أبانا الذي في السموات

sama smsma · رقم المشاركة : ( 1 ) 03 - 06 - 2012, 10:38 PM

أبانا الذي في السموات

كتير اوي بنقول ابانا الذي في السموات
اللي بيقولها يوم الامتحان الصبح
واللي بيقولها قبل مايسوق
واللي بيعتبرها اصلا هي صلاته كلها.. يعني علاقتة بربنا كلها ابانا الذي قبل ماينام
وكأنها فرض بنعمله او حاجة (سوري في اللفظ) بنضحك بيها على ربنا عشان يقف معانا في الامتحانات ويحفظنا من خطر السواقة وزحمة الطريق

تخيلت مرة لو انا بقول ابانا الذي وربنا رد عليا
اة
مانا بقولهالو هو
وبنادية في الأول: ابانا الذي
كتبت حوار كدة تخيلتة من خلال ابانا الذي بين (فلان) اللي بيقول ابانا الذي وبين الله

في يوم بعد عناء مذاكرة طويل قبل الإمتحانات وبعد ما دقت الساعة 12 ص وجه وقت النوم إفتكر (س) ابونا وهو بيقولوا صلي في الكنيسة ولأن تقريبا في بيتهم الوالد والوالدة معودينوا على ان الصلاة هي ابانا الذي فقال هصلي ابانا الذي عشان ربنا يقف معايا بكرة في الامتحان وبدأ

فلان: أبانا الذي في السموات

فجأة سمع صوت

الله: نعم

قام اخونا (فلان) قفل الشبابيك وبص حوالية ملقاش حد ورجع تاني

فلان: أبانا الذي في السموات

نفس الصوت إتكرر تاني

الله: أيوة.. سامعك

بصوت مرتجف اتكلم فلان: مين اللي في الاوضة.. مين اللي بيرد عليا؟

الله: مش انت بتقول ابانا الذي في السموات؟

فلان: اة

الله: طيب انا ابوك اللي في السماوات وسامعك اتفضل اتكلم

فلان في ذهول وخوف وحيرة وبصوت متردد وضعيف وخافت

فلان: ليتقدس أسمك

الله: عارف يعني اية ليتقدس اسمك؟

فلان في خوف: لا

الله: امال بتقولها لية؟

فلان: اهي جملة كدة بقولها في الصلاة بس معرفش معناها

الله: طيب هسيبك تكمل صلاة.. اتفضل

فلان في كسوف: ليأتي ملكوتك

الله: طيب يعني اية ليأتي ملكوتك؟

فلان: معرفش برضو.. هي جملة كدة بنقولها في الصلاة بس أكيد يعني مش معناها حاجة وحشة

الله: جميل.. اتفضل كمل

فلان في إعادة من الأول لأبانا الذي كلها بصوت خافت لأنة مش حافظها

فلان: لتكن مشيئتك كما في السماء كذلك على الأرض

الله: يعني انت حقيقي عايز مشيئتي هي اللي تكون؟

فلان: أكيد يا رب

الله: امال لية مش بتعمل الحاجات اللي تنفذ بيها مشيئتي.. ولية دايما بتطلب وبتلح على اللي انا مش عايزة ليك.. ولما اخليك تجرب واديهولك ترجع تقول لية يارب كدة؟

فلان: معرفش بأة.. ممكن أكمل صلاة عشان الامتحان؟

الله: طبعا.. اتفضل

فلان: خبزنا كفافنا اعطنا اليوم

الله: مكتفي باللي هديهولك؟

فلان: اة.. انا لما بعترض يعني مبيكونش قصدي حاجة غير اني بس تتوفرلي الظروف الكويسة عشان اعرف اقرب منك يا رب

