|
 |
 |
 |
|
|
|
رقم المشاركة : ( 1 )
15 - 08 - 2019, 04:55 AM
|
|||||||||||
|
|||||||||||
 ما عندوش دم . تعبير بنقوله لما واحد بيعاني من "فقر دم" .. و نفس التعبير الناس بتقوله عن "فقر الذوق و الاحساس و الأدب " ، و ده الأكثر انتشارا.. اللي ما "عندوش دم" هو اللي يشوف امرأة او طفل أو حد مسن و ما يوسع لهوش الطريق و يسيب له مكانه يقعد .. هو اللي لما يأكل في مكان ياكل اضعاف طاقته لمجرد ان الاكل ببلاش. . و هو اللي ياخد من المكان اللي هو فيه حاجات مش بتاعته لمجرد انها متاحة ، معالق و شوك و مخدات و أغطية.. هو برضه اللي ما يراعيش راحة الناس، ما يحترمش النظام، يزق الناس في الاسانسير أو المترو أو الاوتوبيس و يمكن حتي الطيارة(!) .. يزاحم في الطواببر، و يعمل نفسه مش واخد باله .. هو اللي بيزعج الناس ، يا صوته عالي في الكلام و الضحك و الموبايل، يا مشغل موسيقي بصوت صاخب و جنبه واحد عاوز شوية راحة ، و كان ممكن بشوية ذوق يحط السماعات في ودنه أو يبعد عن الناس و يتكلم براحته أو يوطي صوته باحترام للكل .. هو اللي معاه طفل بيصوت و سايبه يجري في كل مكان و يزعج الكل و ممنوع حد يعلق أو يلفت نظره، و كان ممكن ياخده علي جنب أو يرجع بيه ورا أو يخرج بيه شوية بره لغاية لما يهدي و يرجع تاني ، بدل ما يشوشر علي اجتماع بحاله .. هو اللي ما بيحترمش اي نظام و عاوز يبقي فوق اي حد ، يكسر القوانين و اللي يكلمه يبقي يومه مش فايت ، و يكيل له كل الاتهامات و الهجوم و التشهير .. برضه هو اللي ما يعرفش يحترم خصوصية الناس و يفرض عليهم رأيه، و يكلمهم بدون احترام لا قدام الناس و لا حتي بينه و بينهم .. هو اللي ما بيراعيش نظراته بالذات للمرأة، و ما بيراعيش الجيرة و ادابها . . هو اللي يشوف نمرتك و ما يردش و لو بعد شوية و يسيبك محتار ، هو اللي يشوفك زعلان و ما يجبرش بخاطرك.. هو اللي يصورك من غير اذنك ، و يدعوك بالعافية بدون رغبتك .. هو اللي يسرق كلامك و ينسبه لنفسه ، هو اللي ينشر عنك اخبار كذب .. هو برضه اللي قاعد وسط الناس ماسك الموبايل علي طول و ما بيحترمش انهم حواليه ، و مشغول بنفسه و حكاياته و بطولاته علي طول، و هو اللي واكل القاعدة كلها لحسابه و عاوز الكل يسمع له و بس .. الموضوع كبير و عاوز صبر مننا لغاية ما نساعد بعض علي فهم الاتيكيت و الآداب العامة و الذوق و احترام الناس و النظام و المكان.. كمان الموضوع عاوز توعية بالذات في البيوت و المدارس و بيوت العبادة .. اللي عنده شوية "دم" يتبرع بيه للي ما عندوش، و اللي ما عندوش يشتري من بنك الذوق اللي في السما ، و ده ابوابه مفتوحة ٢٤ ساعة .. و زي ما قالت الآية الخالدة : "ذوقا صالحا ومعرفة علمني" (مزمور ١١٩ : ٦٦) .. 
|
 |
|
| قد تكون مهتم بالمواضيع التالية ايضاً |
| الموضوع |
| ربنا ما عندوش شر يقدمه لولاده |
| سلمى صباحي لمؤيدي السيسي: كيف تنتخبون مرشح "ما عندوش برنامج" والرئيس "مش هيقود البلد بالمونتاج" |
| ويقولك الشعب المصري ما عندوش مواهب |
العرض المتطور