|
 |
 |
 |
|
|
|
رقم المشاركة : ( 1 )
01 - 08 - 2013, 08:29 PM
|
|||||||||||
|
|||||||||||
|
اولا تنظيمك لجهازك وترتيبه من الاول هيسهل عليكى كتير اوى لما تروحى تفرشى هنيدأ من اول ما تنزلى حاجتك من البيت لغايه ماتوصل بيتك وتطلعيهم وتفرشيهم وتقفلى شقتك وتروحى عشان تستعدى لليله العمر يا احلى عروسه نبدأ بسم الله اولا الجزء الاول شقتك طبعا مش مستحب خالص انك تودى العفش والجهاز فى يوم واحد هتتعبى جدا انتى وكل اللى معاكى المفروض العفش بيروح الاول قبل العفش مايروح بيومين ولا حاجه تروح الشقه تظبطيها يعنى ايه لما النقاش بيعمل الشقه بتقع منه شويه حاجات ع السيراميك وبيكون فى لسه بواقى بويه وبستيلات وعلب وكياس وورق وكلام من ده هتروح تلمى كل ده وتنضفى الارضيه كويس والحمام كمان بتكونى ماسحه ارضيه اوضه النوم كويس وتنشفيها كويس جدا علشان لمايجو ينصبو السرير والدولاب مش هتعرفى تنضفى زى ماتكون الاوضه فاضيه بعد ما ينصبو الاوضه هتيجى زى الشاطره تمسحى الارضيه تانى علشان الناس اللى هيدخلو اكيد شوزاتهم مش نضيفه تمام كده هتلمى بقى بقيت عفشك فى فى ركن لغايه ماتظبطى اوضه النوم والمطبخ والنيش نرجع بقى لجهازك اللى هتنزليه من البيت لشقتك ان شاء الله اليوم اللى هتنزلى فيه الجهاز تكونى محضره حاجتك قبلها بيوم تصحى الصبح تشرب حاجه تفوقك وياحبذا لو فنجان قهوه بمعلقتين لبن ومعاه قطعتين شيكولاته يروقو مزاجك ويفوقوكى طول اليوم زى ما تفقنا فى الموضوع اللى فات حاجتك هتنظميها كل حاجه فى ركن يعنى لو هتنجدى هيبقى التنجيد فى ركن ومعاه المفروشات البطاطين المفارش السجاد والكراتين التقيله بتاعت المطبخ فى ركن زى الصينى الاركوبال الحلل تمام وشنط هدومك فى ركن وحاجتك الشخصيه دى تخليها معاكى فى العربيه اللى هتروحى فيها علشان حاجات رفيعه ممكن تتنسى او تقع من العربيه لاقدر الله او تتسرق والكراتين اللى فيها الزجاج الكاسات كوبايات تحف دى فى ركن وتقولى لخطيبك او باباكى او اخوكى اى حد هيكون معاكى فى البيت ان الركن ده فيه حاجات تتكسر علشان اللى يشيل يبقى عارف واكيد هيكون فى ناس غريبه اللى معاكى هيقوله يخلى باله مالكيش دعوه انتى خالص انتى تقفى بس تشرفى ع الحاجات وتعدى الحاجه قبل ماتنزل وتكتبى فى الكراسه بتاعتنا مثـــــــــــــــــال عدد 2 كرتونه رفايع مطبخ عدد 3كرتونه كاسات عدد2 بطانيه عدد 4 مخدات عدد 5سجادات والشنط كله كله تكتبيه واللى ينزل قدامك تعلمى عليه وتعملى الكلام ده فى جدول وتقسميه 3 خانات الاولى هتكتبى فيها الاعداد والتانيه هتعلمى فيها ع الحاجات اللى نازله قدامك والتالته تعلمى فيها على الحاجات لما تطلع بيتك ان شاء الله تمام كده حاجتك اتحط فى العربيات واتفستئت هتكونى محضره شنطه كده فيها صابون سايل وجلانس (ملمع الزجاج) كام فوطه تنظيف وكلور وفلاش للحمام هيخلى حمامك فله وتاخدى كمان مكنسه ومساحه يكونو اى كلام علشان مش تستخدمى بتوعك وتبوظيهم من اولها وورق جرايد للزجاج وممكن تفرشوه تاكل عليه علشان متبوظيش حاجه ولو احتاجتى حاجه تانى ابقى ابعتى هاتيها من حد حواليكى تمام تمام تاخدى بعضك انتى بقى وشنطتك وتنزلى ومعاكى حاجتك الشخصيه اللى هتحطيها معاكى فى العربيه اللى هتروحى فيها طيب سؤال مهم اخد مين معايا وانا رايحه؟؟؟ سؤال يطرح نفسه نجاوب ع السؤال ده بقى عقبال ما جهازك يوصل بالسلامه شقتك بدل ما نقعد مستنين وساكتين كده هتاخدى يا ست الحلوين معاكى مامتك واختك بس ! اه بس انتى مش طالع رحله هتقوليلى طيب حد من صحابى هقولك نو طيب ليه ؟ بصى ياقمر صحابك دول هيكونو حاجه من 3 يا سينجل يا مخطوبه يا متجوزه نبدا بالاولى لو سينجل وانتى خلاص ربنا كرمك وفرحك بعد يومين ممكن هى تكون زعلانه من جواها انها لسه حتى متخطبتش وصحبتها هتتجوز خلاص ممكن متبينلكيش بس انتى ليه تأذى مشاعر صحبتك غصب عنك طيب لو مخطوبه ممكن تكون مخطوبه قبلك ولسه ظروفها مش مسعدها وهتتجوز بعدك اكيد بردو هتدايق وتزعل بينها وبين نفسها طيب لو متجوزه ممكن تكون ظروفها بردو مش مساعداها ومتكونش جابت حاجات زيك وسعتها بردو هتدايق وممكن يكون معاها اطفال يلخموكم فى الفرش انامش بقول صحابك وحشين ولا هيبصولك بالعكس لو نفوسهم حلوه هيفرحولك بس هيزعلو على حالهم بينهم وبين نفسهم وانتى لو بتحبى صحابك فعلا مش هترضى تأذيهم صح ولا ايه لكن مامتك واختك منك وعليكى ويفرحولك من قلبهم وهتكون ظروفك من ظروفهم يعنى جهازك هيكون زى جهاز اختك ونفس المستوى ومامتك احب ماعليها تشوفك فى بيتك يعنى هتكون فرحه بس من غير زعل والمهم بقى انك نتى اللى هتفرشى بيتك مثلا مع اختك هتبقى عارفه كل حاجه فين حطاها بايدك انتى وبذوقك انتى واختك ومامتك هيساعدوكى وبردو كل واحده ووجهه نظرها طيب خلصنا من النقطه دى وجهازك وصل بالسلامه اهو هتطلعى شقتك تستنى الحاجات تطلع ومعاكى كراستك بردو وتعلمى على الحاجه اللى طلعت ماشى علشان متنسيش حاجه ومعاكى اختك ترص معاكى الحاجات اللى تطلع علشان الدنيا مش تتركب تعملى بردو اركان زى ما كنتى عامله فى بيت باباكى اللى يطلع تحطيه فى الركن الخاص بيه مامتك مثلا هتكون واقفه تحت تشرف ع الحاجه علشان الناس هتنزل الحاجات كلها فى داخله العماره علشان العربيه تمشى وبعدين يطلعو الحاجه على مهلهم مامتك هتقف بدرو تاخد بالها من الحاجه مع طبعا حد من لارجاله باباكى اخوكى وخطيبك اكيد بس لازم واحده معاهم علشان تخلى بالها من الحاجه الحاجات طلعت وكله تمام وعلمتى عليهم كلهم ومافيش حاجه ناقصه الحمدلله هتبعتو تجيبو غدا علشان الناس اللى تعبت دى وعلشان انتو تتغدو كمان وتشربو حاجه ساقعه فى الحر ده وهاتوها كنزات او عصاير علب علشان متستخدميش كوبياتك والغدا ياريت يكون خفيف يعنى حواوشى مثلا سندوتشات كده وفى ناس بتحب تجيب سمك مشوى علشان بيقولو السمك المشو بيعبر عن الرزق يعنى مش مقتنعه اوى بس كل واحد ودماغه يعنى مشكلته هتبقى زفاره ومرمطه يعنى وشوك وكلام من ده فابلاش احين خلوها مره تانيه تكونو ولوحدكم مافيش الناس دى كلها دلوقتى قدامك حاجه من اتنين يا تقعدى فى الشقه تخلصى جزء منها وتروحى لو بيتك قريب او تباتى فى الشقه انتى ومامتك واختك وباباكى او اخوكى وتكملو تانى يوم طيب قررتو هتعلمو ايه نبدأ الجد بقى يلا بينا مستعدين 1 2 3 هوب هتخلى كده زى الشطار تغيرى هدومك تلبسى حاجه قطن وبنطلون مريح وشب شب زنوبه ابو ورده ده عارفينه وتشمرى وتسمى وتستعينى وتتوكلى على الله وتاخدى اختك فى ايدك وتوزعو الحاجات اللى كلعت دى ع الاوض