كنبة بلسان زالف (٢)

[روشا الفرفوشه]

مقالة جديدة لــ اسعاد يونس "كنبة بلسان زالف (٢)"

كنبة بلسان زالف (٢)



١/ ٦/ ٢٠١٢

بقلم إسعاد يونس

■ مساء الخير يا حيلة الوالدة.. إزيك ياختى؟؟.. حاتنتخبى مين يا رايقة؟؟
■ أاااهلا الست زيزى.. فينك يا ام لسان زالف؟؟.. والنبى وحشتينى ووحشنى زنِّك وصداعك ونقح كلامك.. وازاى الكنبة على حسك يا غالية؟؟..
■ سايقة عليكى النبى ما تستخبى ورا النقوزة انتى روخرة.. حاتنتخبى مين خلصينى المحشى عالنار.. لا يشيط زى أيامنا السودة اللى احنا عايشينها دى..
■ ده متوقف على الشتيمة.. مزاجك مايل لأنهى شتيمة النهارده.. حاتفردى عليا تنية لسانك فى أنهى اتجاه؟؟.. عشان أظبط نفسى بس..
■ نهارك اسود وملبّخ ومسبّخ سباخ حيوانى من ذوات الأربع.. ياكش حاتنتخبى مرسى.. إنتى عارفة يعنى إيه مرسى يا واعية يا تربية المدارس الأجنبية يا ام لسان معووج بالانجليزى يا ليبرالية يا متمدنة؟؟.. مرسى يعنى المرشد.. مرسى يعنى الشاطر.. مرسى يعنى كل اللى بنشوفهم فى التليفزيون بيطلعوا يطصونا كلام م اللى يعكنن ويسود الدنيا ويهببها بهباب الفرن.. مرسى يعنى وزارتك حايبقى بيديرها البلتاجى والعريان وبركة وصفوت حجازى وصبحى صالح والزمر وعبدالماجد .. مرسى يعنى امك ماكانتش لابسة حجاب انما انتى حاتلبسى النقاب انتى والبت بنتك ام اربع سنين دى.. مرسى يعنى لا فيه سياحة ولا اقتصاد ولا أكل عيش ولا نيلة.. مرسى يعنى تتعلقى من حواجبك بسبب شغلتك وتبطليها خالص وتقعدى تكتبى مذكراتك اللى حاتتقطّع قبل ما توصل للمطبعة.. مرسى يعنى مفيش فن ولا إبداع ولا نيلة.. مرسى يعنى انشقاق فى الداخلية والحربية والأجهزة الأمنية وتصفية حسابات.. مرسى يعنى الأزهر باظ والقضاء اتدبح تاني.. مرسى يعنى ميليشيات بتتسلح فى الخفاء وبتستقوى تحسبا لأى انقلابات والا محاولات إقصاء والا غيره.. مرسى يعنى تتحولى لطائر ذى خلفية زعنفية الشكل.. مرسى يعنى قناة الناس تبقى هى مصدر أخبارك وفنك وإعلامك وبرامجك وتوك شوهاتك وكله.. يعنى خلاصة القول انتخبوا مرسى والشعب كله حايتطاهر مش الإناث بس.. مش بتقولوا عليه الاستبن؟؟.. دانتوا حاتتنفخوا هوا الاربع عجلات مع بعض.. اللى ينتخب الإخوان يبقى باع البلد للخلافة.. ماترجعوش تعيطوا بقى.. جتكوا داهية ف غباءكوا..
■ ليه ده الراجل طلع مع فودة وفتح حصالة الوعود ووزع منها اكتر م الزيت والسكر.. محدش طلب منه تعهدات الا وقال حاضر من عنيا.. يعمل إيه تانى؟؟
■ إييييييييييهييييييييييه.. عادتهم والا حايشتروها.. اللى بيوعد يمضى ويبصم ويوقع يا عنيا.. فنجرة البق دى خلااااااااااااص..
■ بصى.. قصر الكلام وبعد خطبة العرش اللى قلتيها دى.. مش حانتخب شفيق.. لا ضميرى ولا قلبى ولا مخى سامحينلي.. مش حاقبل اعلّم صح على حاجة شايفاها غلط.. كنا اتنيلنا عملنا ثورة ليه بقى؟؟.. ما كنا اتهببنا قبلنا مناورة أكمل المدة وابقى اتنحى ف سبتمبر اللى قالها المخلوع فى خطابه التانى.. كنا وفرنا كوووول وجع القلب ده.. داحنا اتنحل وبرنا واتخدل دراعنا ووشوشنا هرهرت زى الكلاب البولدوج.. شفشق يعنى نظام قديم.. شفشق يعنى الفلول.. شفشق يعنى حانتقفّش كلنا بتوع الثورة ويتنفذ فينا نظام بشار.. حايخلينا نغنى طب كنت رحت ليه لما انت راجع راجع.. شفشق يعنى نهاية الثورة والربيع العربى..
