ربما اكون تافها جدا و لكن هناك من ينظر الي و يعتني بي جدا... و يحبني جدا... فانا العصفور الخامس..
كان في الماضي العصافير تباع في اورشليم كاحقر طيور و اصغرها وكانت تستخدم في ذبيحة تطهير الابرص... و في ايام طفولتي كانت تباع بالدستة ( 12 عصفور) كانوا بخمسة قروش و كانت امي رحمها الله و ستات البيوت تشتريها مربطين كده كل اتناشر مع بعض و وكانوا ياخدوا غلبة في تنضيفهم و تحشيهم او تشويهم لكن لما تعمل كانت تعمل مثلا 36 عصفور او اكتر.. يدوبك!!!!و يظهر لانه طائر صغير و حقير و لا حاجة للناس ليه.. ... السعر الرسمي ليه في الكتاب المقدس وقت المسيح العصفورين بفلس.. يعني الاربعة بفلسين... قوم التاجر لما عاوز يعمل ترويج يقولك خد اربعة و عليهم خامس هدية.. الخامس ده فعليا من غير تمن.. رخيص اوي في عين الناس ما هو ببلاش... طول عمر الدنيا تبيعك برخيص و اللي بيشتريك برخيص.. ساعات الواحد يبقي بلا قيمة في عين الناس و اقرب الناس..ساعات ببقي في عين مراتي و لا جوزي رخيص او مجرد شئ .. حد فرضته الاقدار و تلاقيك مهمش كده في الحياة لا زوجة تهتم و لا زوج ياخد باله و لا ولاد معتبرينك و لا انت كابن متشاف من ابوك ما انت واحد من خمسة و اصغرهم جيت فلتة بعد ما شبع من احساس الابوة... متهيالي اكيد العصفور الخامس ده كان هزيل و نحيف بلا قدرة ما هو مش معقول البياع الناصح حيدي المشتري خمسة سمان و كلهم حلوين.. اربعة حلوين و المجاني ده اكيد اي كلام و لا خايف يموت ... مانتشي حلوة اوي و لا بت روشة و لا سكسي ما فيش حد م الشباب حاول يتعرف او يقرب او يطلب صداقة فيسبوك .. مانتش من النوع اللي بتلفت النظر ديما البنات بيستئذنوا لماتيجي و اللي سخرت منك يوم ما عبرت عن مشاعرك ... انت مجرد موظف بسيط بالعافية عايش و مستني الدرجة اللي بقالك سنين ما خدتهاش .. انت ست بيت علي قدك لا ليك في نوادي و لا خدمة و لا سياسة و لا فن جوزك ديما عينه علي غيرك و ديما في بقه اتعلمي منها و لا من التانية .. انت لو مت مش كتير حيزعلوا عليك.. فرحك ما جالكش فيه ناس كتير.. مراتك ديما فارماك و مش عطيالك فرصة و قدام الناس جوز الست .. جوزك اناني اوي و ما بيفكرش غير في نفسه.. بنتك بتاعة مصلحتها... ابنك مالهوش في العواطف... مجتمع اصلا واكل حقوقك..حتي في الخدمة!!! مجرد واحد هش وجودك زي عدمه لا انت واعظ مشهور تتكلم فتبهر الناس و لا انت صوتك عذب في كورال و ليك اسم و لا يعني ليك شعبية او حتي معروف... ده فيه ناس لسه بتسال هو ده بيخدم معانا؟! ... يوم ما تنزل بوست علي الفيسبوك سواء روحي او سياسي او رياضي او حتي فكاهي او عن اي حاجة.. اتنين تلاتة بس يعملوا لك لايك و يمكن مجاملة.. اهلك يحكولك انهم مرة نسيوك في المدرسة و مرة نسيوك علي البلاج و مرة قفلوا الباب و نزلوا و اكتشفوا انك مش معاهم في العربية بعد ما اتحركوا... واحد بس اللي افتكر عيد ميلادك.. يمكن يكون خادم مسئول عن الحتة دي بالخدمة كلمك و هو ما يعرفكش ... حتي قدام السما... انت واحد من ضمن بشر من ضمن ملايين... هزيل و ضعيف و جناحاتك متقطع ريشها يعني لا انت قديس و لا راهب و لا كاهن و لا عندك حاجة تلفت بيها نظر ربنا اصلا... بالعكس بقة مغلوب طول الطريق لا عارف تطير و لاتحلق في الروحيات .. مجرد مجموعة خطايا و عادات ماسكة فيك و يوم تمسك نفسك و عشرة تقع....ديما تقع و صوتك مش مسموع....
تتصدق بقه انك وسط ده كله انت معتبر في عين ربنا جدا ... انت غالي جدا جدا في عين يسوع... انت معروف باسمك و مهتم بيك بشخصك.. لما تمم الفداء كان ليك مع الاربعة.. حتي في تفاصيل حياتك وسط ضعفك و هزالة ريشك و نحافة جسمك انت لك قيمة... يضع لك حسابا و يرتب لك مكان في خطته اليومية
أَلَيْسَتْ خَمْسَةُ عَصَافِيرَ تُبَاعُ بِفَلْسَيْنِ، وَوَاحِدٌ مِنْهَا لَيْسَ مَنْسِيًّا أَمَامَ اللهِ؟..تتصور يامر بحبة القمح اللي حتاكلها و يحطها في طريقك و يلفت نظرك علشان تشوفها ... يقدر جدا انك بلا حيلة و ليس لك مخازن فيعولك و لو البشر كله نسيك انت في قلبه و امام عينيه دائما
اذا كنت مثلي تافها ليس لك سعادة في الحياة و ليس من يهتم بك او يدللك و صرت رخيصا جدا بل بلاقيمة!!! ابتهج و امتن له شكرا لانه وحده الذي لا ينساك... مهما ثقلت ايادي من احببت و من ائتمنت و من قدمت... هناك يدا حانية تبقي لك لحنك...... هناك اذن تسمع تغريدك و تطرب لهمساتك... صدقني كن خامسا و استمتع
نبيل شحاتة
25 - 10 - 2017, 11:44 AM
رد: هناك من ينظر الي و يعتني بي جدا... و يحبني جدا
العرض المتطور