حاجات المطبخ ع المطبخ لو مطبخ مش كبير هتحطيهم قدام المطبخ والتنجيد سبيه بره وتاخدى شنط هدومك وحاجتك الشخصيه ومفروشاتك وباطيبنك وكوفيرتاتك على اوضه نومك وابدا بقى يامعلم الجهاد الصح شوفى ياقطه بما انك هتتجوز فى الصيف يبقى من سكات كده حاجه الشتوى تتشال بعيد عن ايدك عنك اوضه اطفال يبقى خير وبركه تشيلى فيها اى حاجه خاصه بالشتا معندكيش مش مهم تحت السرير هتشيلى البطاطين والتقايل دى بلاش رصه البطاطين والعرض اللى بيتعمل فوق الدولاب وجوه الدولاب منظر بجد يتعب الاعصاب الموضوع مش بالكتره لاده بالشياكه والبساطه والذوق العالى تمام كده وهدومك الشتوى يا تحت السرير برود ومتخافيش مش هيلحق يحصلهم حاجه كام شهر والشتا يجى وانا بفضل الطريقه دى علشان قولنا قبل كده لازم الهدوم تتهوى بس ده لما كنتى لسه بتشرى ومتعرفيش هتتجوزى امتى او قدامك وقت كبير اكتر من سنه اوتشليهم فى اعلى رف فيك يادولاب بشنطتهم كده او تشليهم فى ارضيه الدولاب نيجى بقى لبقيت الاوضه ايه هى اجزاء الاوضه ونمسكها حته حته السرير اتنين كومودينو او واحد شوفينيره او عسكرى والدولاب والتسريحه اولا الدولاب هتمسحى الدولاب كويس بفوطه نظيفه من جوه ومن بره وتفرشى المفارش فى كل الرفوف وتاخدى بقى درفه درفه الدرفه الاولى هتعلقى فيها الكام طقم الخروج بتاعك والباقى اللانجيرى وحاولى ترتبيهم الطويل ورا والقصير قدام وراعى بردو تناسق الالوان بالنسبه للمكوى يا اما تكويهم وعليهم حته قماش اسمها فودره تقريبا يا اما فى فتوكه قالى انك تبخى عليهم مايه وتعلقيهم على شمعات قدام مروحه هتفردو او لو عندك مكواه بخار علقيهم بدرو على شماعه من بعيد شويه بخى البخار السخن ده عليهم ان شاء الله يبقو تمام طيب الرف اللى فوق بقى فى الدرفه بتاعتك هتحطى فيه الشنط الشوزات بتاعت السهرات هتحتفظى بعلبتها وتلفيها زى الهدايا وتحطيها فوق تلفيها بتل وشرايط ستان اللى اتكلمنا عليها الموضوع اللى فات الدرفه اللى فى النص بقى غالبا بتكون اربع ارفف الرف الاول فوق خالص لو عالى عليكى هتحطى فيه الكوفيرتات والمفارش الصيفى وبردو احسن تطبيقه اللى بتكون الحاجه متطبقه بيها جواه الشنطه بتاعتها ولو عايزنها انزلهالكم مع تطبيق الهدوم الرف اللى تحته هتطبقى فيه هدوم البيت الصيفى زى المحلات يعنى البنطلون او الشورت جوه التيشرت هنزلكم الطريقه بردو علشان تكون اوضح وهنزل طريقه التطبيق فى مشاركه تانيه وماتنسيش تناسق الالوان بردو الرف اللى تحته الفوط ورااااااااعى تناسق الالوان وفى تطبيقات كتير اوى ع النت لو عايزنها انزلكم الطريقه الرف اللى تحته هتحطى الملايات واطقم السرير وبردو احن تطبيقه اللى بتكون جايه بيها فى العلبه بتاعتها طيب الرف الاول لو مش عالى هتبدلى بقى وتخلى المفارش فى الرف اللى تحت خالص والكلايات واطقم السرير فوق تمام كده الدرفه التالته بتاعتك جوزك هتعلقى البنطلونات والقمصان والبدل لو بسيتخدمها والاحذيه تحت خالص فى ارضيه الدولاب الرف اللى فوق هتطبقى فيه التيشيرتات بتاعت الخروج فى جمب و الجمب التانى هدوم البيت تمام كده خلصنا الدولاب لا لســــــــــــــه يتبــــــــــــع 
|
|
01 - 08 - 2013, 08:40 PM
|
رقم المشاركة : ( 2 ) | ||||
|
..::| VIP |::..
