصاب ..
مفيش خناقات و لا شد شعر و لا تلقيح كلام ..
الخناقات دي بتشوفيها في النيوز فيد مش شرط خالص تكوني طرف فيها .

فيس_بوكهم_غير_فيس_بوكنا_صدقوني