العرش العظيم دا لمين؟!(القديسة تاييس الخاطية التي تابت)

[walaa farouk]

راهب شاف عرش عظيم شايلينه الملايكة فى السماء..
قال فى نفسه دا اكيد للانبا انطونيوس او اب عظيم من اباء البرية ..
جاله صوت من السماء وقاله الكرسى دا "لتاييس "
الخاطية اللى تابت..

اتولدت القديسة تاييس فى اسكندرية فى عهد الانبا انطونيوس يعنى تقريبا فى النصف الثانى من القرن الثانى الميلادى..

كانت انسانة جميلة جدا امها مكناش كويسة لدرجة انها اودعت بنتها فى بيت من بيوت الخطية وهناك بدات حياة تاييس المقرفة..

مكنتش تاييس مجرد خاطية عادية دى من جمالها كان بيتلم حواليها اغنياء المدينة لما تمشى فى شارع النبى دانيال فى اسكندرية يرموا دهب وهدايا غالية تحت رجليها طمعا فى رضاها !!

سمع عنها الانبا سرابيون وراحلها لحد عندها فى عقر خطيتها وقالها انه يريدها فى مكان لا يراه احد فقالت هنا لن يرانا احد فقال لها اريد مكان لا يرانا فيه الله فخرت عند قدمه واعلنت له نيتها على التوبة وقالت لا يوجد مكان لا يمكن ان يرانا فيه الله ..

تاييس بعد كلامه جمعت كل لبسها الحرير ومجوهراتهم وهداياهم وفى قلبك يا اسكندرية كومتهم كلهم على بعض وولعت فيهم..

الناس كلهم كانوا مستغربين..

خدها الانبا سرابيون واودعها فى دير من اديرة العذارى فى قلاية فيها طاقة واحدة وطلب من الراهبات يدخلولها الاكل منها..

وسالته تاييس اصلى اقول ايه؟!
رد عليها وقالها الشفتان النجاستان دول ميستهولوش يقولوا اسم الله والايدين دول ميستهلوش يترفعوله ..

قالها بصى للسماء وقولى "يا من خلقتنى ارحمنى "
قعدت تاييس فى قلايتها تقول الجملة دى بس لمدة ٣ سنين..

بعدها راح الانبا سرابيون للانبا انطونيوس وقاله انه عايز يتطمن اذا كان الله قبل توبت تاييس ولالا..

جمع الانبا انطونيوس الرهبان وصلوا..

لحد ما راهب منهم شاف الكرسى العظيم دا اللى افتكره للانبا انطونيوس طلع لتاييس..

التوبة قادرة تغير..

تاييس التائبة فاقت اباء البرية بجملة واحدة كانت بتقولها بكل ندم ووجع ودموع غسلتها فابيضت ابيضت اكثر من الثلج 😍❤

يا من خلقتنى ارحمنى .. يكفى نصلى ونقوله ارحمنا وبس بيضنا زى تاييس نضفنا❤
بركة القديسة العظيمة تاييس معانا والمجد لله دائما...