|
رد: تنظيم وفرش شقة العروسة
متنسيش تعطير الدولاب هتجيبى اكياس اورجانزل او حته تل كبيره وتتنيها على اتنين وتحطى فيها ايه بقى دى اختيارات ممكن قرفه خشب او قرنفل مجروش يعنى مكسر حبه بسيطه او بخور عيدان مكسور على 3 مثلا او زيت عطرى فى قطن وتحطى مع كل حاجه من دى شويه ورد مجفف وتقلى الكيس الاوراجنزا او التل وبشريطه ستان حسب لون التل لون يمشى معاه وحطيهم وسط الهدوم والحاجه واقفلى الدولاب ومش تفتحيه فتره ساعيتن ولا حاجه علشان الريحه تملى الدولاب ندخل ع الشوفينيره او العسكرى هتحطى فيها ايه بقى ياست البنات هتحطى فيها ملابس الداخليه انتى وزوجك ملابس زوجك الداخليه بردو هتطبقيها تطبيقه كويسه طيب هنحط ايه ع الشوفينيره من فوق ممكن فازه رقيقه صغيره مفرش هادى شمعدان رقيق اى حاجه بسيطه تمام كده التسريحه بقى حبيبتى حبيبتى حبيبتى التسريحه هى عنوان البساطه بلااااااااااااااااااااااااااااااااااش فاتريينه اى حاجه ب2.5 دى انا شوفت تسريحه عند واحده من كتر اللى عليها مقدرتش اسكت عامله التسريحه دى جبلين وبين جسر يعنى ايه الجمب اليمين حاجات زوجها والشمال حاجتها حاطه كل البرفانات اللى جيبها والميكب والكريمات واللوشانات ومزيل العرق ده اللى نرفزنى حاطه حوالى 5 ليها و5 لجوزها طيب هو مين اللى هيستخدم 5 مزيل عرق مع بعض واحد هيخلص هستخدم التانى وانتهى لكن ليه كل ده الخلاصه خلى تسريحتك دليل على زوقك هتستخدمى ايه 3 برفانات حطيهم واحد مثلا تقيل باليل وواحد منعش وخفيف الصبح وواحد هادى بعد الظهر وخلاص عندك منهم اكتر من واحده هتحطيهم فى البوكسات بتاعت الهدايا وتشليهم فى درفه التسريحه وترصى ال3 بارفانات بطريقه شيك وايه تانى كوبايه زجاج وحطى فيها شويه كور فل او خرز او ورق ملون بتاع الهدايا وحطى فيها اقلام العين والحكل وواحده تانيه فيها الفرش ومتفقين طبعا اننا مش هنجيب علبه الميك الكبيره يع دى ماشى هتجيب علبه شادو محترمه هتحطيها وواحد اساس جمبها و2روج واتعشت على كده وطبعا حاجه زوجك البرفانات والمزيل وخلاص بردو هتقوليلى طيب لسه فى حاجات كتير اللى بتستخدميه كتير هتحطى فى اول درج واللى بتستخدميه كل فتره طيب الكريمات واللوشانات والكلام ده كله اللى بستخدميه قبل النوم يبقى فى الردفه تحت او فى الكومودينو جمبك والامشاط والتوك والبنس فى اول درج فوق وحاولى تقسمى الادراج باى طريقه علشان متبقاش منعكشه الاكسسورات بردو فى درج والسلاسل هتدقى مسمارين صغننين فى درفه دولابك تعلقيهم عليها علشان ميتكعبلوش فى بعض انا عامله كده فى دولابى حاليا اما بقى لو دولابك المرايه فيه جرار وبتتفتح يبقى انتى كده فى السليم وحاجات زوجك بردو اللى مش بيستعملها كتير فى بوكس وع الدرفه تحت طيب الحاجات اللى بنستخدمها كتير هتاخديها على الحمام وتجيبى اتنين باسكت وتحطى فى واحد حاجتك وواحد حاجه زوجك ومتنسيش تزينيهم باى حاجه شرايط بقى وروق ملون ورد مجفف انتى وزوقك تمام كده الكومودينو بقى هتحطى فالدرج وايبس مناديل معطره كريم للايدين وليب بالم واى حاجه بتستخدميها قبل النوم ومناديل ورق ولبان وبنبونى وشيكولاته وفى الدرج التانى او الدرفه هتحطى فوط شخصيه واى حاجه تانيه باقيه عندك من التسريحه او الملابس الداخليه الكوميدينو التانى بتاع زوجك هتحطى بردو فى الدرج الاول مناديل ورق ومناديل معطره ولبان ونعناع وبنبونى وهو يحط اى حاجه بردو بيستخدمها والدرفه تحت او الدرج التانى ملابس داخليه اضافيه واى حاجه باقى من حاجته اللى مش بيستخدمها كتير ماكينه حلاقه مثلا لو ملهاش مكان فى الحمام واى حاجه خاصه بيه |
||||
|
|
|
01 - 08 - 2013, 08:53 PM
|
رقم المشاركة : ( 3 ) | ||||
|
..::| VIP |::..
