7 خطوات لخلق حوار ناجح بين الزوجيين ...

[walaa farouk]

1/لازم تعرف ان 72% من الحوار الناجح بيعتمد على تعبيرات الوجة يعنى مثلا صباح الخير اللى بقولها لفلان بس وانا ببتسم غير صباح الخير وانا بقولها وانا عامل كده :/ ..خدى بالك وانتى بتتكلمى من تعبيرات وشك ونبرة صوتك لان الموضوع ده اهم بكتير اوى من الكلام نفسه ..

2/ استخدمى اسلوب الساندوتش لو عايز تناقش الطرف التانى فى حاجة( يعنى ايه ؟؟) هو الساندوتش عامل ازاى ؟ فينو من فوق وبعدين الاكل وبعدين فينو فى الاخر .. نفس الكلام وانت بتتكلم اشكر الطرف التانى على مميزاته الكتير اللى فى وبعد كده قول الشئ اللى انت عايز تعاتبه عليه وفى الاخر برضة اشكر فيه عشان يحس انك مش ضد لى ..(وطبعا ياريت نتجنب الكلام المباشر لان الطرف التانى مش هيستجيب بل بالعكس هيعاند اكتر وخصوصا الرجل ما بيحبش حد يعدل عليه ..

3/قبل الخطوبة ممكن نقعد نتكلم كتير بعد الجواز الكلام بيقل وده شى ميخوفكيش .. المهم انك تحافظى ان يكون فى حوار بينكوا حتى لو كلامكم ما بيزيدش عن عشر دقائق فى اليوم كله طالما بتحاولوا توصلوا للكلام اللى محتاجنها .. وبرضة اختيار الوقت مينفعش خالص اختار وقت يكون الطرف التانى مشغول فيه

4 /الحل الوسط مش وحش يعنى لو قعدتوا تتكلموا فى موضوع وموصلتيش لحلول كاملة ده عادى مش كل حاجة هناخدها من اول مرة .. بلاش تزن طول الوقت على اللى اانت عايزة عشان الطرف التانى ميبعدش عنك ..

5/لو حاسس ان مبقاش عندك طاقة لا للكلام ولا حتى لطولة البال مع الطرف التانى اتاكد تماما انك فاقد لحاجات حلوة فى حياتك حاول تدور على اللى بيبسطك وبيحسن مودك اكتب قائمة بكل الحاجات اللى لو عملتها تغير مودك واعمل اسهل حاجة فيهم ..صدقنى انت كده مش بتعيش لنفسك ولا حاجاة انت بتسعد نفسك عشان تعرف تسعد اللى حوليك ..

6/حاول تذكر ايجابيات الشخص الناس بتحب اللى يسمعها كلام حلو .. طيب جربى كده على مسامع زوجك تقوليله انت بطل.. انت السند اللى لينا فى الدنيا .. جربى اول ما يعمل حاجة تحسسيه انك خدتى بالك وتشكريه عليها .. حسسيه كده فى وسط الاحباطات اللى بيشوفها طول شغله انه فعلا فى حد مؤمن بى ..

7/بنتكلم فى موضوع منخرجش عنه يعنى بلاش وانت بتناقشية فى موضوع يخص اطفالكم تروحى داخله على سيرة حماتك اللى مطلعة عينك ولا البيت وطلباته بلاش تلفى فى دائرة مقفولة عندك حاجة عايزة تتكلمى عليها اتكلمى فيها هى وبس ولما تحليها ابقى اتكلمى فى وقت تانى فى موضوع غيره
*** اخيرا بقى حاجات مينفعش تعملها اثناء النقاش
-لو فى حاجة عايز تتكلم فيها مينفعش تقول ملوش لازمة الكلام لو فى حاجة فى قلبك لازم تطلعها وتفضفض مع اختيار الالفاظ..
-بلاش نحكى فى تفاصيل كتير اوى من غير داعى قول على طول قصدك ..
-مينفعش تقول انا مش هسمع لانى عارف كل اللى هتقوله لازم تسمع اللى قدامك يمكن فى حاجة عنده هيقولها هتغير من نظرتك ..
-مفيش حاجة اسمها احنا بينا عشرة لازم الطرف التانى يفهمنى من غير ما اتكلم .. لازم تفهم ان احيانا الطرف التانى بيبقى كل اللى محتاجة ان يتاكد هل التصرف ده هيريحك ولا لا...

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسي على مرورك الغالى مارى