■ اسم الله عالربيع العربي.. لأ مربعن قوى بالصلا عالمصطفى.. ده ربعن فين ياختى ده؟؟.. بلد إيه دى اللى زهزهت ونورت بالربيع اللى بتقولى عليه؟؟.. ده حتى تونس ابتدت تقول جاى م الإسلاميين اللى نازلين فيها ولايع وتفجيرات.. بيقاوموا مين ياختى دول؟؟.. الشعب اللى جابهم؟؟.. ده حتى الإجابة مابقتش تونس..
■ آه يا رجعية يا متعفنة يا تقليدية يابتاعة الاستقرار.. عالعموم حطى على مراوحك لوح تلج.. انا لا حانتخب ده ولا ده.. أنا حاقاطع.. أو حابطل صوتى..
■ أيوه ابطلى ياختى.. ابطلى ابطلوا عليكى الحق فى الحياة.. لا ذكاوة ذكاوة يعنى.. ابطلى عشان تجيبوا الإخوان.. ماهانا عارفة اللى فيها.. قال العيال بتدكن قال.. حايبطلوا بقى.. ويلبدوا ف الدرة عشان يسقطوا اللى جاى أول ما يحلف اليمين.. واللى حاييجى إن كان ده والا ده مش عارف بقى الخُطة.. اهبل وريالته نازلة.. طب حاسألك سؤال.. إينهين أسهل فى الإسقاط.. شفيق والا مرسى؟؟..
■ ههه؟؟..
■ أيوه اذبهلى بقى واحولى واعمليلى فيها الهبلة ام بدوي..
■ مرسى طبعا.. حانقوله انزل يا مرسى.. حاينزل على طول..
■ لولولولويى ى ى ى .. آه حاينزل.. حاينزل طبعا.. حاينزل يتدلع يملا القلل.. بتهجصى انتى والا عايزة تجيبيلى سنطة وقراع؟؟.. ينزل فين يامه؟؟.. بنقول ميليشيات وتسليح شغال بقاله ستاشر شهر بالأسلحة التقيلة.. دول عاملين جيش موازى يا أكسلانساية.. والدانة اللى ما اتفقعتوهاش م الجيش فى الاعتصامات حاتعوضوها صواريخ عابرة للقارات تفرتك أبوكوا لو خالفتوا الولاة وشرع الله..
■ يامممه.. طب سؤال عابر يا زيزى بمناسبة الصواريخ العابرة.. انتى نزلت الانتخابات الأولانية؟؟
■ نيهيييييين؟؟
■ اللى صوتنا فيها لحمدين وعمرو موسى وكده.. نيهيين إيه؟؟
■ إحم.. لأ ما نزلتش.. الميه كات مقطوعة وماعرفتش أستحمى عشان انزل..
■ وتستحمى ليه؟؟.. لو كات المية بتشيل العفانة ماكانوش اخترعوا البوطاس.. بقى فاتحة زمارتك وفاردة جاعورتك وانا مستحملاكى م الصبح بدعوى التحضر وتقوليلى مانزلتيش؟؟.. سبعة وعشرين مليون فاشل زيك ما نزلوش.. ولسه بتتكلموا؟؟.. لسه ليكوا صوت وحس وزمارة.. دانتوا تخرسوا خالص.. مليون واحد منكم بس كان فرق مع حمدين مثلا.. قعدتوا واتبططتوا زى الحمار الغرقان المقلوب على ضهره.. وليكوا عين؟؟.. أنا نازلة جايالك.. دانا حاطلع عين ابو اللى خلفوا اللى فكروا اللى جه على بالهم انهم يخلفوكي.. دانتى حاتشوفى منى التسييح اللى ماشافتوش اسمها إيه لما اتقفشت بتعمل اسمه ايه مع المخفي.. دانا حااااااااا وحااااااااا وحاااااااااااا.
■ وهكذا يدور الحوار البنّاء فى وطننا الديمقراطى المتحضر هذه الأيام.

المصرى اليوم