|
رد: تنظيم وفرش شقة العروسة
طيب كده خلصنا ترتيب اوضه النوم هنقفلها مؤقتا يعنى ايه يعنى لو منجده متفرديش النراتب سبيها لكن لو جايبه جاهز كده كده هتتحط المرتبه مش هتتشال تانى هتحطى فى الاوضه ايه تانى هتحطى السجاد بتاعها من غير متفرشيه ولو جايبه تحف او فازات شمعدانات هتحطيبه بردو وتخرجى وتقفلى الاوضه وكده خلصنا المهم منها هنروح جرى فين .. .. .. ع المطبخ اه بس مش عشان نرتبه هتروح تجيبى حاجه تاكليها وشويه عصير علشان متهبطيش وتصدعى وترتاحى شويه وتقومى بقى تشمرى وهوب تاخدى غطس فى المطبخ تفرش المفارش وفى نوع مفارش طالع جديد عجبنى اوى اكتر من المشمع الذهبى الفضى ومناسب اوى للمطبخ عامل زى الفل كده هنزلك صورته بردو من مفرغ زى المشمع التانى علشان لو وقع منك حاجه شويه سكر ولا رز فى الدرفه متضطريش تفضى الدرفه كلها علشان تنضفيهم لاهتمسحيهم على طول علشان مش هيكون وقع حاجه تحت المفرش ده  تمام مسحتى الرفوف وحطيتى المفارش وهنزلكم طريقه تثبتى بيها المفرش ده بالسلوتيب من غير مايبان بصى بقى مطبخ كبير او صغير هتحطى فيه الحاجات المهمه اللى هى ايه فى ناس بيجو اطقم حلل كتير جدا تيفال وصاج واستانلس والمونيوم طيب حتحطى فين كل ده اكتر حاجه هتستخدميها التيفال لاغنى عنه حتى لو جايبه 2او3 حلل بس ومقلايه واحده طيب الحلل الباقيه مش لازم كلها تاخديهم من عند مامتك لو احتجتيهم خديهم مره تانيه او لوعندك مكان تخزنيه خزنيهم بس بلاش معرض الاهرام للحلل اللى بيبقى فوق الدولايب طيب الحلل هحطها فين الحلل هتحطيها فى الرفوف اللى تحت وترصيهم جوا بعض علشان مياخدوش مكان طقن الاركوبال او الاركوبيركس اوالصينى لو هتستخدميه مش للضيوف بس هتحطى مثلا طقمين فى المطبخ كل طقم من دول معاه فناجين الشاى والقهوه وبراد هنضحك على بعض لو قلنا بنستخدمهم لان احنا اصلا جايبين طقم قهوه وشاى طيب هنعمل فيهم ايه لو عندك بار شليهم فيه لو النيش فى درج لو كلاسيك بيكون قطعتين شليهم تحت خالص بعيد عن ايدك ونرجع تانى للاطباق اللى هنستخدمها هما 6اطباق كبيره و6صغيرين اللى هما الاطباق المسطحه هتحطى اتنين من ده واتنين من ده فى المطبقيه والباقى ترصيهم فوق بعض فى الدولاب تحت لانك هتكونى انتى وزوجك بس مش معقول هتاكلو فى اكتر من طبقين كل واحد طبق وطبق للحلو طيب الاطباق الغويطه شويه هتحطى مثلا 3 فى المطبقيه ولاباقى تحت السرفيس مش هينفع فى المطبقيه علشان كبير هتضطرى تحطيه تحت البولات بردو اتنين فى المطبقيه والباقى تحت ولو عندك طقم تانى حطيه كله تحت لو عايزه منه طلعيه بلاش تزحمى المطبقيه وبردو بالنسبه للكوبايات واحد ليكى وواحد ليه من كل نوع عندك والكاسات طبيعى مش بتتحط فى المطبقيه بس خلى طقم شيك كده قريب منك ولو عندك درفه زجاج فى المطبخ يبقى حلو اوى حطيه فيها وبردو الباقى فى المطبخ تحت علشان لو جالك ضيوف طيب هنحط ايه فى النيش لما نيجى للنيش هقولكم هنعمل فيه ايه هتقوليلى طيب احنا كده حاطين حاجات بسيطه اوى فى المطبقيه هقولك ده احسن ليكى اصلا قوليلى ليه اقولك ليه لما يكون عندك كوبايتين بس للشاى ومجاين بس للنسكافيه واستعملتيهم واترمو فى الحوض هتيجى تعملى شاى تانى هتلاقى مافيش كوبايه للشاى هتضطرى تغسلى اللى فى الحوض علشان تعملى تانى لكن لو عندك مثلا 6 كوبايات للشاى هتيجى اخر النهار هتلاقيهم فى الحوض كلهم مع كوبايات المايه والعصير فاهمانى وبردو بالنسبه للاطباق لو عايزه زياده هاتى من الدرفه اللى تحت متفقين كده  حاولى بقى ان اكتر حاجتك تكون متعلقه ع الحيطه او متشاله فى الدولاب علشان متعمليش زحمه وكركبه ع الرخامه والحاجات اللى بحوامل كتير ده هتتملى دهون ومش هيبقو حلوين وهتضطرى تنضفيهم كل شويه تمام غالبيه حاجتك علقيها ع الحيطه طقم التوزيع مثلا فوطه المطبخ الحاجات اللى بتستخدميها كتير ويكون شكلها حلو فى نفس الوقت