تعبان؟ متضايق؟ زعلان؟قرفان؟مهموم؟مش لاقي حد تحكي معاه؟ مجروح؟مكسور؟محدش بيحبك؟ محدش قابلك؟ ..........
عارفة ان كل واحد بيشكي من حاجات كتير مضايقاه و عارفة ان كل واحد مش بيبقي قادر يتحمل الصعوبات احيانا ....
بس نفسي اقولك علي حاجة : انت مش لوحدك تعبان و متضايق و مجروح في الدنيا دي
انت مش لوحدك مجروح و مكسور في الدنيا دي
انت مش لوحدك عشت ظروف صعبة.....
عارفين ايه المشكلة ؟
كلنا لما يكون فيه ناس قاعدين معانا بنحكي كتير اوي عن مشاكلنا و احنا فاكرين اننا لوحدنا في الدنيا دي اللي شايلين متاعب و اوجاع و مبقاش فيه موضوع يتحكي غير هموم الشغل و هموم العيال و المصاريف و شغل البيت ...طيب ليه؟ليه دايما محسسين نفسنا اننا موجوعين و مفيش حد زينا في الدنيا ؟ليه احنا موجوعين و شايلين هموم اصلا؟عارفين....
مفيش في الدنيا حد زعلان و مهموم يبقي قريب من ربنا
احنا موجوعين و متضايقين علشان بعدنا عن ربنا ..ايوة بعدنا عن ربنا و مبقناش نصلي و حتي الصلاة مش بنبقي مركزين فيها بنبقي مركزين بس في اللي هيحصل بكرة و اللي عملناه امبارح و ازاي الناس هتشوفنا و البس ايه بعد ساعتين ........مبقناش نهتم باي حاجة غير الدنيا بحلوها و مرها
ليه منهتمش بالسماء ع الاقل فيها حلو بس و مفيهاش مر ؟
ليه تتعب نفسك بالدنيا لما هي هتنتهي ؟
ليه بتضيع وقتك في الدنيا بكل المشاغل دي لما كل دا هيروح؟
ليه مهتم بكنوز العالم و الفلوس الكتير لما كل دا مش بتاعك اصلا لانك هتفقده؟
ليه مش بتحاول تقرب من ربنا لما العمر فاضل فيه يومين؟........
ناس كتير بتموت قدامنا ارجوكم الفرصة هتضيع
احنا مكاننا مش هنا ......
احنا هنا في فرصة صغيرة بتعدي في كام سنة عشان لو نجحنا فيها ندخل الملكوت
حياتنا مش هتطول .... و مش عارفين هنموت امتا ..ليه نضيع الفرصة لما هي في ايدينا ؟ الفرصة دي مش هتتكرر و مش هينفع ترجع الزمن لو مت عشان تستغل الفرصة صح
فكر كويس ...... كلنا محتاجين نستغل الفرصة حتي انا
ممكن نحسبها صح بقا
