اللي بيشيل قربة مخرومة

[walaa farouk]

اللي بيشيل قربة مخرومة..

كمالة المثل انها " بتخر علي دماغه" ..

هو الموضوع ده محتاج مثل ؟؟

ايوه ، لانك لو شلتها مخرومة و انت عارف انها مخرومة ، تبقي كارثة لانك مكمل في الغلط ،
و كان لازم توقف و تسد الخرم قبل ما تغرق ..

و لو سبتها تخر لغاية ما تغرقك تبقي كارثة اكبر ، لانك فاكر ان الخرم ح يتسد لوحده
، و كده ح تغرق خالص، و كمان ح تموت من العطش ،
و مش ح ينوبك من العند و الغباء الا الخسارة المضاعفة..

و هو فيه ناس بتعمل كده ؟؟

ياه ، كتير قوي قوي ..
نعمل قرار مندفع من غير ما نفكر و لا نستشير و لا نصلي و فاكرين ان كله ح يبقي تمام .
. و بسبب الجهل و العند و الغباء نكمل في اللي احنا فيه رغم "كل الخروم" االي مغرقانا ،
و ما نفكرش لحظة نعقل و نرجع و نصلح و نداوي ..

زي اللي داخل مشروع ، اي مشروع ( عمل ، سفر ، هجرة ، ارتباط)
من غير سابق دراسة و لا مشورة و لا صلاة ،
و اكتشف في الاول ان قراره غلط في غلط، بس مكابر و مكمل
علشان ما يطلعش صغير قدام نفسه و قدام الناس ..

قبل ما تشيل شيلة ، فكر في نتائجها، استشير كويس و اطمن ان ربنا معاك
و مباركك فيها و مريح قلبك و خطواتك..

و لو غلطت و اندفعت اوعي تكابر لان الغلط في أوله سهل
، و في الآخر علاجه مكلف و خسايره اكتر و اكبر ..

و ما تخافش في كل الاحوال ربنا دايما بيلم ورانا غلطاتنا..