يوميات ونيس

[walaa farouk]

اغلبنا عارف مسلسل اسمه "يوميات ونيس"
وقت عرضه أول مرة كان كل جيل الثمانينات
والتسعينات تقريباً بيتابعه..
ونجح جداً للدرجة اللي خلت صناعه يعملوا منه كذا جزء
وأعتقد إن سر نجاح المسلسل ده
مش بس لأن أبطاله كانوا ممثلين رائعين..
لكن لأنه قدم رسالة مفتقدينها في مجتمعنا الشرقي..
مضمون الرسالة دي إن أي حد فينا وارد إنه يغلط..
سواء كان ولد أو بنت.. كبير أو صغير..
محدش فينا كبير على الغلط..
والأروع كمان إن لما حد كان بيغلط في المسلسل..
كان بيعترف بغلطه قصاد الكل وبيعتذر عنه..
وبيحاول إنه ميكررهوش تاني..
علشان كده أغلب الأطفال وقتها
لقى قدوة في شخصياته..
لأنهم كانوا حقيقيين جداً في كل أفعالهم،
حتى الغلط منها..
وفي الواقع إحنا محتاجين نلاقي ناس حقيقيين
يكونوا قدوة في حياتنا..
ناس بتغلط لأنهم بشر وبتعترف بغلطها من غير كسوف
وبيحاولوا إنهم يصلحوا من نفسهم وميكرروش غلطهم..