وحاولى تخليها مابين الحوض والبوتاجاز ليه لانك لو واقفه ع البوتاجاز وعايزه معلقه تقلبى بيها هتبقى عايزه قريبه منك بدل ما تفضلى تلفى حوالين نفسك وبردو بالنسبه للحوض لما تغسليهم هتحطيهم على فوطه يتصفو دقيقتين وبعدين تعلقيهم على طول مكانهم طيب صوانى الفرن والتقديم وكل ده بردو فى الدولاب متسبيش حاجه ع الرخامه انا بقولك اهو سيبى الرخامه حاجات بسيطه طقم البهارات مثلا طقم الملاحات الصغير لعبه صغيره كديكور حاجات شيك ومش كتير علشان متزحميش الدنيا وتحسى انك مخنوقه فى المطبخ  طيب امال الدولاب اللى تحت الحوض هنحط فيه ايه لو معندكيش دولاب نضافه فى الحمام هتحطى ادوات النضافه تحت الحوض وتحاولى تخلى الدولاب ده الدرفه بتاعته جامده شويه مش يسهول تتفتح علشان لما ربنا يكرم باطفال ان شاء الله ميفتحوهاش لاقدر الله ويلعبو فى الحاجات دى وكمان متعمليش ادراج فوق بعض جمب البوتاجاز علشان الاطفال ميستخدموهاش سلم ويوصلو للبوتاجاز طيب امال بردو الدواليب اللى فوق بقى هنحط فيها ايه هتحطى فى الدواليب اللى فوق الخزين بتاعك بس مش كلو بردو يعنى كيلو او نص من كل حاجه والباقى فى درج التلاجه علشان المكرونه والرز والدقيق والشعريه والعدس والحاجات دى بتسوس من الكتمه لانك مش هتفضلى فاتحه الدولاب على طول يقى حطى على قد استخدامك كل ما يخلص حطى غيره وبردو الكميات الصغيره دى حاولى على قد ماتقدرى متحطيهاش فى كيس بلاستيك حاولى تجيبى البرطمانات الزجاج تمام وهنحط ايه تانى ممكن باقى الكوبايات اللى مالهاش مكان تحت تمام وفى الادراج هتحطى فوط المطبخ والمعالق ولو مالهمش استاند والرفايع بتاعتك عصاره الليمون مقشره قطاعه مسن ودرج تانى خااااااااص بالاكياس بتاعت الثلاجه ومناديل السفره والورق اللى بيتحط تحت الكوبايات واكياس الباسكت ملحوظه كده ع الماشى خلى عندك درفه خاصه بحاجات الحلويات متحطهاش من البهارات والحاجات دى علشان بتلقط ريحه وطعمها بيتغير هبقى اعملكم بردو موضوع عن الخزين هتحطى مشايه المطبخ وتطلعى بقى ع النيش النيش ندخل ع النيش بصى بقى يا ست البنات انتى وهى وهى وهى النيش ماهو الا قطعه ديكور الديكور اساسه البساطه زى ماقولنا ع التسريحه اننا بنجيب الغالى والرخيص وبنظهر الغالى بس النيش كذلك هنحط فيه الغالى والشيك والقيم بس يعنى مش هنحط طبقين اركوبال على طبقين صينى على طبقين بيركس على شويه كاسات كريستال ومعاهم كوبايات لا واللى يغيظ اوى بقى الورد المجفف حوالين الكاسات بيشلنى المنظر ده وتلاقى كاسات احمر واخضروبروبروق لا والف لا ولاممكن ابدا ده يحصل النيش اولا بلاش يبقى كبير هياخد مكان ع الفاضى ومش هتستغليه خالص يبقى نحطه صغنن كده وكيوت وياريت لو فيه اضائه جواه بتعمل انعكاس حلو اوى طيب هنحط ايه فى النيش جزء من الطقم الصينى يعنى مش كله ولا نصه جزء بسيط منه وطقمين كاسات ساده وطقم ملون الطقم الملون ده يبقى على حسب ايه على حسب تاتش اللون اللى فى الغرفه اللى فيها النيش غالبا بيتحط النيش فى الرسيبشن والرسيبشن بيكون فيه انتريه وستاير والبار لو هتجبيه والسفره طيب لو قلنا هتعملى الريسيبشن اوف وايت وهتختارى معاه لون كمان يبرز جمال الريسيبشن ويحدد ملامحه لو قلنا مثلا هناخد اتركواز انسى انك تعملى حيطه تركواز امال اللون التركواز ده فين التركواز ده هيبقى فى الحاجات دى ع السفر ع البوفيه فى النيش ع الانتريه الستاير ازاى الستاير هتخلى اللون الغالب كافيه ومعاه جزء بسيط تركواز يعنى اقل جزء يبان فى الستاره يكون تركواز وبردو الانتريه هيكون اوف وايت او كافيه وخدديات اوف وايت واتنين بس تركواز النيش الكاسات ساده والصينى ابيض بنقشه بسيطه ومعاه طقم الكاسات التركواز السفره الرانر يكون تركواز فى اوف وايت او كافيه البار الانتيكات بتاعته يكون داخل معاها التركواز تمام كده السجاد اوف وايت وكافيه طيب انتى خلاص دهنتى