نهتم بيه هو الأول بعد كده كله هيجي

[walaa farouk]

كل مره بعيد فيها زيارة ربنا لبيت مرثا ومريم
مش بعرف أطلع فين الغلط اللي عملته مرثا
أو سبب لوم ربنا ليها بالشكل ده .
.. ليه ربنا يلوم مرثا إنها عاوزة تخدمه وتضايفه بشكل معين ؟
ليه ربنا لامها على حسن إستقبالها له ؟
ليه كان في لوم كبير إنها عاوزة تخدمه بقلب كبير وبكل طاقة عندها؟

هي كانت عاوزة تقدمله أغلى حاجة وهو إهتمامها
وطاقتها له وده تعبير حب صادق منها

حتى الآية كانت موضحة إهتمامها ده جدًا

40 وَأَمَّا مَرْثَا فَكَانَتْ مُرْتَبِكَةً فِي خِدْمَةٍ كَثِيرَةٍ.
فَوَقَفَتْ وَقَالَتْ: «يَارَبُّ، أَمَا تُبَالِي بِأَنَّ أُخْتِي قَدْ تَرَكَتْنِي أَخْدُمُ وَحْدِي؟
فَقُلْ لَهَا أَنْ تُعِينَنِي» إنجيل لوقا40:10

مرتبكة : كانت متوترة وده بسبب إنها عاوزة تطلع أحسن ما عندها
وده يبين صدق إهتمامها

ليه يرد ويقولها :

مَرثَا مَرْثَا، أَنْتِ تَهْتَمِّينَ وَتَضْطَرِبِينَ لأَجْلِ أُمُورٍ كَثِيرَةٍ، إنجيل لوقا41:10

ايه يارب في ايه؟
ما هو كله عشانك أصل هي مكنتش مرتبكة لأمر غيرك
ولا كانت مشغولة عنك دي كانت مشغولة عشانك برده

ده ساعات كنت بحس فعلاً إنها أحسن من مريم
... مرثا كرست جزء كبير من وقتها عشان تقدم لربنا أحسن حاجة... أينعم مريم كانت مهتمة إنها تقعد معاه أكتر بس فين مجهودك يا مريم معلش!!! 😂

أنتوا عارفين إن نفس المشهد ده بيتكرر معانا دايمًا في الخدمة ؟

دايمًا مشغولين مين هينظم أحلى رحلة السنة دي..
. مشغولين دايمًا بأكتر فكرة creative
ممكن نعملها الجمعة الجاية ..
. أروش خلوة ممكن تتنظم وطول الصيف على كده
(وَأَمَّا مَرْثَا فَكَانَتْ مُرْتَبِكَةً فِي خِدْمَةٍ كَثِيرَةٍ)
بنفضل مرتكبين متوترين مزنوقين ومسحولين
في مليون حاجة
مين هياخد المركز ده طب مين طلع فكرته أحسن
مين اليوم الروحي بتاعه بقا أشهر

فيجي ربنا بكل هدوء يقولنا :
أَنْتِ تَهْتَمِّينَ وَتَضْطَرِبِينَ لأَجْلِ أُمُورٍ كَثِيرَةٍ !!!

طب ما يارب ما احنا عاوزين نقدملك أحسن حاجة
هي مش طاقتنا دي وزنة مش لازم نهتم بخدمتك برده
مش لازم نواكب العصر
( اللي يليق بينا ) عشان نجيب أكبر عدد من ولادك ؟؟

فيروح يرد تاني بكل هدوء :
وَلكِنَّ الْحَاجَةَ إِلَى وَاحِدٍ. !!!! إنجيل لوقا42:10

هل إرتباكم في إنكم تطلعوا أحسن حاجة عندكم نساكم
إنكم تسمعوا صوتي ؟
نساكم إن هدفكم الأول هو أنا ؟
نسيتوا إني أنا الجوهر ؟؟؟

طيب أنتوا عاوزين تطلعوا أحسن حاجة عندكم عشانكم ولا عشاني ؟

إرتباككم وخدماتكم هدفها الوصول إظهاري
ولا أنا كنت الوسيلة لإظهار ذاتكم ؟؟

إتسحلتوا في مليون خدمة ها وبعدين قعدتوا معايا؟
عرفتوا عاوز اقول ايه طيب ؟

ربنا مكنش مضايق من إهتمام مرثا
ربنا خاف إن إهتمام وإنشغالها ينسيها خلاصها ينسيها
إنه موجود ينسيها الهدف الأساسي

ربنا عمره ما كان معترض إننا نطلع أجمل ما عندنا
من أفكار وطاقة وخدمة وإنها نفضل ندور ونتسحل
عشان نخدم هنا وهناك ... دي أعظم حاجة نقدمهاله
بس هل نسينا الحاجة إلى الواحد نسينا إحنا هنا ليه ..
.. براعة أفكارنا نسيتنا إظهاره هو ؟
خلتنا ننشغل عنه وقت حضوره بحجة الخدمة
وتقديم أحسن حاجة؟؟

لا خلاص سيبوا كل ده أنا أهم

فَاخْتَارَتْ مَرْيَمُ النَّصِيبَ الصَّالِحَ الَّذِي لَنْ يُنْزَعَ مِنْهَا».
إنجيل لوقا42:10

مريم كانت شاطرة أوي وحكيمة في وقت وجوده
عرفت إن كل حاجة مش مهمة

نزعت ذاتها وفرت طاقتها قعدت تشرب منه عشان تعرف تتملي

ليه ؟
الْحَاجَةَ إِلَى وَاحِدٍ.

نهتم بيه هو الأول بعد كده كله هيجي

ندوقه عشان نعرف ندوق اللي حوالينا منه
واحنا بنجيب أحسن الأفكار ...
نشوفه عشان نعرف نظهره واحنا بنحضر لأعظم خدمة ❤

لإنه هو الثابت والأساس والجوهر من كل حاجة
( النَّصِيبَ الصَّالِحَ الَّذِي لَنْ يُنْزَعَ مِنْهَا) ولا مننا ❤