قوم اطمن على حدودك .....!!

[walaa farouk]

جسمك هو البيت اللى بتسكن فيه نفسك وروحك.. ونفسك هى البيت اللى بتسكن فيه مشاعرك وأفكارك ودوافع سلوكك.. وزى ما فيه لجسمك حرمة.. فيه برضه لنفسك حرمة.. بمعنى..

من حقك محدش يقرب من حدودك النفسية بدون استئذان.. من حقك ماحدش يقتحمك.. أو يخترقك.. أو يستحوذ عليك.. تحت أى مسمى.. ولا تحت أى ادعاء..

من حقك تحدد المسافة النفسية اللى بينك وبين أى حد.. من حقك تقرب اللى ترتاحله واللى تطمن له، وتمنع اللى ماتطمنش له إنه يقرب.. من حقك تسمح لحد إنه يقرب أكتر، وتفتحله الباب.. ويدخل البيت.. ومن حقك تحط سور فاصل وسياج منيع يفصل بينك وبين حد تانى..

حتى جوه بيتك النفسى.. فيه ناس بتقعدهم فى الصالة أو الانتريه.. وفيه ناس بتعزمهم على الأكل وتدخلهم أوضة السفرة.. وفيه ناس تانى بتسمحلهم يتحركوا فى البيت براحتهم، وكأنهم أصحاب مكان..
ليه بقى ده كله؟؟

علشان فيه ناس هوايتها الاقتحام.. اقتحام الاخرين.. يقرب منك.. ويقرب أكتر.. ويلاقيك فاتح حدودك.. فيدخل.. ويتجول.. ويحس إن المكان مكانه، فيقعد.. ويبدأ فى استهلاك مشاعرك، فيخليك تحزن مكانه، وتتألم بداله، وتشيل همومه بالنيابة عنه.. وبعدين يبدأ فى انهاك أفكارك، فتحتار فى مشاكله.. وتتردد فى قراراته.. وتعانى فى كل خطوة هو بيخطيها.. وبعد شوية كمان يبدأ فى توجيه تصرفاتك لحسابه.. ورسم سلوكك لصالحه.. وانسى بقى.. انسى نفسك يعنى..

فيه كمان ناس بتحترف الاستحواذ.. يعنى يحب يمتلك الآخر.. ويحتل أرضه.. يبقى عاوزك تكون موجود ومتاح ليه طول الوقت.. يبقى عاوز يستحوذ على انتباهك.. واهتمامك.. وتفكيرك.. ومشاعرك.. وبعد شوية.. حياتك.. آه.. يعنى يبقى عاوزك تعيش ليه.. مش لنفسك.. وكتير من قصص الحب المؤلمة بيكون فيها ده.. وبيؤدى لتدمير أحد الطرفين تماماً.. وكتير من الزواجات الفاشلة بيكون ده سببها.. وكتير من الأمراض النفسية اللى بتصيب الأولاد الصغار والشباب فى مقتبل العمر بيكون وراها إن الأب والأم متصورين إن ابنهم أو بنتهم مشروع حياتهم (مش مشروع حياته)، وإنه لازم يحقق أحلامهم (مش أحلامه)، ويعمل اللى هما ماقدروش يعملوه (مش اللى هو عاوز يعمله)..

كمان فيه ناس بتبقى عاملة زى مصاصين الدماء.. يعنى يبقوا عاوزين يمصوا دمك.. يبقوا عاوزين ياخدوا منك كل اللى يقدروا ياخدوه.. تبقى انت صاحب العطاء الدائم الذى لا ينقطع.. تدى.. تدى.. تدى، تنزف.. تنزف.. تنزف.. تحب.. وتقبل.. وتسامح.. وتسمع.. وتفهم.. وتقدر.. وتعذر.. وتستحمل.. وتقطع من نفسك كل يوم حتة تقدمها قربان ليهم.. وتدفع كل يوم تمن غالى فى سبيل رضاهم.. وهم مش بيشبعوا.. ولا هيشبعوا.. أبداً..

فيه ناس بقى.. ودول أخطر من الجميع.. بيدوبوا الحدود.. ويزيلوا الفواصل.. لغاية ما تعرفش فين حدودك من حدودهم.. فين الخط الفاصل بينك وبينهم.. فين انت وفين هما.. تتوه جواهم أو يتوهوا جواك.. وماتعرفش اللى انت حاسه ده تبعك واللا تبعهم.. واللى شايفه ده بيعيونك واللا بعيونهم.. واللى جواك ده بتاعك واللا اترمى فيك من عندهم.. تتلخبط.. تحتار.. وبعدين.. تضيع..

على النقيض، فيه ناس بقى بيبقوا واقفين على الحدود.. مستنيين الإذن.. مستنيين الإشارة الخضرا.. وواقفين من زمان.. فى انتظار إنك تفتح الباب..
وناس رايحة جاية بتحوم حواليك.. كل أملها.. إنك تاخد بالك.. مجرد تاخد بالك..

وناس واقفة هناااااك.. بعيد.. بعيد جدا.. مش عارفة تقرب واللا تبعد..
قوم بقى اطمن على حدودك.. وراجع المسافات اللى بينك وبين الناس.. شوف مين موجود فين.. مين قريب.. مين قريب أوى.. مين قريب لدرجة الخطر.. ومين مقتحم.. ومين مستحوذ.. ومين محتل.. ومين بيمص الدم.. واعمل التعديلات اللازمة.. وحط كل حد فى مكانه..

شوف كمان مين على الباب.. ومين رايح جاى.. ومين واقف بعيد..وكلهم مستنيين الإذن.. والإشارة الخضرا.. لو انت تحب..

نقول تانى..

من حقك تحدد مين.. هايكون فين.. امتى..
مهم حدودك تبقى واضحة.. وأرضك تبقى أمنة.. ومهم إنك تدافع عنها وتحميها.. ضد أى أذى من أى نوع..
تحديد المسافة بينك وبين أى حد حق أصيل ليك.. زى ما هو حق أصيل لكل الناس..
بيتك النفسى ملكك.. مش ملك أى حد تانى.. حافظ عليه.. لأنه أمانة.. هيسألك عنها اللى سلمك عقد ملكيته المؤقتة يوم ما خلقك.. ويمكن قبل ما يخلقك..

[Rena Jesus]

ربنا يبارك تعب محبتك

[Mary Naeem]

مشاركة جميلة جدا

ربنا يبارك حياتك

[walaa farouk]

رينا
مارى
ميرسي كتير على مروركم الغالى