الحقوق تؤخذ ولا تٌمنح

[walaa farouk]

.


فى العلاقات فيه حاجة مهمة جداً بننساها كتير.. وأحياناً بنتناساها.. الحاجة دى اسمها (الحقوق).. يعنى حقك إيه على الطرف التانى فى العلاقة؟ هل بتاخد حقك ده واللا لأ؟ بتطالب بيه واللا بتتنازل عنه؟ بتاخده بشكل مشبع ومرضى واللا بشكل منقوص ومختل؟ بتعمل إيه لما تحس إن الطرف التانى بيبخسك حقك أو يمنعه عنك؟ إيه النقطة اللى عندها هاتقول (لأ).. لغاية هنا وكفاية؟ هاتكمل بلا حقوق واللا هاتوقف بلا ندم؟

طبعا الطرف التانى فى العلاقة ده ممكن يكون أى حد.. أخوك.. صاحبك.. جوزك.. مراتك.. أبوك.. أمك.. أى حد..

من حقك فى أى علاقة إنك تُحترم.. مشاعرك تُحترم.. أفكارك تٌحترم.. مساحتك الشخصية الخاصة تُحترم.. اختلافك وتفردك يُحترم..

من حقك فى أى علاقة إنك تتشاف.. تحس بوجودك وبقيمتك وبأهميتك.. تتقدر على اللى بتعمله.. يتقالك (شكراً) و (برافو) و (كتر خيرك).. مش إن وجودك زى عدمه.. أو إنك مش فارق.. أو إن وجودك فى العلاقة أمر مفروغ منه taken for granted. من حقك تحس بتأثيرك وبأثرك ومردوده..

من حقك كمان يكون ليك حدود.. حدود نفسية وجسدية وعاطفية.. والحدود دى انت اللى ترسمها مع كل شخص كما ترى وكما ُتقدِّر.. وتحميها بالشكل اللى تشوفه مناسب.. وتدافع عنها بكل طريقة متاحة ليك..

ماينفعش حد يقرب من نفسك أو جسمك أو مشاعرك بدون استئذانك وموافقتك ورضاك.. ماينفعش تسمح لحد حد يلومك أو يحسسك بالذنب على حاجة انت مالكش يد فيها.. ماينفعش حد ياخد منك حاجة انت مش عاوز تديهاله؛ ان شالله تكون كلمة.. ماينفعش حد يتدخل أو يتطفل فيما يخصك ولا يعنيه.. من حقك محدش يبتز مشاعرك أو يستغلك أو يجي عليك.

برضه من حقك محدش يرمى عليك أو يزرع جواك أى أفكار أو مشاعر مش تبعك.. يزهق يبقى عاوزك تزهق.. يغضب ويستنى منك تغضب.. يضحى ويطلب منك التضحية.. ماينفعش حد يشيِّلك شيلة غير شيلتك.. ولا حد يشوف فيك نفسه.. أو يفرض عليك وجوده..

من حقك تقول (لأ) عند اللزوم -من غير ترفيص أو إساءة أدب- لكل حد بيحاول يؤذيك بأى شكل، أو يظلمك بأى طريقة، أو يضغط عليك بأى درجة..

من حقك تصدق وتتصدق.. تحس ويتحس بيك.. تهتم ويٌهتم بيك.. وماتتعاملش إلا بما تستحقه..

وقبل كل دول.. وبعد كل دول.. من حقك تتقبل زى مانت وكما أنت.. من غير ما تغيِّر نفسك علشان حد، ولا تفصَّل نفسك على مقاس حد.. ولا تشوِّه نفسك لحساب حد..

الحقوق دى هى (ألف.. باء) فى أبجدية أى علاقة.. ورغم إنها تبدو بديهية جداً.. وحقيقية وأصيلة جداً.. إلا إننا من كتر ما تنازلنا عنها.. أصبحت غريبة علينا.. وبعيدة حتى عن أحلامنا..

باختصار ومن الآخر..

العلاقة اللى تاخد فيها حقوقك النفسية.. أهلاً وسهلاً بيها.. ومرحبتين.. ومليون welcome.

العلاقة اللى يحاول الطرف التانى فيها إنه يسلبك أى حق من حقوقك النفسية.. تقوله (لأ) بمنتهى الأدب والاحترام والذوق.. وتحاول وتعافر وتطالب (مش تشحت) - بقدر الحب والود والأمل (بس مش فوق الطاقة والقدرة والاستطاعة).. وإلا.. فشكراً جزيلاً.. ومع السلامة (مع بقاء المعروف والمصاحبة الطيبة فى الدنيا فى حالة الأب والأم طبعاً)..

وخليك فاكر طول الوقت..
وفى أى علاقة..
إن الحقوق تؤخذ..
ولا تٌمنح..

[Mary Naeem]

وخليك فاكر طول الوقت..
وفى أى علاقة..
إن الحقوق تؤخذ..
ولا تٌمنح..

[walaa farouk]

ميرسى على مرورك الغالى مرمر