الله: اة.. طيب اتفضل كمل

فلان: اكمل ازاي بس.. اللي جاية دي مش هتعديهالي بالساهل

الله: لية ؟ قولها ونشوف

فلان في خجل شديد وصوت متقطع

فلان: وإغفر لنا ذنوبنا كما نغفر نحن أيضا للمذنبين إلينا

الله: انا مش هعلق عليها.. بس هل انت شايف ان اللي بتقولو انت بتعملوا؟

فلان: ازاي يعني؟

الله: يعني هل انت فعلا بتغفر للي بيسيئوا ليك وعايزني اغفرلك؟

فلان: في الحقيقة لا.. انا حتى انهاردة اتخانقت مع صاحبي عشان شتمني

الله: طيب امال بتقولها لية؟

فلان: زي ماقولتلك يارب هي اكيد حاجة مش غلط او مش عيب اني اقولها

الله: هو انت بتقول الحاجات اللي مش عيب ولا الحاجات اللي انت مصدقها وحاسسها؟

فلان: مش عارف.. بس احنا كلنا اتعودنا عالكلام دة ولازم اقوله عشان تقف معايا

الله: عموما اتفضل كمل عشان معطلكش

فلان: حاضر.. ولا تدخلنا في تجربة لكن نجنا من الشرير

الله: فاكر اخر خطية عملتها؟

فلان في خجل شديد

فلان: اة فاكر

الله: طيب هل انا اللي ادخلتك في التجربة دي؟

فلان: لا.. دة انا حتى اللي مرضتش ابطل مع اني كنت سامع حاجة بتقولي غلط

الله: طيب امال ازاي بأة بتقول لا تدخلني في تجربة وانت اللي بتروح للتجربة برجليك

فلان: برضو مش عارف

الله: طيب هتقول حاجة تاني؟

فلان: اة اللي جاي عادي
لان لك الملك والقوة والمجد الي الأبد امين .

الله: طيب اسيبك تنام؟

فلان: لا يارب.. انا حاسس ان انا مش راضي عن نفسي.. طول النهار في خطية ووجع وألم وبعد عنك وإنكار ليك وأجي بليل اصلي ابانا الذي اللي انا طلعت مش فاهمها دي ومش بنفذها عشان بس تقف معايا
وكأني يارب بعرفك عشان مصلحتي

الله: جميل انك تقول الكلام دة.. تعرف ان اللي انت قولته دة صلاة؟

فلان: صلاة ازاي؟ انا متكلمتش بالفصحى! ولا حتى قريت اي مزمور ولا قولت ابانا الذي !

الله: هو لازم عشان تصلي وتكلمني تكون حافظ مزمور او تكون بتتكلم بالفصحى؟ مانا بعرف اتكلم عامية وبفهمها زيك بالظبط

فلان: اسف يارب مقصدتش.. يوووه.. ماحنا متعودين على كدة لازم عشان اصلي اقف يارب قدامك بكل خشوع واقرى مزمور واتكلم بالفصحى

الله: طيب تسمحلي افهمك حاجة عشان اسيبك تنام؟

فلان: اكيد يارب.. ياريت لو افضل معاك كدة للصبح

الله: الصلاة يا ابني هي اساس علاقتي بيك.. هل ينفع يكون ليك علاقة بحد من غير ماتكون بتكلمه باللي فـي قلبك؟

فلان: اكيد لا

الله: هي دي الصلاة.. كل الكلام اللي في قلبك تقولوا.. من غير تزويق ولا تشكيل.. انا عارفك وبحبك زي مانت.. انا بحبك قبل ماتوجد، طلع كل اللي في قلبك وقول عيوبك من غير فصحى ومن غير كلام انت مش فاهمو ولا بتعملوا خليك صريح معايا وانا بحبك مهما كنت بتغلط
ولأنك مش هتقدر تغير نفسك من غيري لازم تقولي على اللي بيتعبك وبيدايقك عشان اغيرك
انت ابني وانا بيصعب عليا اشوف اولادي في الخطية كدة ولما بييجوا يكلموني يغيروا نفسهم ويظهروا بصورة تانية

فلان: تعرف يارب اني ارتحت بالكلام معاك .

الله: وهي دي الصلاة عايزك بس تفتحلي قلبك

فلان: حاضر يارب.. صدقني من هنا ورايح مش هاقول غير اللي فـي قلبي

الله: طيب اسيبك تنام بأة عشان الإمتحان ومتنساش انت تعبت واجتهدت وانا هقف معاك بكرة

فلان: شكرا يارب.. تصبح على خير

ــــــ

ياريت يا جماعه ناخد بالنا اوي من صلاتنا ونتخيل كدة لو ربنا رد علينا واحنا بنكلمو
عشان نعرف احنا بنقول اية وهل بننفذ اللي بنقولو ولا لأ
ونفتح قلبنا قدام ربنا ونقولو عيوبنا ونطلب بجد تغييرها بالقرب منه

مكتوب
وحينما تصلون لا تكرروا الكلام باطلا كالأمم فانهم يظنون انه بكثرة كلامهم يستجاب لهم. متى إصحاح 6 آية 7. متى 6: 7

ياريت منكررش كلام احنا مش حافظين معناه
بالنسبة للأخوة المعترضين
انا مبقولش اننا منقولش ابانا الذي او منقراش مزامير
بالعكس
انا بقول نفهم ابانا الذي يعني اية
ونفهم المزمور بيتكلم عن اية
عشان نقولو بروح مش بحفظ قدام الله

ــــ

سلام المسيح