الحوائط وجيبتى السجاد والعفش ومش هتعرفى تغيرى مش مهم المهم يكون النيش مافيهوش الوان شاذه ويكون رقيق وهادى ومتحطيش فيه غيراحلى حاجه جيباها مش مهم غاليه المهم تكون شيك وسيمبل اه النيش لو مودرن بلاش مفارش او تحطى تل بنفس لون الكاسات فى اخر رف تحت خالص وحطيه منعكش كده هيبقى شكله حلو بس متعمليش كده فى كل الرفوف  بصو يابنات فى الصوره دى اللتناسق بيت طقم الشاى والكاسات اللى وراه مالناش دعوه بلون المفرش علشان مش لايق على النيش بس ده اللى اقصده تختارى لون واحد قوى تعملى بيه لمسات وتوزعيه فى المكان شوفى ده كمان رائع ده  وتحت خالص هتحطى شنطه المعالق الادراج لوفيه وفى البوفيه هتحطى باقى الحاجات اللى جيباها باقى طقم الصينى باقى الكاسات فنجاين الركوبال او الاركو بيركس تمام كده ده اللى هيتحط طيب فى الاول خالص بقى قبل كل ده هنعمل ايه هندخل ع النيش ومعانا فوطه نظيفه ومنديه بسيط ونمسح الخشب جوه وبره والسفره كمان والبوفيه وبالجلانس تمسحى الزجاج والمرايات فى لانيش والبوفيه وبورق الجرايد تمسحى المرايات اللى جوه وترصى وتفرشى وتظبطى وفى الاخر خالص بورق الجرايد تانى تمسحى بقى الدرف ومرايه البوفيه طيب والكاسات والاطباق بفوطه نظيف بردو تمسحى الاطباق وترصيهم والكاسات طبق يكون كبير شويه وتحطى فيه شويه مايه ونقطتين خل ونقطتين صابون سايل وتغسلى فيه الكاسات وتمسحيها كويس هتلاقيها منوره باذن الله هترتاحى شويه ويبقى معاكى من اول النهار كيس كبير تلمى فيه العلب والكياس والورق اللى طلع من حاجتك كلها او صندوق كبير لو عندك اوضه اطفال بردو هتمسحى الخشب كويس وبعدين تمسحى الارض مسحه حلوه لوباقى عندك حاجه مالهاش مكان هتحطيهم فيها وتحطى سجادها بردو واى حاجه خاصه بالاوضه دى اباجورات تحف لعب اى حاجه وتقفلى وتطلعى على الليفنج تمسحى مكتبه التلفزيون ولو فيها ازاز بالجلانس والجرايد وتمسحى الارض وتحطى بردو سجادها وتاربيزتها والتحف والكلام ده وتقفلى وتطلعى ع الرسيبشن لو فى اى حاجه محتاجه شنيور علشان تتعلق اعمليها فى الاول خالص قبل ما تمسحى اى حاجه فى الشقه علشان التراب ده رفيع وبيطير بسهول ممكن يعفر الحاجه تمسحى ارضيه الريسبشن وتحطى السجاد بردو التحف بتاعته فى ركن وتدخلى ع الحمام بقى تنظفيه كويس اوى الحوائط والبانيو والحوض وكله كله وفى الاخر خالص تغسلى وشك وتغير هدوم وتاخدى الصندوق او الكيس اللى فيه الوق والكراكيب والفل بتاع العلب والكلام ده كله وتقفلى شقتك ياقمر وتروح تنامى كتير جدا هنرجع قبل الفرح بيومين نكمل فرش ونحط الخزين وهنتكلم عنهم بالتفصيل بردو |
||||
|
|
|
01 - 08 - 2013, 09:21 PM
|
رقم المشاركة : ( 4 ) | ||||
|
..::| VIP |::..
|
رد: تنظيم وفرش شقة العروسة
هنتكلم عن ترتيب الحمام سواء الصغير او الكبير وموضع تانى عن الخزين وواحد عن ترتيب الدولاب والملابس الداخليه وطرق التطبيق اخر حاجه اتكلمنا فيها اننا رصينا النيش واوضه النوم والمطبخ ونضفنا شقتنا وحطينا فى كل اوضه الحاجات الخاصه بيها وقفلنا وروحنا قبل الفرح بيومين هتروحى شقتك تحطى الخزين بتاعك سواء البقاله او حاجات الفريزر او حاجات التلاجه وتحطى بقى لمساتك الاخيره هتدخلى اوضه النوم تفكى المراتب وتفرشى مفارش التسريحه ومفرش الشيفونيره لو استايلك كلاسيك لو فارشه مودرن بحب التل اوى معاه او الاورجانزا هتحطى حته تل منعكشه كده ع العسكرى او الشيفونيره وعلشاه فازه بسيطه او شمعدان او شمع بس من الكبير ده ولو هتحطى على تسريحتك حاجه تحطى فيها برفناتك بوكس هدايا مثلا بس تكون حافته مش عاليه حطى بردو جواه تل نفس اللون وطبعا متفقين اننا هنحط لو اساسى فى الاوضه ولون قوى نكسر بيه اللون الاساسى ويكون متناسق معاه وبفضل فى اوضه النوم للبنات اللى لسه مش بيضت اننا نعمل اوضه النوم لو اوف وايت او ابيض او كافيه علشان بنجيب اطقم سرير