اقتل خوفك

[walaa farouk]

نيكي ..

بنت صغيرة عندها 7 سنين ..

فجأة حست انها تعبانة ودايخة ورجليها مش شايلاها ! .. أبوها وأمها خدوها عشان يكشفولها فـي أقرب مستشفى .. والتشخيص كان سرطان الدم!!

الفترة اللي البنت هتعيشها سنة بالكتير حسب تشخيص الدكتور، صدمة أبوها وأمها كانت كبيرة أوي خصوصاً إنها بنتهم الوحيدة .
قررو انهم يبلغوا البنت بحقيقة مرضها، بدأت مرحلة العلاج الكيميائى ومعاها بدأ تساقط شعرها البنت لبست باروكة بس الباروكة مش مريحة وبتخدش الجلد وبتسبب لها حكة مش لطيفة بس فضلت لابساها وماكنش فيه مشكلة خصوصاً إنها كانت فـي الأجازة وتقريباً محدش هيشوفها ..

بدأ الهم يتشال مـن بداية رجوعها للمدرسة بعد الأجازة بـ إستغراب زمايلها مـن شكلها بالباروكة الكبيرة اللي لابساها .. الفكرة فـي الموضوع إنك هنا بتتعامل مع دماغ عيال ومجتمع طفولى زى المدرسة الإبتدائية كل اللى فيها عيال ! .. طبعاً اتهرت تريقة مـن زمايلها .. الباروكة اتشدت مـن على راسها وكل اللى كانت بتعمله إنها تشيلها مـن على الأرض وتجرى على الفصل وهى بتعيط .. تروح عشان تاكل فـي مطعم المدرسة؛ زمايلها يقوموا قبل ما يكملوا أكلهم .. تقرب مـن الشلة بتاعتها اللى قريبين منها يتحججوا كل واحد منهم بـ حجة ويمشوا.

رجعت للبيت فـي مرة وقالت لـ أبوها وأمها إنها مش قادرة تستحمل خلاص .. أبوها عرض عليها إنها تقعد فـي البيت وبلاش مدرسة خصوصاً إنه كان بيقول فـي باله إيه لزمة المدرسة لـ واحدة أساساً مش هتعيش للسنة الجاية .. البنت وافقت .. ماراحتش لمدة أسبوع فعلاً .. وفجأة فـي بداية الأسبوع اللي بعده أبوها وأمها فوجئوا بيها لابسة هدوم المدرسة والباروكة بتاعتها وبتصحيهم الصبح عشان يوصلوها المدرسة ! .. طبعاً عشان ظروفها الصعبة وعشان مايزعلوهاش قاموا لبسوا وركبوا العربية هما التلاتة .. طول المسافة مـن البيت للمدرسة محدش فيهم اتكلم بـ حرف .. وصلوا قدام المدرسة .. البنت نزلت واتحركت ناحية باب المدرسة .. فجأة وقفت وراحت رجعت لـ أبوها وأمها وسألتهم : انتو عارفين انا هاعمل ايه انهاردة ؟ أمها ردت : ايه يا حبيبتى .. ردت بقوة : ( هاقتل الخوف وهاكتشف مين هو أفضل صديق ليّا ).

وراحت قلعت الباروكة بتاعتها ورمتها ع كنبة العربية واتحركت بثبات ناحية المدرسة ! .. أبوها وأمها مقدروش يمسكوا دموعهم .. الغريب إن يومها محدش من زمايلها خاف منها أو قِرف أو خد جنب .. قدام شجاعتها محدش قدر يفتح بُقه .. قتلت خوفها بشجاعتها فخافوا التانيين..

اقتل الخوف اللي جواك وحاربه بكل قوتك، خليك واثق ان الله بيدي قوه ونصره على كل مخاوف بتعوق طريقنا، الله يقدر يعمل بيك ومعاك اعمال عظيمة، الله بيقدر يعمل الصعب اللي انت ماتقدرش عليه ..

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى ربنا يبارك تعب محبتك

[yousssf]

افرحي نيكي لأن الفردوس بانتظارك وهناك تعيشي أجمل عيشه
فلا يأس من روح ورحمة الله
فهو شايلك الاحسن
،،

[walaa farouk]

مارى
رينا
يوسف
ميرسي كتير على مروركم الغالى