هوشع وجومر (قصة الحب الحقيقي تتجاوز حدود العقل والقلب معًا)

[Ramez5]

هوشع وجومر

ربنا امر هوشع انه يتجوز زانية ايوه (زانية) ومش يتجوزها بس لا ده كمان يجيب منها اولاد بس هوشع رضي بالهم والهم مرضاش بيه ,جومر الزانية مرضيتش بيه وقالتله انا مش بحبك ومش عيزاك كمان بس هو حبها اوي واتجوزها وهي راحت سيباله البيت وجريت ورا اللي خدعوها وعملوا انهم عاشقينها ولم كبرت وشاخت وراح جمالها رموها ومبقاش ليها لازمة عندهم وباعوها في سوق العبيد ولما سمع هوشع جري عليها مع انها بهدلت كرامته وشرفه وسمعته بقت في الارض بسببها وسابته من سنين وقالهم لا انا هشتريها ومع انهم طلبوا فيها ثمن قليل قوي ماهي مبقاش ليها قيمة قالهم لا انا هدفع فيها كل حاجه عندي اصلي شايفها ذي اول مرة شفتها فيها جميلة قوي مش ذي ماانتوا شايفينها مليانه عيوب.
يمكن معظمنا ميعرفش القصة ديه وانا واحدة من الناس لما عرفتها تنحت بس جيه في دماغي تأملين وفكرتين طلعت بيهم من قصتهم:
اولا: ازاي يارب تأمر نبي من انبيائك انه يتجوز زانية وكمان يخلف منها وازاي تخليه يحبها اوي كده و ليه يارب مخلتش جومر تحن قلبها عليه وتحبه هي كمان ليه عايز تجرحه بس فكرت في لحظه ان ربنا بيعمل معايا انا كده ايوه بيعمل معايا انا وانت اكتر من كده كمان ياما بيقرب مننا واحنا بنجري ورا الخطيه وشهواتنا وياما بيقدملنا كتير واحنا بنرفضه وفي الاخر لما بنزهق ونقرف من اشكالنا نلاقي ربنا جايلنا يشترينا زي ما اشترانا وفدانا بدمه ودفع فينا اغلي حاجه عنده!
ثانيا بقي : الناس اللي بتتكلم عن قصص الحب الواااو والproposal الفلاني و و و.... لما قريت القصه ديه عرفت يعني واحد بيحب واحده بقلبه بجد
مش واحد شاف خطيبته بتسلم علي واحد راح قالها مافيش نصيب ولا هاتي ال password اشوفك بتكلمي مين! :/ ولا واحد تاني حب واحده ارتبطوا وقعدوا حلوين مع بعض ولما لقي الدنيا هتدخل في مسئولية وجواز يقولها انا عايز سعادتك :/ نعم يعني !
لما قريت قصتهم عرفت يعني ايه حب حقيقي
عرفت يعني ايه واحد يضحي بكل حاجه عنده
حب حقيقي عدي بكتير حب يعقوب وراحيل وبوعز وراعوث اللي احنا موهمين بيهم ونقول فين الحب ده
لا الحب ده طلع موجود فعلا من قديم الازل ولسه موجود بس احنا اللي بنتوهم ب اي حاجه fake احنا اللي مش عارفين نحب صح
احنا اللي مش عارفين ندي مشاعرنا صح لبعض.
ادي مشاعرك الاول لربنا اللي بيديك اغلي حاجه عنده وقوله مشاعري اهي بين ايديك كلها ليك انت وبس ومتخليش حد عندك يبقي اغلي من ربنا خلي ربنا هو اغلي ما عندك ولما تيجي تحب حد خلي حبكم جوه قلب ربنا خلي ربنا هو اللي يستخدمكم صح حسب مشيئته قوله يارب علمنا ازاي نحب بعض وعلمنا ازاي نحب زي هوشع ما حب جومر، ويعقوب حب راحيل، وبوعز وراعوث.

قصة الحب الحقيقي تتجاوز حدود العقل والقلب معًا

[walaa farouk]

مشاركة رائعة
ربنا يفرح قلبك رامز

[Mary Naeem]

ادي مشاعرك الاول لربنا اللي بيديك اغلي حاجه عنده وقوله مشاعري اهي بين ايديك كلها ليك انت وبس

مشاركة جميلة جدا
ربنا يبارك حياتك