"متعملش نفسك عارف
وانت دافن عقلك فى الارض "
متعلمش .... حد حاجه وهى مش موجودة فيك
انت فاكر انه هيبقى كويس بالعكس لو أكتشف
حقيقتك كل القيم بتنهار جواه بسببك
متقولش ..... لحد وعد فى ساعة انت فرحان فيها
وفرحان انك بتوعده بس مش عارف ظروفك
ولا الزمن هيسمح انك تنفذ وعدك ولا لا
متكلمش .... حد تأدية واجب وخلاص
وانت عاوز تنجز بسرعه فى التليفون
بيبان اوى وهو بيحسها وبيعديها
متخليش .... بنت تتعلق بيك ولو شايفها هتموت عليك
بس مش هتناسب ظروفك وانت مش مستعد
ابعد عنها جرح القلوب صعب اوى
حتى لو زعلت منك لو فعلا بتعزها ابعد
متخليش ..... ولد يتعلق بيكى وانت مجروحه من ولد تانى
يفضل يعمل المستحيل عشان تحبيه
وانت كل اللى بتعمله بتقارنى بينه وبين حبيبك التانى
متخسرش .... حد واثق فيك واثق فيك بجد امسك فيه
ومتخسروش محدش بيدى لحد ثقه
ولا هتلاقى بسهوله حد تثق فيه كده
متتريقش ... مش عشان تثبت انك so funny
ودمك خفيف تتريق على اغلب واحد موجود
عشان تظهر وسط الناس
متدخلش ..... فى خصوصيات اتنين بيحبوا بعض
وبلاش تنصح حد بالغلط وتقوللها لازم يكون عندك كبرياء
هو اللى غلطان هو اللى لازم يتعلم يصالحك
الدنيا مش كده الدنيا ابسط من كده
متجرحش .... بنت مش جميلة فى عنيك وفى نظرك
بس هى اكيد جميلة فى نظر كل حد بيحبها
حاول تسكت بدل متقولها كلمه تجرحها
وتخليها معندهاش ثقه فى نفسها
مهو مش بالشكل صدقنى
متبصش .... للناس بشكلها ياما ولاد حلوين من بره من جوه قبور
وياما بنات جميلة من بره ومن جوة شياطين
راعى ..... انك لما تشترى حاجه غاليه وانت عارف
ظروف اللى قدامك كويس مش لازم تتباها
وتقوله عارف دى بكام ومنين
هو مش هيحقد عليك بس هو مره مع مره
هيتخنق من الزمن ومن ظروفه
يعنى فى كل حاجه قلتها " راعى مشاعر الناس "
متعملش نفسك عارف وانت دافن عقلك فى الارض
وخليك جنتل فى اسلوبك خليك حد راقى فى التعامل مع الناس
على فكرة الرقى بالاسلوب مش بكمية الفلوس ولا انك ساكن فين
واعرف انك لما بتعامل الناس فى ادق الامور ومش بتجرحهم
انت فى نظر نفسك قبل نظرهم انت انسان
حد عندك احساس وحد محترم
