تنويعات على اوتار سفر الرؤيا ....

[walaa farouk]

الاصحاح التانى
ربنا فوض يوحنا الحبيب فى حمل رسائل لسبع اساقفة كنائس ...ممكن تاخدها كده و تقول دى لكنيسة بذاتها و ممكن توسع الدايرة و تقول للكنيسة النهاردة و ممكن توسع اكتر و اكتر و تشيل اسم الاسقف و تحط اسمك .. ما هو انا و انت هياكل الله و روح الله ساكن فينا يعنى انا و انت ممكن نكون الموجه ليهم الرسالة دى ..
ربنا ده رقيق اوى .. يحب يشجعنى اوى .. عاوز يعاتبنى فيبدأ يقولى انا مبسوط منك فى كذا او عارف انك تعبان فى كذا بس انا صعبان عليا منك فى كذا و كذا و مش يسيبنى لا يدينى الحل و يساعدنى فيه ... اتمنى ان دى تبقى طريقة تربيتنا لولادنا ...علاقتنا بازواجنا و زوجاتنا .. بخدمتنا .. بمرؤسينا و رؤسائنا فى الشغل .. منهج حياتى يعنى ما هو اصل كلمة ربنا حيىة مش مجرد قصة و لا تاريخ ..
انت كويس.. انا بحبك.. صعبان عليا منك ...ممكن نرجع تانى ..
اول رسالة لاسقف افسس يقال عنه انه القديس تيموثاوس تلميذ الرسول بولس ..
1 اُكْتُبْ إِلَى مَلاَكِ كَنِيسَةِ أَفَسُسَ: «هذَا يَقُولُهُ الْمُمْسِكُ السَّبْعَةَ الْكَوَاكِبَ فِي يَمِينِهِ، الْمَاشِي فِي وَسَطِ السَّبْعِ الْمَنَايِرِ الذَّهَبِيَّةِ:
2 أَنَا عَارِفٌ أَعْمَالَكَ وَتَعَبَكَ وَصَبْرَكَ، وَأَنَّكَ لاَ تَقْدِرُ أَنْ تَحْتَمِلَ الأَشْرَارَ، وَقَدْ جَرَّبْتَ الْقَائِلِينَ إِنَّهُمْ رُسُلٌ وَلَيْسُوا رُسُلاً، فَوَجَدْتَهُمْ كَاذِبِينَ.
3 وَقَدِ احْتَمَلْتَ وَلَكَ صَبْرٌ، وَتَعِبْتَ مِنْ أَجْلِ اسْمِي وَلَمْ تَكِلَّ.
افسس معناها المحبوبة .. ربنا بيقول لنفسك و نفسى و للكنيسة بصى يا محبوبة بص يا محبوب .. اوع تفتكر انك علشان زيي ملخبط فى خطية مش محبوب .. انت محبوب جدا زى ما انت كده .. هو يعنى محبتك لابنك مربوطة بانه يبقى متسرح و لابس نضيف ما هو محبوب برضه و هو ملخبط و ايده مش نضيفة و بنطلونه متوسخ و شعره منكوش .
ربنا عارف اعمالنا و فاحصها و مصنفها حتى لو ما قدرهاش العالم او فهمها غلط ربنا عارف انت بتعمل ايه ليه .. الوحيد اللى ما بينساش تعبك حتى لو غلطت تفضل اعمالك الامينة و الحلوة عنده شايلها لك
بتتعب اه و بتخدم و طول اليوم فى الكنيسة و خدمات و صبر ومجهود .. بنحضر قداس و بنتناول و نعترف و ساعات بنصلى و ساعات بنقرأ فى الانجيل ..ما بنفوتش و لا صيام ..حتى الاربع و الجمعة معودة ولادى عليهم ... بتتعبى علشان ولادك و بيتك و جوزك من صباحية ربنا نحلة فى البيت ..حضرتك شغل و ارهاق و مصاريف و تعب و ياريت حد مقدر ..
كل ده رائع بس فيه حاجة كل ده المحبة ابتدت تقل منها فبقت كل حاجة بتتعمل بثقل و مش بانبساط ..
المشكلة ... تركت محبتك الاولى
4 لكِنْ عِنْدِي عَلَيْكَ: أَنَّكَ تَرَكْتَ مَحَبَّتَكَ الأُولَى...
الكنيسة الاولى ابتدت بحب خالص لربنا شوية ودخلت هرطقات و بدع زى ناس قالوا نرجع نتمسك بطقوس اليهود اسمها الردة إلى اليهودية ، و ناس قالوا شغل مخك .. الخلاص بالعقل مش عيب نشغل عقلنا اسمها الخلاص بالمعرفة العقلانية و دول اسمهم الغنوسيين و ناس اتطرفوا فى النسك و الزهد و اسمها النسك المنحرف وقمع الجسد ، و ناس قالت لك حلوة الملايكة نعبدها " عبادة الملائكة " ...فيه حاجة دحلت فى محبة الكنيسة الاولى... تركت محبتك الاولى
كلمة يقولها ربنا لينا .. بتصلى اه بس مش باشتياق زى زمان .. بتخدم اه بس مش بروح زمان .. كلمة تقولها زوجة لجوزها .. بتحبنى بس مش زى زمان .. يقولها جوزها ..ما بقتيش واخدة بالك منى زى زمان ...فين ضحكتك الحلوة .. فين شقاوتك .. تركت محبتك الاولى .. يقولهالك ابنك .. بطلت تلعب معايا ... بنتك ..ما بقتيش تتكلمى معايا و قاعدة طول اليوم يا ع التليفون يا الكاندى كراش و الواتساب .. يقولها الاصحاب .. ما بقناش قريبين و لا بنتمشى نحكى زى زمان يا اكل و خروجات و اعياد ميلاد يا فاكس .. فين لما كنا نقف نصلى ساعات قبل راس السنة .. تركت محبتك الاولى ..ما بقتش زى زمان
