مايكل سامي وكيف تختار شريك حياتك

[روشا الفرفوشه]

بقلم مايكل سامي

انا هتكلم عن واحد مفيش حد خالص في حياته وهيبدأ يفكر ممكن يسمح لمين يشاركه حياته بعد ترك اسرته ؟؟


المفروض لما نيجي نختار شريك الحياة نختاره بناء علي العاطفه والعقل
الاتنين مع بعض لان لو مبدا واحد اختل هيأثر علي التاني

يعني ماخدش واحد عقلي موافق عليه وقلبي مش متقبله بالمره
لكن ممكن اخد شخص عقلي موافق عليه وقلبي مرتاح ليه نوعا ما
نوعا ما دي يعني فيما بعد هيحصل توافق عاطفي وارتياح

ومينفعش من اول مرة اقول لا مش عاوزه .. لازم ندي لنفسنا فرصة ولو لمرة تانيه وتالته ... ممكن في المرة دي يحصل اللي بيتقال عليه اعجاب من اول نظرة ... وممكن يحصل ارتياح ..

نبدا نفصص الموضوع واحده واحده


+ السلبيات والإيجابيات
--------------------------
اول حاجه حاول تحصر في الشخص ده بينك وبين نفسك سلبياته وايجابياته
واعمل مقارنه بين الاتنين وشوف هل سلبياته خطيرة ومش هتتأقلم انك تتكيف معاها ولا لا

لاحظ ان لكل شخص سلبيات وعمرك ماهتلاقي حد كامل ولكن فيه سلبيات ممكن نتعايش معاها علي الرغم ان السلبيات دي ممكن يعاني منها ناس تانيه
فلذلك لكل شخص انطباعات مختلفة عن الشخصيات الأخري

+ العيوب والمميزات
---------------------
محدش يقدر يعرف عيوب او مميزات شخص من اول قاعده
ففي ناس من اول مقابله تحس انها مغرورة وبعد التانيه والتالته تحس انها شخصية كويسة جدا .. فمتحكمش علي حد من اول مقابله


+ نضج الطرفين
----------------
لازم يكون الاتنين ناضجين وميبقوش طايشين .. بمعني ان الظروف بتاعتهم تكون مناسبه انهم يفكروا في الموضوع ويمشوا في خطواته
يعني مجبش واحد في تالته ثانوي بيحب واحده في اعدادي ويقرا كتاب عن كيف يختار شريك حياته ..
ده يروح يقرا كتاب عن كيف يلخص المنهج في ثلاث ايام
انا لا اقلل من مشاعر احد ولكن لكن مرحله متطلباتها


+ اختبر نقطة العصبية جيدا عند اختيار شريك الحياة
-------------------------------------------------------
بمعني ممكن يكون عصبي لدرجة كل حاجه يقولك مش هننفع لبعض وبعد يومين يصالحك
متبصش للمصالحه وتقول ان قلبه ابيض وكده لا
بص انه سابك ورجعلك وده خطر جدا لأن ممكن لو لبست دبله منه يقلعها في اي وقت ويلبسها تاني ويرجع يقلعها وهكذا


+ البيئة المحيطه
-------------------
للبيئة عامل مهم جدا علشان يحصل اندماج وتكيف بين الاسرتين
لان الزواج مش شخص بيتجوز شخص بل عيله بتتجوز عيله كامله
مينفعش اجوز واحد بيمسح ايده في هدومه بعد مايخلص اكل بواحده بتغسل ايدها تلات مرات بعد الاكل
كل ده انا بتكلم عن كيفية اختيار شريك الحياة .. يعني احنا لسه بنختار بالعقل ونشوف مين يناسبنا


+ التكافئ الفكري
-------------------
مجيش مثلا واخلي دكتور يتجوز واحده خارجه من الاعداديه لمجرد انه اعجب بيها
لان ده هيأثر جدا علي المستوي الثقافي والتربوي في تربية الاطفال
وكمان هيأثر علي لغة الحوار بين الطرفين .. لانهم هيشعروا بفجوة كبيرة جدا في التفكير مابينهم


+ العنوسه
-------------
فيه بنات وولاد بيختاروا اي حد لمجرد انهم خايفين يدخلوا مرحلة العنوسة
وده خطر جدا لأنهم بالشكل ده هيهربوا من مشكلة ويقعوا في مشكلة اكبر بكتير ... لازم اختار بعناية وتركيز ومخليش اي حاجه تأثر علي تفكيري


+ فرق السن
---------------
الموضوع ده بقي ليه شقين مختلفين
فيه واحده ممكن تكون صغيرة تتجوز واحد اكبر منها بكتير جدا
لمجرد انه غني وهي في احتياج لمصاريف كتيرة وانها تعيش حياة كريمة
وده بيكون ناتج لحرمان قوي جدا عاشته وهي صغيرة ...
والنوع ده بيحس ان الشخص الكبير في السن ده بيكمل نقص هو في احتياج لمن يكمله له
وفيه نوع بيختار شخص مناسب يكون الفرق لا يقل عن سنتين ولا يزيد عن خمس سنوات .... حتي يقوموا بعمل توازن فكري سويا

----------------------------------------------------------------
فيه صفات مهمة جدا لازم تتجنبها عند اختيار شريك حياتك
----------------------------------------------------------------
1- العين الزايغه : اللي ممكن تتسبب في خيانه احد الاطراف للطرف الاخر

2- الإجتماعيه الذائده عن اللازم : لأن ده هتلاقيه بيعمل حوار مع اي حد رايح او اي حد جاي دون الاهتمام لمشاعر حبيبه

3- الملابس العارية : فيه بنات بتحب تظهر انوثتها في ملابسها وليس في اسلوبها ورقتها ... والنوع ده بيسبب مشاكل كبيرة لأن كل فرح هترحوه مع بعض كل لما يكون فيه درجة قرابة قوية مع اصحاب الفرح كل لما العري يكون اكثر واكثر ...

4- الاسراف : الاسراف ليس كرم كما يظنه البعض ولكنه بدايه خراب البيت

5- البخل : البخل ليس حرص ولكنه جوع وعطش ونوم من غير عشاء

6- الصوت العالي : علي الرغم ان الوضع بيكون متقبل نوعا ما في عادتنا الشرقيه لما نلاقي راجل صوته عالي الا انها دكتاتورية منه لفرض رائيه بصوته .. ام الصوت العالي للسيده علي زوجها فده معناه عدم احترامها له
---------------------------------
اكرر ان لكل شخص متطلبات خاصة .. بمعني فيه واحد معندوش مانع انه يتجوز واحده من بيئة اقل منه بس المهم تكون متعلمة ..
وفيه نوع ممكن يوافق انه يتجوز واحده مش متعلمة بس ابوها رجل غني

يعني لكل واحد متطلباته اللي بيختارها .. وانا هنا بعرض ليكم بعض المقترحات وشوف انت ايه ممكن تتنازل عنه وايه ممكن متتنازلش عنه

في الاول ولا في الاخر دخل ربنا في الموضوع علشان يرشدك
ومش عيب لما تركز في كل النقط دي لانك مش بتشتري موبايل هيقعد معاك سنه ولا اتنين
انت بتختار شريك حياة للعمر كله

للحوار بقية ...

[نونا بنت البابا]

اشكرك على المشاركة الجميلة
ربنا يباركك

[روشا الفرفوشه]

ميرسى على مشاركتك الجميله