ما كله بيعمل كدة

[walaa farouk]

تأملات_في_سفر_صموئيل_الأول
الأصحاح_الثاني
ما كله بيعمل كدة



من الأمور اللي بتعطلنا كتير في مسيرة تغييرنا، اننا بنردد كتير #ما_كله_بيعمل_كدة
بنحس ان طول ما كل اللي حوليا بيعمل كدة، وان بدل ما جيلي عايش بالطريقة دي يبقى انا مفروض اعيش بالطريقة والسلوك ده، كل اللي اعرفهم بيشربوا سجاير، كل اللى اعرفهم بيلبسوا كدة، او بيتاخروا عادي، او...
أصحاح النهاردة بينورلنا ان في نماذج منيرة وسط جيل معوج وفاسد
صموئيل النهاردة هينورلنا مبادئ مهمة تفرق في مسيرة تغييرنا أمام الله

• بالرغم ان كان ابناء عالي الكاهن وغلمانهم وصموئيل بيخدموا في الهيكل، لكن كان كل واحد ليه توجه مختلف،ابناء عالي الكاهن وغلمانهم بيسرقوا التقدمة، ويضاجعوا النساء، في الوقت اللي كان صموئيل الصبي بيتمم خدمته أمام الرب وبيكبر عند الرب. محتاج كل واحد مننا يراجع وجوده جوة الكنيسة، هل انا موجود عشان كل اصحابي دخلوا الخدمة دي، هل انا بسرق النفوس ليا، بسرق مجد الرب ليا، ولا انا بخدم من أجل الرب ومجده

• صموئيل مابصش على ابناء عالي الكاهن وقال شوف الخدام والكهنة بيعملوا ايه، واذا كان الخادم بيعمل كدة يبقى من حقى انا كمان اغلط، لكن صموئيل فضل متمسك وبينمو في البر والصلاح لدى الرب والناس

• أوقات كتير بنلوم الظروف وبنقول لو كنا اتولدنا في بيت غير ده، كان حالنا هيبقى افضل، او لو كنت في شغل غير ده، او وضع غير اللي انا فيه حاليًا، لكن صموئيل النهاردة بيقلنا ان الفكرة في اتجاه القلب واحساسك بالمسئولية مش في الوضع اللي اتوجدت فيه، رغم ان ابناء عالي الكاهن، دول موجودين في بيتهم وابناء كاهن، لكن مكنش عندهم احساس بالمسئولية ناحية الرب وبيته وخدمته، ولكن صموئيل كان بعيد عن بيته، وفي وسط الشر والفساد حافظ على خدمته امام الرب وفضل ثابت بقلبه واعماله امامه

بنشجعك النهاردة لو ربنا بيفتقدك انك تطلع من دايرة شر معينة او تبطل حاجة معينة، لكن بتسد ودانك عن الصوت وبتقول كله بيعمل كدة، ابدا خد خطوة مختلفة، خليك نور وسط الضلمة، خليك ملح لجيلك. لو موجود في خدمة وعينك شافت اخطاء في اخوك صلي عنه وعن ضعفه، لكن متخليش غلطه مبرر لغلط اكبر ليك. لو انت موجود في بيت أو شغل أو وضع اجتماعي معين وحاسس انه هو السبب ان علاقتك مع ربنا ترجع لورا،اتشجع النهاردة واطرد الفكرة دي واقف امام الله واطلب منه ان يديك قلب ثابت امامه بالرغم من الظروف