نفسي اكون أب ل بنت .. من لحظة ما تخرج من رحم امها تفضل معايا و قصادي .. اسميها اسمين .. اسم الناس كلها تناديها بيه من يوم ما تتولد .. واسم محدش غيرنا يعرفه .. اختارلها لبسها بنفسي .. و اسرحلها شعرها وهي ف حضني .. اخدها معايا ف كل مشاويري و اخلي عينيها تشوف الدنيا الواسعه .. لما تكبر هبقي باباها وصاحبها .. هسمعها لما تحب تتكلم .. و هسندها قبل ما تقع .. هعلمها تكون بنت ب 100 راجل .. و بمليون بنت .. معنديش مانع اني اعاكسها .. هقولها كلام حلو يخلي لون خدودها يحمر .. و ثقتها ف نفسها تزيد .. البنت كائن حي بيتنفس حنيه و الكلام الحلو اكسجينه .. هخليها تعرف ازاي تعيش حياتها اللي بتحلم بيها .. ازاي تكون غير اي حد .. هعلمها تكون اقوي من اي مشكله .. و اكبر من اي جرح ..
هشجعها علي الجنان و الفرحه .. وهقويها علي الظروف والأيام ..
هعلمها ان الحياه مش مجرد ( راجل ) .. والبنت ليها حاجات تانيه غير بيت جوزها .. هعلمها تحلم و تنجح و تعافر .. هكتب فيها بدل القصيده 100 .. وهجيبلها ورده ف عيد الحب .. هتمشي معاها بالليل ع الكورنيش وهندخل سينما سوا .. يوم ما ازعلها هعودها تجري عليا وتشتكيلي مني .. مش هسيبها تروح لاحضان تانيه .. هكون أول حبيب يسكن قلبها و أول راجل عينيها تشوفه .. لما تحب هتيجي تحكيلي .. من غير ما تخاف .. ويوم فرحها هرقص معاها slow ..
هكون قوتها و سندها .. حبيبها وابوها وصاحبها
هعرفها ان قصص الحب مش لازم تكون بين راجل وحبيبته ..
ممكن جدآ تكون بين راجل وبنته !
"مينا مجدي"
01 - 04 - 2016, 08:36 PM
قد تكون مهتم بالمواضيع التالية ايضاً
العرض المتطور