مسرحيه عيد ميلاد الملك

[Marina Greiss]

مسرحية

عيد ميلاد الملك

الشخصيات

يوسف

ماهر

مراد

عزيز

هنادي

الملك
المشهد الاول

(
يتجمع بعض الناس في ساحه المدينه )

يوسف
: يا عدرا قويني صباح الخير يا جماعه

عزيز : صباح الفل يا يوسف عامل ايه

يوسف : الحمد لله نشكر ربنا كويس المهم انتوا عاملين ايه

ماهر : احنا تمام امال انتا رايح فين الصبح كده

يوسف : علي الشغل يا ماهر يا اخويا

مراد: ربنا يعينك يا يوسف

ماهر : يا جماعه صحيح انتوا عرفتوا ايه الي حصل مسمعتوش

عزيز : لا ايه اللي حصل قول

ماهر: بيقولوا الملك جاي هنا

مراد : ايه الملك جاي بلدنا دي

ماهر: اه جاي

يوسف : وياتري ايه السبب بقي اللي يخلي الملك العظيم هيجي بلدنا

ماهر: انا اقولك يا سيدي الملك عيد ميلاده النهارده وهيجي هنا علشان يحتفل بيه

عزيز: ياسلام ده هيبقي يوم مش هيتكرر تاني طول العمر

مراد : اه هنشوف اللي عمرنا ما شفناه

ماهر: استنوا استنوا احنا لازم نقدم للملك العطايا والهدايا علشان يرضي عننا

مراد : علي رايك ودي تبقي فرصه بقي علشان نقدم ليه احسن عطايا علشان يكون مبسوط مننا ونقرب منه اكتر

ماهر: صحيح احنا لو قدمناله هدايانا وعجبته فعلا هنبقي حبايبه ويعملنا كل اللي احنا هنطلبه

يوسف : لا طبعا يا جماعه ايه اللي انتوا بتقولوه ده الهدايا اللي هنقدمها للملك المفروض تبقي علشان نبين ليه حبنا ليه وفرحتنا بيوم ميلاده

ماهر : يا عم يوسف الهدايا لو مش غاليه وعليها القيمه الملك مش هيبصلها اصلا

عزيز : اه طبعا لو مكنتش الهدايا دي تملا العين يبقي ولا كاننا عملنا حاجه

يوسف : طيب ربنا معاكم وانا كمان كمان هروح احضر هديتي

ماهر : متنساش يا يوسف خلي هديتك غاليه وعليها القيمه

مراد : انتوا واقفين ليه يلا بينا نجهز الهدايا الي هنقدمها

عزيز : علي رايك احنا واقفين ليه يلا بينا

يوسف : وبعدين انا معنديش حاجه اقدمها للملك هديه طب والعمل كده الملك هيزعل مني بقي يجي لحد هنا ولما اقابله مدلهوش هديه انا هروح ادور في البيت علي اي حاجه ينفع اقدمها

(
يخرج يوسف ويدخل الملك في ثياب عاديه مثل بقيه الشعب)

الوزير
: يا جلاله الملك ازاي بس تنزل وسط الناس بنفسك

الملك : يا وزير انا عاوز اختلط بالناس واشوف ازاي بيتكلموا عليا

الوزير : يا جلاله الملك شعبك بيحبك جدا

الملك : انا عارف يا وزير بس انا عاوزهم يحبوا بعضهم زي ما بيحبوني انتا عارف المحبه من الفضائل الجميله والعظيمه

الوزير : طب علي الاقل يا جلاله الملك كنا جبنا س معانا

الملك : ازاي تقول كده اجيب حراس يحرسوني من شعبي وناسي

الوزير : طب وجلالتك تحضيرات عيد الميلاد

الملك : مالها هتتعمل بس انا عندي فكره جديده السنه دي

الوزير : ايه هي جلالتك

الملك: انا بفكر اعمل عيد ميلادي هنا وسط الناس مش في القصر

الوزير : ازاي يا جلاله الملك بقي نسيب القصر ونعمل الاحتفال هنا في الشارع وسط الناس

الملك : اه علشان عاوز اعوضهم عن تعبهم اللي تعبوه طول السنه فهعمل الحفله دي هنا علشان افرح الناس معانا

الوزير : اوامرك يا جلاله الملك

الملك: يلا يا وزير روح القصر وبلغهم بكل اللي انا قلتهولك

الوزير : وجلالتك مش هترجع معايا

الملك: لا انا هفضل هنا شويه وسط الناس ومتخافش محدش هيعرفني

الوزير : اوامرك يا جلاله الملك

الملك : يلا روح انتا بقي

الوزير: بعد ازنك يا مولاي

(
يدخل بعض الناس )

ماهر
: الملك هيعجبوا اوي الهدايا اللي انا جايبها

عزيز: لالالالا الهدايا اللي انا جايبها هتخلي الملك يوافقلي علي اي حاجه انا اطلبها