الحل ....
5 فَاذْكُرْ مِنْ أَيْنَ سَقَطْتَ وَتُبْ، وَاعْمَلِ الأَعْمَالَ الأُولَى
فيه نقطة نزل من عندها المنحنى لازم ندرسها .. وايه السبب فى فى بدء الأنحدار هذا ؟ وحين نكتشف أصل المرض يسهل العلاج ، فيه خطية معطلانى عن محبتى لربنا ...فيه عاطفة شغلانى و مشوشة احاسيسى .. فيه حاجة عملت حاجز بينى و بين جوزى .. فيه حاجة خلتنى ابعد عن البيت و ابقى بقضى وقتى بره ..فيه حاجة مخليانى معرفش اصلى و لا حابب اخدم ... فيه سبب خلانى ابعد عن صحبتى و فيه حاجة او شرخ بينى و بين صديقى...اجمل حاجة فى شمشون لما جه يهد المعبد قال للصبى ورينى العمودين الرئيسيين فيقولك احكم قبضته عليهم . دور ايه اللى معطلك و احكم عليه قبضتك .
الخطورة
وَإِّلاَّ فَإِنِّي آتِيكَ عَنْ قَرِيبٍ وَأُزَحْزِحُ مَنَارَتَكَ مِنْ مَكَانِهَا، إِنْ لَمْ تَتُبْ..
لو عرف الأنسان سر الأنحدار و ما اهتمش بإصلاح حاله والعودة إلى محبته الأولى وتكريسه الأول فإن الله ربنا بيقوله سيزحزح منارته من مكانها ..يارب ما تستغنى عننا ابدا ..
لو اصرينا على التمسك باللى معطلنا حنضيع ... مش انت الخادم بتاع زمان ...مش انتى اللى كنتى بتصلى و دموعك بتنزل قلبك تقسى .. ما بقتيش تعتذرى و مقضياها بجبروت .. بقيت انانى و بتفكر فى نفسك ... كازواج لو فضلنا فى العناد البيت حيضيع وولادنا مش حنلاقيهم لو فضلنا متمسكين كشباب اننا صح من غير حتى ما نقيم نفسنا حنضيع و نتزحزح لو ما توبناش حنتزحزح ... الحل توبة .. التوبة يعنى نرجع تانى ... ندور ازى نبدأ من جديد ..مجهود و تعب بس حنتسند .. قرر انت بس و ابدأ .. اعمل اعمالك الاولى .. ارجع خصص وقت لربنا .. ارجعى اقفى مع ولادك صلى ... ارجع دللها و هات لها وردة او هدية..ارجعى قولى له كلام حلو من بتاع زمان و انه فارس احلامك ..بلاش كلام محبط و طاقة سلبية ..
اول ما ربنا حس ان الكلام تقيل على ملاك افسس ..بروح الابوة رجع تانى يرفعه و يشجعه و يقوله على فكرة انا مبسوط منك اوى
6وَلكِنْ عِنْدَكَ هذَا: أَنَّكَ تُبْغِضُ أَعْمَالَ النُّقُولاَوِيِّينَ الَّتِي أُبْغِضُهَا أَنَا أَيْضًا علشان كان فيه شماس اسمه نيقلاوس احد الشمامسة السبعة و انحرف فى الايمان و اباح الزنا حتى مع مراته يعنى حاجة منتهى اللخبطة ..
و ديما ربنا يدى وعد... حافز
الوعد
7 مَنْ لَهُ أُذُنٌ فَلْيَسْمَعْ مَا يَقُولُهُ الرُّوحُ لِلْكَنَائِسِ. مَنْ يَغْلِبُ فَسَأُعْطِيهِ أَنْ يَأْكُلَ مِنْ شَجَرَةِ الْحَيَاةِ الَّتِي فِي وَسَطِ فِرْدَوْسِ اللهِ»
النصيحة ما تقفلش ودنك .. ما تقولش انا صح على طول الطريق .. افتح قلبك شوية و الوعد انك تاكل من شجرة الحياة
القلب الفاتر في محبته قلب جعان ، لازم يشبع و ربنا هو الشبع اللى بجد "شجرة الحياة"، فهو المشبع للقلب والشافي له (رؤ 22: 2) .
حتلاقى وقفتك قدام ربنا ابتدت تبقى معزية تانى و التسبحة تشتاق تحضرها تانى و عاوز تخدم بقلب تانى ...حتلاقى بيتك بيرجع و مراتك وولادك و اصحابك ..حتستطعم الحياة تانى ..و لو مارجعوش زى ما انت عاوز و عاندو و فضل الحال زى ما هو ما تخفش حيشقلك فى البحر طريق حيبقى فيه تعويض من عند ربنا و سند ..لو فضل جوزك قافل حتلاقى ربنا بيشبعك و يعوضك فى ولادك .. جرب ان تسمع و لا تعاند ..
انظر من اين سقطت .. تب .. اعمل اعمالك الاولى ..تاكل من شجرة الحياة " المسيح "

[Mary Naeem]

ربنا يبارك حياتك

[walaa farouk]

ميرسي على مرورك الغالى مارى

[Rena Jesus]

ميرسى ربنا يفرح قلبك
ويبارك تعب محبتك

[walaa farouk]

ميرسي على مرورك الغالى رينا