|
 |
 |
 |
|
|
|
رقم المشاركة : ( 1 )
12 - 10 - 2024, 04:41 PM
|
|||||||||||
|
|||||||||||
 اسكتش احد التجربة بندق وبندقة في قطر الصوم اسكتش احد التجربة مناسب لمراحل ابتدائى ممكن تعملوه فى الفصل او فى مدارس الاحد . "بندقة تسير وراء بندق الذي يبدو عليه الضيق وتقول له " بندقة : يا بندق يا بندق هتلففني وراك كدة برده بندق : بس بقي انا زعلان منك ومخاصمك بندقة : خلاص بقي مش هزعلك تاني بندق : لا ياستي انتي كل مرة بتقولي كدة وبرده بتزعليني بندقة : طب خلاص خلاص خد طيب البسكوتة دي أنا هصالحك بيها بندق : إيه دي وريني كدة "يقوم بأكلها ويقول وهو يأكل" بندق : إنتي عاوزة تضحكي عليا بالبسكوتة لا ياستي أنا مش عاوزها "بعد ماياكلها يديها الكيس فاضي ويقول" بندق : خدي ياستي خدي أنا مش عاوزها بندقة : طب ماكنت تاكل الكيس بالمرة .. يا بندق بقي متزعلش وبعدين ماهو اللي انت كنت عاوز تعمله ده كان غلط وكان لازم موافقكش عليه بندق : ايه يعني ضربت الكمسري وكنت عاوز أنزل من قطر الصوم قبل ميقف بندقة : غلط يا بندق غلط ده انا لولا اني اتحايلت ع الكمساري مكنش هيرضي يركبنا قطر الصوم تاني بندق : طيب كنتي سبيني أنط من القطر وأعمل حتة أكشن كدة بندقة : أكشن إيه إنت فاكر نفسك بندق السقا ؟؟ يابندق إنت كدة كان ممكن تتعور وتتكسر مية حتة وملاقيش حد أكمل معاه رحلة الصوم وإحنا لسه قدامنا خمس محطات بندق : وكمان مكنش همك اني اموت وهمك بس إنك تبقي لوحدك بندقة : يا بندق انا بهزر معاك هو أنا ليا غيرك يابندق ياخويا بندق : طيب خلاص المحطة الجاية بقي ابقي سبيني براحتي وسبيني انط من قطر الصوم وهو بيقف انا نفسي اجرب الحركة دي انا اصلي شفتها ف فيلم قبل كدة وكانت حلوة أوي بندقة : ماهو ساعتها اللي عمل الحركة دي مات يا بندق بندق : لا لا ده هو بس عملها غلط وبعدين ماهو ربنا هياخد باله مني مش المس قالت لنا ان في ملاك حارس بيمشي معانا هو بقي يبقي ياخد باله مني بندقة : غلط يا بندق غلط انت كدة هتكون بتجرب ربنا بندق : بجرب ربنا ؟؟ يعني إيه بجرب ربنا إنتي بتقولي كلام كدة مش مفهوم أصلا بندقة : يعني يعني .. ماانا مش عارفة اصلا يعني ايه أنا كمان بس المس أكيد هتعرفنا انهاردة يعني ايه بندق : امال عمالة بقي تقوليلي ف كلام وعملالي فيها مس وده غلط وده صح وانتي اصلا مش عارفة حاجة وبعدين هي المس هتحكيلنا القصة دي ولا هتحكيلنا القصة بتاعة المحطة التانية متلخبطيش المس معاكي بقي بندقة : آآه معني كلامك كدة يا بندق إنك ناسي إسم المحطة التانية بندق : انا ؟ هو انا بنسي برده لا فاكر بس " ويدور جوة لبسه" هو راح فين بس كنت حطه هنا بندقة : انت بتدور علي ايه يا بندق هه بتدور علي إيه بندق : كان في ف جيبي قطر عليه صورة المحطة التانية دي انا اصلي بصراحة نسيت المعلومات كلها من كترها دخلت ف بعضها بندقة : ولا يهمك خلاص انا هفكرك وامري لله ولا اقولك لما نشوف كدة اصحابنا دول فاكرين ولا لأ .. هه حد فاكر "تستمع للاجابة" بندقة : شطار شطار هه افتكرت يا بندق بندق : ايوة ايوة افتكرت كل حاجة محطة التجربة أنا أصلا كنت حافظها حتي أنا عارف إيه اللي حصل فيها دي اللي ربنا جرب فيها ابونا ابراهيم صح عشان تعرفي بس اني عارف كل حاجة بندقة : غلط يا بندق غلط مش دي بندق : ايه مش دي ؟؟ انتي بقي اللي شكلك مش عارفة حاجة انا واثق إنها هي دي انتي مش بتقولي اسمها التجربة يبقي هي دي بندقة : ياعم بندق مش هي .. حد التجربة ده اللي اتجرب فيه اصلا هو ربنا بندق : نعم ؟ ربنا ؟؟ هو في حد اصلا ينفع يجرب ربنا بندقة : ايوة الشيطان جرب ربنا زي ماانت كنت عاوز تجربه وترمي نفسك من قطر الصوم بندق : يعني الشيطان برده رمي نفسه من القطر ايه ده هو كان راكب معانا ؟ بندقة : لا يا بندق ده الشيطان طلب من ربنا ان هو اللي يرمي نفسه بس بصراحة مش فاكرة منين بندق : انتي كل حاجة مش فاكراها كدة امال هنعرف الحكاية ازاي بس ولا إحنا نازلين المحطة دي ع الفاضي خلاص يالله نركب القطر بقي أناملي شوية بندقة : إستني بس يا بندق ماهو إحنا جايين هنا عشان نسمع الحدوتة دي من المس وكمان هناخد حاجة حلوة بندق : هييييييييييه حاجة حلوة خلاص خلاص أنا هستني ومش هنام بندقة : جدع يا بندق فاكر المرة اللي فاتت كنا قاعدين كويس والمس انبسطت مننا بندق : اه صح المس دي اللي حكيتلنا المرة اللي فاتت المحطة الأولي اللي هي بتاعة ... بتاعة آآه بتاعة الكنوز صح بندقة : صح يا بندق ماانت صاحي اهو بندق : لا انا عارف كل حاجة بس انا يعني مبحبش أحسسك إني أعرف أكتر منك يعني بندقة : ماشي ياسيدي ,, المهم يالله بقي نسمع قصة التجربة من المس عشان نلحق نركب القطر قبل مايتحرك عشان المحطة الجاية هنقابل واحد إسمه الإبن الضال بندق : طيب يالله بينا تأليف / ميلاد نبيل الرب يعوض كل من له تعب فى الخدمة 
|
 |
|
| قد تكون مهتم بالمواضيع التالية ايضاً |
| الموضوع |
| اسكتش رحلة الصوم الكبير |
| معاً كل يوم فى الصوم الكبير-أحد التجربة |
| الصوم _ صيام الرسل _ اسكتش كوميدي |
| عايز ضرورى اسكتش عن احد التجربة |
| بندق مع تيكا وزيكا (اسكتش راس السنة) |
العرض المتطور