شغلك الشاغل اني ارجع لتصميمي الاصلي

[walaa farouk]

اعتقد ان حياتي كانت ممكن تبقي اسهل من غيرك،
بس كانت هتبقي هايفه وبدون معني.
كل السنين دي ومش عارف انت بتتصرف ازاي وبتعمل ايه
، بس مسنود لاني عارف انت مين.
نورك مزعج علشان فيه بتبان ضلمتي وده متعب ان ديما في ضلمه مهما عملت،
بس حبك لي حتى وانا ضلمة..بيقويني
سماحك لأمور وتركك لأمور تانية محبط ومربك، بس لما تفتح عين الغلام
ويشوف رؤي القدير والصور زي ما انت شايفها.. بيطمن.
صمتك هو أسوأ ما تصنعه لواحد معتمد عليك دايمًا،
بس في النهايه ده بيساعد في تطور شخصيته وايمانه وفكره وعضلاته في كل شئ
...وبعدها بترجع تتكلم تاني.
معرفتك صعبه ومنهكه وموجعه وغير محدودة، بس بتخلق عطش وجوع رهيب ليك أكثر.
الثقه فيك درب من دروب الجنون، بس حق.
لما بتجري بتقطع نفسي وانا بجري معاك، ولما اعوز انا اجري بتتمشي،
ونادرا ما مشينا جنب بعض بنفس السرعه، بس الحكاوي معاك ممتعه والأماكن
اللي بتاخدني فيها مليانه مغامرات.
انت ابويا اللي مرر ليّ رجولتي وقوتي، وكان ليّ ظهر وقت ضعفي وكسرتي.
انت صديقي اللي بنتحاجج سويا وممكن نتعارك كمان، بس رفيق الدرب الابقي والأفضل بجداره.
انت المحب الألزق من الاخ، محبتك دمرت مفاهيم البشرية عن المحبه وفضحت تشوهها.
انت سيد، شغلك الشاغل اني ارجع لتصميمي الاصلي وتميط اللثام عن هويتي الحقيقيه وكينونتي.