مراد :حاسب انتا وهو بقي انا اللي انا جايبه محدش جابه في المدينه كلها

ماهر: ليه يعني انتا جبت ايه ؟

مراد : انا جبت مجموعه حرير من افخم واغلي انواع ير في العالم كله يعني اللي عملها معملش زيها وجبت كمان فواكه نادره جدا متجمعه من من احسن جزر في العالم حد فيكم جاب هدايا زي بتاعتي

عزيز : ياعم استني بس لما تشوف الهدايا اللي انا جايبها ابقي اتكلم واحكم

مراد: ليه يا اخويا انتا جبت ايه يعني

عزيز: انا بقي جبت اللي محدش فيكم كان هيعرف يجيبه انا جبت للملك ازازه العطر دي وازازه العطر دي مصنوعه تحت ايد اعظم صناع العطور في ا الهند مفيش منها في العالم كله اتفرجوا اتفرجوا

ماهر : فعلا جميله جدا

مراد: ريحتها مزهله فعلا

ماهر: لالالا بس استني لما تشوف هديتي للملك

عزيز : ورينا يا سيدي اللي انتا جايبه

ماهر: انا بقي بعد ما لفيت العالم طول السنين اللي فاتت بصفتي تاجر رحال كنت دايما بدور علي اكتر حاجه غريبه موجوده في العالم واخيرا وانا في رحله من الرحلات لقيتها

مراد : وياتري بقي اي هي الحاجه دي

ماهر : الحاجه دي هي اللي فعلا مفيش منها اتنين في العالم كله

عزيز : يا سيدي قولنا ايه هي شوقتنا

ماهر : الحاجه دي هي لؤلؤة نادره الوجود لا تقدر بثمن لان مجرد النظر اليها بيضفي روح السعاده والبهجه والراحه علي كل من يراها اتفرجوا

عزيز : يا سلام علي الجمال

مراد : جمالها بديع وشكلها اخاذ

ماهر : شفتوا بقي مجرد ما يشوف الملك هديتي هتعجبوا علي طول

(
ثم ينخفض هم ثم يدخل الوزير )

الوزير
: كل تمام جلالتك كل اللي طلبته حصل الحفله هتكون جاهزة في الميعاد بالظبط زي ما جلالتك طلبت

الملك: بص يا وزير شفت شعبي بيعمل ايه علشاني

الوزير : ايه يا جلاله الملك

الملك : شايف التلاته اللي هناك دول

الوزير: شايفهم جلالتك

الملك: التلاته دول بيتسابقوا مين فيهم اللي يجيب احسن هديه علشاني في حفله عيد ميلادي

الوزير : طبعا يا جلاله الملك مش بقولك شعبك بيحبك

الملك: الاول اللي هناك ده جايبلي افخم انواع ير اللي في العالم واحلي انواع الفواكه كمان اما التاني جايب افخم انواع العطور من الهند

اما التالت فجاب اغلي لؤلؤة في العالم

الوزير: يا جلاله الملك انتا مقامك اكتر من كده بكتير

الملك : تعالي يا وزير نروح نمشي شويه كمان في المدينه ونشوف الناس بتعمل ايه تاني

(
يرجع التلاته للكلام مره اخري)

ماهر
: بصوا مين جاي هناك يا جماعه

عزيز : ده يوسف ياتري جاب ايه هديه

يوسف : ازيكم يا جماعه عاملين ايه

مراد : احنا كويسين المهم قلنا بقي جبت ايه هديه

يوسف : انا جبت اللي انا قدرت اجيبه

ماهر : وده ايه ده بقي

يوسف : دي فطيره دقيق عملتها بايدي في البيت بس عملتها باتقان كبير علشان تكون لايقه بجلاله الملك

عزيز : فطيره جبت للملك في عيد ميلاده فطيره

مراد : لا شفت احنا جبنا ايه

يوسف : جبتوا ايه

ماهر : انا جبت اغلي لؤلؤة في العالم

عزيز: وانا جبت عطر من افضل العطور في العالم مصنوعه في الهند

مراد : وانا جبت اغلي واحلي واجود توب حرير موجود في العالم كله اللي عمله معملش منه الا التوب ده بس

يوسف : الله فعلا هداياكم جميله جدا

ماهر : بس انتا يا يوسف مش شايف ان الفطيره دي متلقش بجلاله الملك خالص

يوسف : يا جماعه الهديه مش بثمنها الهديه بقيمتها عند الملك

عزيز : ياعم انتا حر لما نروح القصر عند الملك كله هيبان

يوسف : هو الحفله فاضلها قد ايه

مراد: الحفله خلاص هتبدا بعد شويه

يوسف: يارب يطولنا في عمر ملكنا وقائدنا علي طول ونيجي نقدمله احسن ما عندنا كل عيد ميلاد وكل سنه

(
تدخل طفله صغيره يظهر عليها الجوع والفقر)

