تعالوا نعيش تاني زي زمان

[walaa farouk]

ذكريات الزمن الجميل

. . أمى بتسلم عليكم وبتقولكم عايزين بصلتين ..
. . أمي بتسلم عليكم وبتقولكم دوقوا الملوخية بتاعتنا

. . أبويا بيقولكو هيفوت دلوقتي على عم صلاح علشان يزورو عمي حسين علشان عيان

. . ياابا عم نصحي جارنا ضربني ...اكيد انت عملت حاجة غلط علشان يضربك

. . هاتي يابت الطرحة ألبسها علشان هنشر الغسيل

. . اومال فين كيرلس ...تلاقيه نام عند مينا جارنا علشان هم كانوا بيلعبوا مع بعض..

. . مش هتاكل يا سيد ..لأ خالتي أم مجدي حطتلي آكل مع ابنها مجدي وأنا بكتب الواجب أنا وهو

. . روحي يامديحة قولي لخالتك أم سمير جارتنا عايزين ننشر بئيت الغسيل عندك علشان بلكونتنا مش مكفية .

. . مترزعش الباب ياابني واطلع براحة عالسلم احنا بئينا العشا والناس نايمين متقلقهمش

. .

. . ياأمي ياأمي فادي جارنا خربش أخويا وعوروا في دراعه ...معلش يابنتي هم بيتخانئوا وبيتصالحوا تاني روحي اندهيلوا علشان احطلو مكركروم .

ياااااااااااااااااااااااااا...
. . دي حياتنا لما كنا عايشين
. . من امتى ومحدش خبط على باب حد وطلب
طماطم أو بصل أو خبز او حتى نعناع

. . من امتى ومحدش زار جاره المريض أو حتى من غير مرض وشرب معاه الشاي وقرب منه

. . طب كام مصيبة حصلت لما عيل اتخانئ مع جاره وممكن تطير فيها رقاب

. . طب كام مرة وصينا ولادنا ميزعجوش الناس ويحترموا وجود بشر عايشين معانا

. . صحيح كانت البيوت قديمة والحياة بسيطة لكن كانت القلوب حية والإنسان غالي

. . فقدناطعم الجيرة وفقدنا التواصل بالود . كانت القلوب طاهرة
. . وجملة (أمى بتسلم عليكم) كانت عبارة جميلة بتعبر عن جمال المحبة . .
. . وجمال روح الجيران
. .

. . واليوم لم تعد الحياة لها طعم بعد الاستغناء عن الجار والسجن بين أربع حيطان

. .
. . تعالوا نرجع نحب جيراننا ونتعرف عليهم
. . تعالوا نعتبر ولاد جيراننا زي ولادنا ونصبر على بعض

. . تعالوا نفوت على بعض في الاعياد والمناسبات ولو نسلم من عالباب ونقول كل سنة وانتو طيبين
. . تعالوا لو جارنا مريض نزوره ونطمن عليه وندعيله

. . تعالوا نحترم بعض ونراعي مشاعر بعضنا ونحب للجار مانحب لانفسنا
. . تعالوا نبطل أذى لبعضنا بالازعاج والصوت العالي وإلقاء القمامة ورزع الباب ولعب الاطفال في اوقات غير مناسبة

. . تعالوا نضحك في وش بعض مع مراعاة الاحترام والحشمة والعفة
. . يا ريت نرجع تاني يبقى لينا كبير نرجع ليه و يحكم بينا في المشاكل
. . تعالوا نعيش تاني زي زمان