فيديو.عكاشة لمرسى: هشتكيك فى محكمة جنيف

[jajageorge]

بعد وصفه بحبيب قلبه
فيديو.عكاشة لمرسى: هشتكيك فى محكمة جنيف
توفيق عكاشة

كتبت- ناهد إمام:
منذ 1 ساعة 21 دقيقة

تحدث الإعلامى توفيق عكاشة مساء أمس الأربعاء عبر حلقة برنامجه "مصر اليوم" على قناته الفراعين متحدياً الرئيس المنتخب الدكتور محمد مرسي، تعليقاً على طلب الأخير من محكمة القضاء الإدارى جمع جميع الدعاوي التي تُطالب بإغلاق قناة الفراعين في قضية واحدة، قائلا:"حبيب قلبي الدكتور مرسي .. أنا لها، أنا لها يا رئيس الجمهورية"!

وتابع:" شوفوا بقي انا لوحدى ومعى ربي الذى خلقنى، ولأول مرة فى تاريخ مصر، انا ورئيس الجمهورية المنتخب بنتيجة المستشار فاروق سلطان، فيه قضايا بيننا وبين بعض، وأول حاجة يعملها كرئيس جمهورية ديمقراطى العمل على غلق قناة الفراعين، وهو وتوفيق عكاشة يدخلوا فى قضايا قانونية مع بعض، أنا لها، انت هترفع عليا فى القضاء الإدارى، أهلا حبيبي، وأنا معاك فى محكمة جنيف الدولية لعدم الاعتراف بك رئيسا للجمهورية، ونشوف المحكمة اللى حتحكم الاول مين، وعلى فكرة شعب مصر كله هيكون فى محكمة القضاء الادارى فى نصف اغسطس وبكره هتقولها توفيق قالها كلمة، الواد الفلاح الغلبان اللى ميعرفش حاجة ده ، اللى هو انا ".
واستقبل عكاشة مداخلة تليفونية ممن أسماه مستشاره القانونى " خالد سليمان " ، سائلا إياه عن الهجوم على السجون وهروب المساجين وحرق أقسام الشرطة، مستطردا فى لمز واضح:" طب وهروب الناس من السجون، لأن من ضمن الناس السيد الرئيس المنتخب"!
و تحدث عكاشة مع محاميه عن تدويل قضيته ضد رئيس الجمهورية المنتخب الدكتور محمد مرسي، حيث اعتبر سليمان أن ما فعله الدكتور مرسي تدخلا سافرا فى السلطة القضائية، واصفا الفراعين بأنها قناة الشعب شئنا أم أبينا، - على حد قوله - وعكاشة بالموضوعى الذى يمثل صوت الشعب، مطمئنا إياه بأن الجميع يحبه ويسانده، قائلا:" اللى انت بتعمله يا دكتور توفيق فى الاعلام ده محدش بيعمله" .
وهدد عكاشة من أسماهم بمن يوقعون بينه وبين المجلس العسكرى قائلا:" يا داخل بين البصلة وقشرتها ما ينوبك إلا حرارتها"، مؤكدا على أنه مساند للمجلس العسكرى لكنه " زعلان " منه على حد قوله.
وتابع عكاشة تخويفه للمصريين مما سيفعله بهم الإخوان والسلفيون إذا لم يشاركوا فى المليونية التى دعا إليها أمام المنصة يوم غد الجمعة، لمساندة جهاز المخابرات، واصفا إياه بأخطر جهاز فى مصر ومتهما الدكتور البلتاجى ومكتب الإرشاد برغبتهم فى اختراقه، قائلا:" كل واحد يحشد نفسه بنفسه، هذا اليوم سيكون فارقا اللى عاوز يصدقنى يصدقنى، الجهاز اللى عامل لهم رعب، اللى بيناموا يحلموا بيه بالليل، خط أحمر، ممنوع منعا باتا إن إحنا نسمع حد بيتكلم عن جهاز المخابرات، إما ان الشعب ينزل يقول الكلام ده، يا إما مينزلش، انتوا حرين، إحنا لسه بنقول يا هادى وبيهدموا الأضرحة ويضربوا وكيل فنانين بيحيي أفراح فى الفلاحين بالنار، ويرموا البنت اللى نازلة البحر يقابلها واحد يضربها بإزازة ، والراجل لسه محلفش اليمين، ننزل بقي ولا مننزلش، المثل الفلاحى بيقولك الكترة تغلب الشجاعة".
وتابع:" محدش بقى يقعد يطلبنى فى التليفون بعد كده ويقعد يصرخ ده هدموا ضريح كذا، ده هدوا تمثال كذا، هحط السماعة فى وشه"!

اقرأ المقال الأصلي علي بوابة الوفد الاليكترونية الوفد - فيديو.عكاشة لمرسى: هشتكيك فى محكمة جنيف