هنادي
: لو سمحت انا جعانه وسقعانه اديني فلوس اشتري اكل

ماهر: امشي يا بت من هنا

هنادي: حرام عليك

عزيز: انتي يا بت امشي من هنا بدل ما حراس القصر وجنود الملك يجوا يضربوكي

هنادي : انتوا ايه معندكوش قلب

يوسف : حرام عليكم يا جماعه ايه اللي انتوا بتعملوه ده

مراد : ياعم يوسف نعملها ايه يعني هو ده وقته احنا مستنين الملك وحفله الملك

يوسف : لو كان الملك هنا مكنش رضي بكده ابدا

هنادي: ربنا يسامحكم ربنا يسامحكم

يوسف: تعالي يا حبيبتي متعيطيش انتي اسمك ايه

هنادي: هنادي

يوسف : اسمك جميل خالص يا حبيبتي بصي خدي الفطيره دي كليها وخدي العبايه دي علشان تدفيكي وانا لما اقابل الملك هكلموا علشان خاطرك

هنادي: انا مش عارفه اشكرك ازاي علي كرمك وطيبه قلبك دي

يوسف : لالا ده كله من عند ربنا يعني المفروض تشكري ربنا مش تشكريني انا

هنادي : شكرا يارب علشان اديتني من عطاياك وشكرا كمان علشان فيه ناس طيبه زي عم يوسف موجوده يارب اعطيه كمان وكمان

يوسف : يلا يا حبيبتي روحي بقي كلي واستني علشان تحضري حفله الملك

هنادي : حاضر يا عم يوسف ومتشكره جدا مره تانيه وربنا معاك يارب

ماهر: معقول يا يوسف تديها الفطيره الوحيده اللي معاك واللي انتا جايبها هديه للملك

يوسف : حرام عليك انتا شفت هي كانت جعانه قد ايه

عزيز : تقوم تديها هديه الملك وكمان العبايه الوحيده اللي عندك

يوسف : مش مهم اكيد ربنا هيعوضني

مراد: طب هتعمل ايه حالا انتا ازاي هتقابل الملك كده حالا من غير هديه

ماهر : اه طبعا انتا هتقابل الملك من غير هديه لا طبعا لازم تروح

يوسف : انتوا شايفين كده طيب انا هروح مع اني كان نفسي اشوف الملك واهنيه بعيد ميلاده

(
يدخل الملك في الحوار)

الملك
: استني يا يوسف

يوسف : في ايه

الملك: متمشيش خليك

يوسف : ازاي وانا مش معايا حاجه اقدمها للملك

الملك : الملك كفايه عليه انه يعرف حد في طيبتك وفي حبك وفي عطائك ده

ماهر : ياعم انتا مالك انتا

عزيز : وبعدين انتا ايه اللي عرفك ان الملك مش هيزعل منه

الملك: وانتوا بقي اللي تعرفوا الملك

مراد : اه طبعا ده احنا جايبن ليه هدايا هتخليه يحبنا ويعطينا من ملكه

الملك : للاسف الهدايا اللي انتوا جايبنها دي مش هتعجب الملك خالص

ماهر : ازاي بقي ده احنا جايبين اغلي الهدايا في العالم

الملك : انتا يا اللي جبت اغلي توب حرير في العالم وانتا اللي جبت اغلي عطر في العالم وانتا اللي جبت اغلي لؤلؤه والتي لا تقدر بثمن اقدر اقولكم ان كله هداياكم الغاليه دي رخيصه جدا في عين الملك

ماهر: نعم انتا ازاي تقول كده

عزيز : ايوة انتا باي صفه تحكم حكمك ده علينا وعلي هداينا

ومراد : وانتا اصلا عرفت هدايا منين

الملك : انا كنت هنا وسمعت كلامك كله واقدر اقولكم انه يوسف اللي مش عاجبكم واللي اتريقتم علي هديته قدم احسن هديه ممكن تتقدم للملك

ماهر : انتا مين يا راجل انتا وايه عرفك بالملك

الوزير : انتا ازاي يا ولد انتا تزعق في جلاله الملك

عزيز: ايه جلاله الملك انتا جلاله الملك

الملك : ايوة انا (يخلع عبائه ويظهر نفسه )

مراد
: جلاله الملك سامحنا

الملك : اسماحكم علي ايه علي يوسف اللي اتريقتوا علي هديته ولا علي البنت الصغيره اللي رفضتوا تدوها فلوس تشتري اكل او تشتري هدوم علشان تاكل وتتغطي

يوسف : جلاله الملك ياريت تسامحني علي اني مجبتش هديه لجلالتك

الملك : ازاي يا يوسف انتا قدمتلي افضل واغلي هديه موجوده

يوسف: ازاي يا جلاله الملك؟

الملك : لما كان مش معاك الا فطيره عملتها من اخر حبه دقيق عندك علشان تديهاني كهديه ولما طلبت البنت الصغيره اكل تاكل اديتها الفطيره واكمان اديتها العبايه بتاعتك واللي معندكش غيرها كل ده خلاك تكون في نظري احسنهم كلهم لانك قدمت فعلا الهديه اللي لا تقدر باي تمن