عريس -O

[walaa farouk]

بوستات نازلة فى كل مكان و على جروبات التعارف و الارتباط بتقول :
خدى الى يحبك
خدى الى يعيشك ملكة
خدى الى يبسطك و يهزر معاكى
خدى الى يتحملك و يقبلك زى ما انتى
خدى الى يشوفك جميلة رغم ضعفك و عيوبك
خدى خدى خدى...!!!!
هو البنت هتفضل تدور على الكائن ده الى بيدى و بس!!!
هو فيه حد هنا فى الكون كله بيدى بس يا خوانا؟
يعنى الموديل بتاعة بيدى بس؟؟
اقولك حاجة... خدي عريس -o
بيقولك يا ستى ان فصيلة الدم دى بتدى كل الفصايل... شوفتى الهنا الى انتى فيه؟؟!!
بيقولك العريس الى فصيلة دمة -o ممكن يدى لكل الناس
ياله يا ستى هيصى
لما تلاقى عريس كدة ابقى اتجوزية علشان ده بقى الى هيديكى كل حاجة
عايزة تاخدي؟؟
خدى ..
هنبطل امته التهريج ده يا جماعة؟؟!!! هااااا
البوستات الى من النوع ده اضحوكة بجد
لما نحب نكتب بوست متوازن عن الارتباط فا نقول :
خدى الى انتو الاتنين ترتاحو لبعض
تعرفوا تاخدو على بعض
تحتملوا بعض
تشيلو حمول و ضعفات بعض
تستحملوا عيوب بعض
تعيشوا على الحلوة و المرة مع بعض
تفرحوا بعض.. او حتى تنكدوا على بعض بس نتصالح بسرعة
تشوفوا جمال بعض مش عيوب بعض
هو ده الكلام الى يتقال
انما لو فضلتى تدورى على الحد الى هيديكى كذا وكذا ...
و خدى الى يعملك فيها قرد و يعملك فيها اراجوز علشان سيادتك تضحكى...
و حلقاتك برجللاتك و تك تك تك اسمع كلام امك..
تك تك تك اسمع كلام ابوك
تك تك تك .. خدى الى يحبك و يهننك و يدلعك و متاخديش الى تحبية
لو هتعملى كدة يبقى احب ابشرك... ميعاد الريري بتاعك جة
ياااله يا قطة... ياااغتي
ياله يا حبيب ماما انت ياااغتي
نكبر بقى شوية هاااا
و انت كمان اكبر شوية ومتخليش حد يقولك خد الى تحبك و تموت فى دباديبك
ثم تعالى هنا...ايه موضوع الدباديب ده الى البنات بتموت فيه!!!!هاااااا
هو دبدوب واحد الى هو حضرتك و ربنا يكرمك بددوبة زيك تموتو انتو الاتنين فى دباديب بعض ونخلص بقى.... حيرتونا معاكم

[Rena Jesus]

ميرسى يا لولو
عريس -o !!!!!