احذروا شركات النصب GlobadAdMart وغيرها

[joy]

نصيحة! و كل واحد براحته بعدين ..
عشان بس نغلس شوية على الناس اللى بتستهبل فى الحوارات دى كل يوم بشركة اسم مختلف و عاملينها تسول شبكي ... !
مفيش حاجة اسمها اكسب 1000 دولار و لا 10,000 دولار شهريا من موقع كذا او كذا لمجرد انك تشوف اعلان !
الملايين اللى بتتوزع دى و ملهاش صاحب "نصب" ..
و اخرها كمان عربية جاجوار !! وسعت منهم اوى اوى دى ...

الايام دى شغالة اوى شركة GlobadAdMart و بتدفع فيها 500 دولار عشان تفتح حساب و بتكسب شهريا 200 دولار على الاقل و ما فوق..
و كذا واحد قالى عليها و واضح ان فى ناس كتير اضحك عليها و للاسف بعد ما بيتورط و يشترك بيحاول يقنعك "او ينصب عليك" عشان تشترك و يعوض خسارته و فى الغالب هيعرض عليك هات الفلوس و انا افتحلك الحساب برصيد النقط اللى عندى ..

شوية ملاحظات سريعة:-
1- مفيش شركة بأى حال ممكن تدفع لحضرتك 10 و 15 دولار عشان تشوف اعلانها !
2- مفيش شركات اصلا بتعلن عندهم، يعنى لا هتلاقى اعلانات اديداس و لا بيبسي زى ما هيقولك اللى بيورطك فى البداية
3- الشركة محدش يعرف عنها حاجة اصلا عشان محدش يكلمك بثقة عنها و من الاخر الدومين بتاعها اتسجل يوم 17 ديسمبر 2012، يعنى من اقل من شهرين
4- مفيش حد استلم جنيه من الشركة لحد انهاردة، لان حسب شروطهم اول 4 اسابيع مش ينفع تسحب فلوسك و لازم رصيدك يوصل لـ 500 دولار عشان تطلب تحويل المبلغ .. يعنى لازم يمر 4 شهور على الاقل عشان اى حد يقولك "انا استلمت" !!
و بناءا على ان الدومين اتسجل يوم 17/12/2012 و بفرض ان الموقع انطلق بعدها بـ 5 دقايق !! يبقى لازم اول واحد يستلم يكون فى شهر مايو ..
5- الشركة نفسها ظهرت من سنة باسم مختلف، و نصبت على الناس باسم LocalAdClick و ناس كتير اتنصب عليها و محدش قبض حاجة
6- المفاجأة بقى اللى اكتشفتها، ان الساذج صاحب الشركة لسه محتفظ بالموقع القديم على الموقع الجديد، شوف من هنا LocalAdClick.net
7- موقع الشركة مفيهوش اى معلومات حقيقية عن الشركة، مثلا لو دخلت هنا GlobalAdMart.com
هتلاقى ان التصميم ركيك جدااا، على يمينك المفروض يكون فى اعلانات و مفيش عندهم و لا اعلان واحد !! .. و على شمالك فى الصفحة هتلاقى "خدماتنا" و عبارة عن ابراج، و توظيف، و زواج، و بناء مواقع و هكذا ..
الخدمات كلها متناقضة و ملهاش علاقة بنشاط الشركة، اللينكات للخدمات دى معظمها مش شغال و بتفتح فريم جوة البوكس و واضح اللى صمم الموقع واحد فى 3 اعدادى! ..
8- عنوان الشركة اكيد طبعا وهمى (بس مفيش دليل)، و هما عاملين نفسهم جزء من شركة ViSim Advertising Limited اللى هى اصلا متسجل الدومين بتاعها يوم 26 يناير 2013 .. يعنى من 3 اسابيع !

الخلاصة:-
الخلاصة ان ده تسول شبكي، مش تسويق شبكى ..
لما تحب شركة تعمل اعلان هتدفع 10 او 20 سنت بالكتير لكل ضغطة على الفيس بوك مثلا، يعنى الـ 15 دولار اللى هتدفعها الشركة تجيب بيهم 150 واحد افضل من اللى قاعد بياخد فلوس عشان يتفرج على اعلان .. لان اللي بيضغط على الاعلان اللى بيعجبه ممكن يقرر انه يشترى المنتج ..
ده الويب ماركتنج اللى فى العالم كله .. بس فى مصر الناس متخيلة ان فى ملايين تايهة مع الشركات و عايزة توزعها على الناس !!

لو انت مشترك معاهم او مع غيرهم .. فبما انك ما قبضتش حاجة من الشركة اسكت شوية و انتظر لحد ما تتاكد انهم نصابين بنفسك او تقبض منهم (ابقى قابلنى!) ... لانك بكلامك عن الشركة انت كده شغال نصاب صغير معاهم و بتحاول تستفيد من النقط اللى عندك و تطلع اكاونتات لان مش عارف تاخد فلوسك ..

لو انت لسه مش مشترك، اعتقد الكلام اللى فوق يفيدك، و لو انت حابب تجرب و من بتوع "التجارة مخاطرة" فانت حر .. بس المشكلة انك هتحاول تورط اللى حواليك معاك !


الكلام ده على الشركة دى و غيرها
طالما بتكسب ارقام تزيد عن 10 سنت للاعلان يبقى نصب وش .. ده ان لقيت اصلا شركة محترمة بتعلن فى مواقع بتدفع للناس عشان تضغط ...

[Ramez5]

شكراً كتير على التنبية والتوضيح

[Ramez5]

شكراً كتير على التنبية
وبالفعل فى نقطة عاوز اوضحها
ازاى انا صاحب منتج وعاوز اعمل تسويق لية
بالعقل كدة هأروح أسوق فى موقع وانا عارف انى مش هأستفيد منة ؟
بأنهى عقل أدفع فلوس لموقع مش هايفدنى
وهدف الموقع لكل عملائة أدفع وهتاخد فلوس بزيادة
وانا مش مستفيد كاصاحب منتج او صاحب الإعلان !!!
يبقى الأفضل انا لما احب اسوق لمنتج خاص بيا
اعمل لة تسويق على الفيس بوك أو أعلانات جوجل
هأستفيد بزوار حقيقيين من غير ما حد يحركهم

[روشا الفرفوشه]

ميرسى على التنبيه
بس انا اعرف ناس بجد بجد اشتركت
واخدت فلوس من الشركات ديه
بس هل هيفضلو على كده ولا ايه الله اعلم

[Mary Naeem]

شكرا على التنبيه