عايز كله

[walaa farouk]

تأملات_في_سفر_صموئيل_الأول
الأصحاح_الخامس
عايز_كله



أصحاح النهاردة بيكشفلنا على تحدي كبير بيحصل جوانا واحنا ماشين في الطريق
وفي علاقتنا مع ربنا، ان بنبقى عايزين كله.
الفلسطينين كانوا عايزين تابوت الرب وداجون، بس كان داجون بالنسبالهم اهم
، فأي مكان يتواجد فيه تابوت الرب وبيقع داجون،
كانوا بيقرروا ان تابوت الرب هو اللي يمشي وداجون يفضل موجود.
في الأغلب ده بيحصل مع داجون كتيير في حياتنا، أمور عايشة جوة قلوبنا متمسكين بيها، بنعبدها،
مش بنقدر نستغنى عنها، آلهة كاذبة، أفكار شهوة، مواقع مش مقدسة،
علاقات اعتمادية، علاقات غير مقدسة متمسك ان اكمل فيها، رياء، كبرياء، حب المال والاعتماد عليه،
افكار ادانة وانا الأفضل، حب الذات وتدليلها، ...... أمور كتير، في كل مرة الرب بيفتقدني وبدعوه ان يدخل جوة قلبي واقله انا عايز يارب اكون علاقة حقيقية معاك، يجي ربنا يقلي مينفعش اكون انا وداجون جواك، مينفعش اكون انا والخطية، اول ما الاقي ان الحاجة اللي بحبها هي اللي هتمشي، بقرر وبيكون الاسهل بالنسبالي ان اخرج ربنا من حياتي واقله المنطقة دي انت ملكش دعوة بيها، دي حياتي الخاصة، اللي بيني وبينك الأمور الروحية لكن باقي أمور حياتي اعيشها بالطريقة اللي تريحني.
بس للأسف مينفعش ربنا يسكن في أي مكان وخلاص، مينفعش القلب يعبد سيدين،
ربنا قال كدة لتلاميذه وبيقلنا كدة النهاردة، ان اللي يحبني يحفظ وصاياي واللي يحفظ وصاياي ويعيش بيها اجي انا والآب وعنده نصنع مسكن. لو عايز النهاردة يسوع يسكن في قلبك، سيبه يطرد كل داجون جواك، سيبه يكسر رأسه (يحررك من كل افكار شريرة وغير مقدسة) سيبه يكسر ايده (كل إرادة وكل مشيئة خاصة بيا). اديله مساحة ينتصر جواك وبيك ومعاك على الخطية وتعيش في حرية مجد أولاد الله

[لولى]

تاملات جميلة
ربنا يفرح قلبك

[walaa farouk]

ميرسى على مرورك الغالى