اصبحنا ملك السوشيال ميديا

[walaa farouk]

النهارده انت مش بتشتغل عشان تكفّي نفسك وخلاص، انت بتشتغل بايديك واسنانك عشان تعمل فلوس،
عشان تقدر تعيش الحياة اللي بتشوفها ع السوشيال ميديا، دلوقتي لازم تفضل تحوّش طول السنه عشان تنزّل صور اسبوع الساحل ع السوشيال ميديا، ولازم تروح چيم عشان يبقى جسمك حلو وتعجب السوشيال ميديا، ولازم تحب زي اللي بيحبوا ع السوشيال ميديا، وتتجوز زي اللي بيتجوزوا ع السوشيال ميديا، وتخلف عيال تنزل صورهم ع السوشيال ميديا، وتلاقي نفسك في الاخر بتحقق احلام السوشيال ميديا، وانت يمكن كل احلامك تنزل تتمشى مع صحابك ف الشارع او تقعد تشرب كوباية شاى على القهوة !!

التمن اللي دفعناه للسوشيال ميديا هو اننا بقينا كلنا شبه بعض، والاكتر من كده حددت شكل السعادة فحياتنا فبقت كل البنات بتحلم بنفس بوكيه الورد ونفس الفرح الضخم و الصور والفديوهات ونفس فتى الاحلام، كل الولاد بتحلم بنفس الـ super model اللى بيشفوها ، السوشيال ميديا مبتحترمش اختلافنا، بالعكس بتتنمر على اي تميّز مش على هواها..

الناس مبقتش بتستمع باللحظة ..قد ما كل همهم يتصوروا الصورة الحلوة اللى هينزلوها على السوشيال ميديا .
.وكأن الصورة دى هى اللى هتخليهم مبسوطين !

الدنيا مبقتش بسيطة، السوشيال ميديا رفعت سقف طموحاتك،
فبقيت بتجري جري الوحوش عشان تعرف تجاري اللي بيحصل حواليك،
والاهم انها انتزعت منك رضاك بحياتك، لا يمكن تكون راضي بشكلك
وانت عامل follow لكل الـ models دول، لا يمكن ترضى بمرتبك وانت متابع اجور الفنانين في مسلسلات رمضان،
عمرك حتى ما هترضى باسبوع الساحل وانت شايف الناس بتسافر المالديڤز، فتكتئب وتحس ان حياتك كلها ملهاش هدف ولا معنى
، وتحس انك كومبارس، وانت اصلا بطل حكاية عظيم، وأب عظيم وأخ عظيم، انت بس اللي مش واخد بالك..
حقق ذاتك و حلمك و دور على اللى يبسطك مهما كان
مختلف او بسيط ، دنيتك و نظرتك للحياه هتختلف..