الوان كتير هتبقى بايخه لو عامله اوضتك موف وتحطى طقم مشجر اورانج مثلا اوضه النوم شكلها بيتغير مع كل طقم علشان كده بنقول نحط لون فرعى فى الحاجات اللى تنفع تتغير ديكورات مفارش شمع فازات لكن الستاير والسجاد والحوائط يكونو لون محايد يمشى مع كل الالوان هتفرشى مفارشك وتحطى انتيكاتك وابجاوراتك وتفرشى السرير بالطقم الابيض ومفرشك وتفردى سجادتك وفى حاجه حلوه اوى مش عارفه قولتلكم عليها ولا لاء شوفت فى فتح الله معطرات فى بخاحات كبيره للسجاد والستاير والانتريهات وبروايح كتير حلوين اوى بحوال 29جنيه بس كبيره يعنى تقعد معاكى كتير ممكن تجبيها وترشى منها ع السجاد والستاير طيب معندناش دلوقتى نعمل ايه معطر جو عادى خالص رشى حبه حلوين واقفلى الاوضه بس قبل ما تقفليها هتحضرى فيها شويه حاجات هى والحمام نقول هتحضرى ايه الاول فى اوضه النوم وتجهيزات الحمام خليها مع موضوع ترتيب الحمام هتجهزى ايه فى اوضه النوم بيجامه جوزك حبيبك وقميصك الابيض او اى لون تحبيه وبيليق عليكى وفوطتين واحده ليكى وواحده ليه وهتطبقيهم بطريقه شيك ممكن تحطى الفوط بالطريقه دى اصلى بحب الشرايط الستان والاورجانزا اوى  ودى الطريقه اللى بقولكم عليها للبورنص  وطريقه البجعه بردو بحبها اوى  حلو كده ياقمرات بيقى ياقمر وادخلى ع اللى بعده الليفينج مسحه بردو خفيفه لمكتبه التلفزيون لو مش هتعلقيه وعملاله ترابيزه او مكتبه وتحطى مفارشك وديكوراتك وسجادتك ومعطرك وتقفلى وتطلعى اوضه الاطفال لو عندك تحطى تفرشى السراير وتحطى التحف او اباجوره وتفرشى السجاده والمعطر وتطلعى تفرشى مشايه المطبخ الريسيبشن بردو تفرشى مفرش السفره وترابيزه الانتريه او الصالون وترتبى خددياتك وتفرشى سجادك وتحطى تحف البوفيه وطبق الفاكهه فاااااااااااااااضى ع السفره وتروحى ياحلوه ع الحمام تحضريه  لليله المنتظره ليلله العمر الليله دى عمرها ما هتتكرر فى حياتك تانى متضيعيهاش فى القلق اى حاجه هتحصل فى اليوم ده خير وهتفتكريها وهتضحكى وهتبقى ذكرى جميله باذن الله خلى ابتسامتك عنوانك متخليش اى حاجه توترك اى مشكله لاقدر الله تحصل عديها وسايسى امورك اليوم ده وفهمى خطيبك ان اى حاجه تحصل متحطيهاش فى بالكم وتخليها تدايقكم اتأكدى ان نفسيتك ورحك الحلوه هى اللى هتحليكى من الميكب والفستان كل العريس بيطلوعو أميرات يوم فرحهم |
||||
|
|
|
01 - 08 - 2013, 10:34 PM
|
رقم المشاركة : ( 5 ) | ||||
|
† Admin Woman †
|
رد: تنظيم وفرش شقة العروسة من الالف للياء
موضوع مهم جدا
ربنا يباركك |
||||
|
|
|
02 - 08 - 2013, 09:49 AM
|
رقم المشاركة : ( 6 ) | ||||
|
..::| VIP |::..
|
رد: تنظيم وفرش شقة العروسة من الالف للياء
ميرسى يامارى على مشاركتك الجميلة
|
||||
|
|
|
14 - 08 - 2013, 03:51 PM
|
رقم المشاركة : ( 7 ) | |||
|
..::| مشرفة |::..
|
رد: تنظيم وفرش شقة العروسة من الالف للياء
ميرسي كتير ربنا يعوض تعب محبتك
|
|||
|
|
|
19 - 08 - 2013, 10:17 PM
|
رقم المشاركة : ( 8 ) | ||||
|
..::| VIP |::..
|
رد: تنظيم وفرش شقة العروسة من الالف للياء
ميرسى يامرمر على مشاركتك الجميلة
|
||||
|
|
|
22 - 08 - 2013, 10:00 PM
|
رقم المشاركة : ( 9 ) | |||
|
| غالى على قلب الفرح المسيحى |
|
رد: تنظيم وفرش شقة العروسة من الالف للياء
تسلم الايادى |
|||
|
|
|
23 - 08 - 2013, 11:52 AM
|
رقم المشاركة : ( 10 ) | ||||
|
..::| VIP |::..
|
رد: تنظيم وفرش شقة العروسة من الالف للياء
ميرسى ياايروو على مرورك الجميل
|
||||
|
|
 |
|
| قد تكون مهتم بالمواضيع التالية ايضاً |
| الموضوع |
| جهاز العروسة من الألف للياء بترتيب ونظام |
| تربية الكلاب من الالف للياء؟؟؟ |
| كل ما يخص الروت وايلر ( طرق تدريبه من الالف للياء) |
| حوضي البحري من الالف للياء |
| اغراض دبش العروسه من الالف للياء |
العرض المتطور