نُط بره دماغك.......

[Rena Jesus]

نُط بره دماغك على ٣ مراحل..
Ready.. Steady.. GO

ساعات القعدة جوه الدماغ بتقلب غم أو بتقلب رعب ..
اصل الدماغ لما بتعلن السيطرة بتدخلك في دوامات حلزونية "spiral down"
و بتفضل تلففك و تشألطك، فتبقى لا منك اتحركت و عملت حاجة و لا منك مرتاح عشان مش بتعمل حاجة ..
و لا حتى بتبقى فاكر انت بدأت رحلة الشألطه دي امتى و ازاي..

المنطقة دي بتبقى منطقة خطر على الحياة نفسها ،
لأنها مش بس بتلففك جوه صناديق مقفّله من كل النواحي،
لأ كمان الدوامات دي بتفضل تضيق و تضلم و تحفر و تاخدك لتحت ..
كل ما تلف زيادة تنزل زيادة زي المسمار القلاووظ كده
و المشكلة بقى ان حتى مقاومة الحالة دي بيزود معدل النزول و بتصّعب على نفسك الطلوع تاني للنور ..

الحل ساعتها بيبقى موجود بره..
عمرك ما حتشوفه و انت جوه ..

فلو حسيت انك في دوامه من دوامات الدماغ دي اتبع التعليمات الآتيه:
١- غير مكانك،
التزم الصمت و الهدوء من بره و حاول توطي الاصوات اللي جوه..
ركز ٥ دقايق بالكامل مع تنفسك و أحاسيس جسمك بس..
بعدهم فكر، انت "عايز تحس بإيه" و اكتبه بورقة و قلم
(لو مش لاقي حاجة تكتبها ارسم اي حاجة بتحبها حتى لو شخبطة).

٢- صلى لربنا باللي انت عاوز تحسه و كتبته في الورقة
(الصلاه سلاحك.. اسمع نفسك وانت بتصلى وأشتغل كأنك متأكد من الإجابة).

٣- لو في خطوة مأجلها قوم زق نفسك و اعملها..
و لو مافيش دور على حد تساعده في حاجة هو محتاجها حتى لو حتشيل معاه حاجة من مكان لمكان او تقوله كلمة طيبة محتاج يسمعها
(مساعدة الناس بتضيف لحياتك حياة).

بس خلاص.. جرب و لو اتبسطت بيع الفكرة لأصحابك

[مسلمة و افتخر]

شكرا لكي على النصائح الثمينة

[Mary Naeem]

ربنا يبارك حياتك

[walaa farouk]

ميرسى على مشاركتك الجميلة رينا

[Rena Jesus]

ميرسى لمروركم الغالى

[MenA M.G]

موضوعك مميز .. طرح رائع
ربنا يبارك خدمتك

[Rena Jesus]

ميرسى لمرورك الغالى