إزاي تتخلص من العصبية

[Rena Jesus]

إزاي تتخلص من العصبية

_وقف محاولتك انك تكون شخصية فائقة القدرة ،
وخلص نفسك من الرغبة في السيطرة الكاملة على كل الامور من غير ما حاجة تقع منك او ما تعملهاش ..
لأن ده مش هايحصل إلا على حساب صحتك وحالتك النفسية والمزاجية .
( افتكر دايماً انك انسان .. يعني محدود - الاعتراف بالمحدودية راحة )

_ ادي نفسك وقت أطول (فترة سماح) ..
في الوقت اللي بتعتقد فيه أنه ضروري انك توصل مكان أو تحقق شيء معين .. واعمل حساب أي عائق ممكن أنه يعترضك في طريقك للوصول لمكان او لتحقيق شئ .. علشان ما تتصابش بالتوتر والعصبية إذا إتأخر الوقت أو طالت مدة انجازك للعمل اللي بتقوم بيه .

_ خليك مرن
ما تحطش لنفسك مواعيد بالثانية علشان تخلص شغلك.

_ إبدأ يومك بدري جدا وادي لنفسك وقت كفاية تعمل فيه عاداتك اليوميه .

_ بسط الدنيا والأمور علي قد ما تقدر
وما تتغاظش علشان حاجات تافهة وممكن تكون متكررة ..زي قطر اتاخر عن معاده أو سواق تاكسي رخم أو طريق زحمة ( ده العادي) وأفتكر أنه حتى لو انفجرت --> عصبيتك مش هاتغير مجرى الامور .

_ ابعد عن البني آدمين اللي بيستثيروك ويغيظوك ويستنذفوا طاقتك ويفرهدوك ..
أما إذا كان ضروري تشوفهم وتقابلهم باستمرار فا ما تديهمش أهمية كبيرة .

_ ما تتوقعش الكمال في تصرفات البني آدمين اللي حواليك ..
لأنك لو عملت كده ببساطة هاتكون كل تصرفاتهم بالنسبالك مصدر إزعاج واحباط ليك .. خد الأمور ببساطة ومرونة، وخليك عارف أن اللي بيعقد الامور ويديها حجم اكبر من حجمها هو الخسران دايماً.

_ خذ وقت كفاية من الراحة والاستجمام من وقت للتاني
( امشي - اسمع موسيقي - اشرب حاجة بتحبها - خد شاور - اقرأ كتاب بتحبه -.... المهم ما تمسكش المدعوق اللي اسمه الموبايل :D ) لحد ما تخلص اللي عليك في وقت محدد لأن ده كفيل انه يقلل مشاعر التوتر والقلق اللي جواك.

_ إقرأ كتاب او احضر محاضرة عن إدارة الغضب (Anger Management)

_ شجع نفسك علي كل حاجة حلوة بتعملها
.. واحتفي بإنجازاتك حتي لو كانت صغيرة وبسيطة .. ده من شأنه يرفع روحك المعنوية في السما ( ببساطة كافئ نفسك) .

_ إفتكر دايماً أن العصبية والقلق المستمرين بيقصروا العمر
وهايودوك لسكة مليانة أمراض قلق وامراض ضغط، وهايأثروا على حيويتك ونشاطك وإقبالك على الحياة .

_ صلي ان ربنا يخلصك من العصبية
ويديك قوة احتمال وصبر علي نفسك وعلي اللي حواليك

دي مش كبسولة خطوات سحرية ..
لكنها بعض الافكار اللي ممكن تشجعك وتساعدك في رحلة تخلصك من العصبية وادارة مشاعر الغضب ..

( افتكر ان اللي اتعود علي حاجة ما بيتخلصش منها بين يوم وليله فلو مشيت شوية حلو ورجعت عصبي تاني ما تياسيش من نفسك ..
علشان نتعود علي اي حاجة جديدة ده بياخد وقت ومفيش تغيير بيحصل بضغطة زرار..
الموضوع محتاج سكة نمشيها ومجهود نعمله وربنا بيسند ويدي معونة )

تقدروا تضيفوا علي الحاجات دي زي ما انتوا عاوزين وعايشين لاجل فايدتنا كلنا ..
المهم تكون حاجات ايجابية معاشة ..

[walaa farouk]

ميرسي على مشاركتك الجميلة رينا

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمروركم الغالى