ربنا يكفيك شر لسانك

[walaa farouk]

فيه ناس لسانها متسلط عليها و بالتالي علي الناس اللي حواليها ..

الناس دي فاكرة انها كده بتغلب غيرها و تكسب "معارك الحوار و السجال " ..
لكن نار اللسان بتحرق صاحبها و لو بعد حين ، و لسان السم بيسمم صاحبه قبل الناس ..

لسان يكره الناس فيه و يوقعه في مشاكل و كوارث ، و يورطه في بلاوي مُرة ..

فيه لسان نمام، بعد ما يجيب سيرة الناس بالشر ، الناس تنفر منه لأنه زي ما اتكلم علي غيرهم ح يتكلم عليهم ..

و فيه لسان كداب ما حدش يصدقه تاني، و لسان شتام و غلاّط ما حدش يحترمه تاني ، و لسان حسود ما حدش يقرب له تاني ، و لسان اناني ما حدش يحبه تاني ..

اللي لسانه اتسلط عليه بيشوف منه مرار المرار..

و اللي ربنا راضي عليه يديله لسان العطر و الورد و الياسمين ، لسان الشكر و البركة و التشجيع و السند و الفرح ، و بسبب لسانه الحلو يحبب فيه خلقه و شعبه و حبايبه و حتي اعداؤه ..

و ربنا يكفيك و يحميك من شر لسانك ، و يديك بركته و حلاوته ، و يرزقك برزق جمال الكلام ..