معنديش مشاعر ليك

[walaa farouk]

"معنديش مشاعر ليك"
جملة لخصت قصص حياة ناس كتير قوي
ازاي د المفروض تكون بتحبه قوي
يوصلك للنتيجة دي
انك مش قادر لا تحبه
والكارثة الاكبر
ولا تكرهه
مرحلة غياب المشاعر بتبقى عامله زي تنميل الاطراف كدة
مش حاسس بيها
بس لو حد خبطها ممكن تبدأ تحس
والسؤال الآن
ايه اللي يوصلنا للمرحلة دي
حاجات كتير قوي
اخطرها
#العشم
لما تحط آمالك وأحلامك سواء بقصد او بدون قصد
على حد بتحبه قوي
وتلاقيه بيبعد
او بينسحب
او بيتخلى عنك
وبعدين تتكيف مع الانسحاب دة
بس تلاقي الدنيا مش بتسيبك في حالك
تلاقي الدنيا بتخبط على الجرح بشاكوش
لحظات #تخلي بتصعب على نفسك فيها
لحظات #وحدة بتحس آآآآه لو كنت هنا
لحظات #رعب و #خوف بتبقى محتاج حد يطمنك
لحظات #حيرة بتبقى محتاج حد يرشدك ويساعدك
لحظات #خطر بتحس انك محتاج حد يحميك ويبقي في ظهرك
كل لحظة من اللحظات دي بتقوي قلبك
ما أنت اتعلمت ازاي تسلك لوحدك في الدنيا
وازاي تطمن وتأمن وتحمي وتصبر
نفسك
خلاص بقى
سيبوني في حالي
ويلف الزمن وتلاقي اللي باعك
جاي بيدور عليك
واللي داس عليك علشان يكمل طريقه
بيرجعلك في ضعفه
وبيمسك فيك
وتقع في بير غويط ملوش قرار
بين حرب الذنب و التقصير
وحرب الغضب من الظلم و التخلي
بصراحة
محدش ساعتها هيقدر يقولك ايه الصح وايه الغلط
انت وربك بس هتبقوا المعيار
لانه هو الوحيد سبحانه اللي خاض معاك الرحلة
وحس بكل محطة فيها
وعارفك دلوقتي
#أنت_مين