خليك بطل في استمراريتك وأمانتك زي آساف

[walaa farouk]

"أمانتك لربنا بتبان لما تنكر ذاتك.. وتنجح غيرك وأنت في الظل" 📜🔥

حكايتنا النهاردة عن «آساف بن برخيا»

طبعاً كلنا عارفين "المزامير" وبنعشقها،
وكلنا تقريباً أول ما بنسمعها بنفتكر داود النبي على طول.

بس الحقيقة إن داود كان معاه "فريق ثقيل" قوي شاركوا في الكنز دا.

وعلى رأسهم المايسترو وصاحب حلقة النهاردة آساف بن برخيا.

معلومة على الماشي قبل ما نبدء..
آساف مكنش شخص هاوي، ده كان "لاوي"
ابن برخيا،
يعني راجل متربي في قلب الخدمة،
ولما داود الملك حب ينظم بيت ربنا،
كان آساف هو الاسم رقم واحد في القائمة،
وده اللي بنعرفه لما الكتاب بيقولنا:👇🏻
«فأقام اللاويون هيمان بن يوئيل ومن إخوته آساف بن برخيا»
(أخ الأيام1 15: 17)

وشغلته مكنتش مجرد ترنيم بس لا...
ده كان هو اللي بيمسك "الصنوج النحاسية"
ويخبط بقوة عشان يعلن بداية التسبيح ويجمع قلوب الشعب كله، زي ما هو مكتوب:👇🏻
«والمغنون هيمان وآساف وإيثان بصنوج نحاس للتسميع»
(أخ الأيام1 15: 19)

والجميل في حكاية آساف إن أمانته ظهرت في اليوم التاريخي
اللي داود جاب فيه تابوت العهد، في اللحظة العظيمة دي،
الملك مسلمش العهدة لأي حد، لكنه جعل حمد الرب بيد آساف:👇🏻
«حينئذ في ذلك اليوم أولا جعل داود حمد الرب بيد آساف وإخوته»
(أخ الأيام1 16: 7)

ومن اللحظة دي وآساف فضل واقف قدام التابوت بصفة دائمة،
مبيزهقش ولا بيكل، الكتاب بيقول:👇🏻
«وترك هناك أمام تابوت عهد الرب آساف
وإخوته ليخدموا أمام التابوت دائما أمر كل يوم بيومه»
(أخ الأيام1 16: 37)

وآساف مكنش مجرد موسيقار،
ده كان بيلقب بـ «الرائي» يعني نبي ومستشار روحي.

لدرجة إنه كتب لوحده 12 مزمور
(مزمور 50، ومن مزمور 73 لحد مزمور 83)

والملك حزقيا بعد سنين طويلة لما جه يرجع العبادة أمر اللاويين:👇🏻
«أن يسبحوا الرب بكلام داود وآساف الرائي»
(أخ الأيام2 29: 30)

ورغم كل المناصب دي، آساف كان إنسان زينا،
حكى في مزاميره بكل صراحة عن لحظات ضعفه وشكه لما شاف الأشرار ناجحين وهو تعبان،
وقال بصدق:👇🏻
«أما أنا فكادت تزل قدماي. لولا قليل لزلقت خطواتي»
(مزمور 73: 2)

لكنه علمنا إن الحل مش في الهروب،
لكن في "دخول المقدس"، وهناك كتب أغلى كلمة بنسند بيها قلبنا لما قال:👇🏻
«من لي في السماء ومعك لا أريد شيئا في الأرض»
(مزمور 73: 25)

آساف مكنش بيدور على "اللقطة" أو يزاحم داود في شهرته،
هو اختار يكون السند اللي بيلحن ويكتب ويقود.

وكمان أسس عيلة كاملة اسمها
«بنو آساف»
فضلت شايلة الراية مئات السنين لدرجة إنهم لما رجعوا من السبي
كانوا هما اللي دايماً بيسبحوا.

قصة آساف بن برخيا بتقولنا النهاردة إن بطل الظل هو اللي بيفضل واقف قدام ربنا "دائماً"

سواء الناس شافت شغله أو لأ،
وإن أمانتك وأنت بتخبط بصنوجك في صمت
هي اللي بتخلي كلامك "دستور" للعبادة لأجيال مكنتش لسه اتولدت.

ربنا عاوز يقولك من خلاله.. أنا شايفك وأنت بتخدم في هدوء "أمر كل يوم بيومه"

آساف كان بطل لأنه كان صوت حق وسند لغيره، وخلى المزامير كنز بيطبطب علينا في كل وقت.

فخليك بطل في استمراريتك وأمانتك..
زي آساف.

[لمسة يسوع]

فخليك بطل في استمراريتك وأمانتك..
زي آساف


روووعة
ربنا يبارك حياتك