محتاجين نفهمهم اكتر .. محتاجين نلومهم أقل

[walaa farouk]

لما تقول الأم انها تعبت ، ده كل اللي قصدته
مقالتش انها هتترك اطفالها وتنسي انهم موجودين

- لما تقول الأم انها محتاجه وقت لوحدها ، ده كل اللي قصدته
مقالتش انها ندمانه انها بقت أم ، ولا ان الأمومه غلطه عمرها

- لما تقول الأم انها محتاجه مساعده علشان تنجز شغلها ، ده كل اللي قصدته
لكن مقالتش انها عاجزه عن انجاز مسؤلياتها

- لما تقول الأم انها نفسها تخرج مع صحابها ، ده كل اللي قصدته
مقالتش انها كرهت الأمومه وتتمني ترجع للعزوبيه ، ولا قالت انها مش اد المسؤليه

- لما تقول الأم انها خايفه وقلقانه ، ده كل اللي قصدته
مقالتش انها هتختفي وتتنازل عن مواجة صعوبات بيتها

- لما تضطر الأم تعمل مكرونه علي العشاء ، ده مش معناه ان المكرونه الوجبه اليوميه لاطفالها ولا معناه ان اطفالها ميعرفوش الخضروات واللحوم

- لما تسمع ام بتزعق ، ده معناه انها اتكلمت ٣٠٠ مره بهدوء قبل كده

- لما تدخل بيتها وتشوف البهدله ، ده مش معناه ان بيتها كل يوم متبهدل

- لما تشوفها متعصبه ومتوتره ده مش معناه انها اتجننت
، ولا معناه ان كل يوم ده حالها وشكلها
في سيناريو كامل انت متعرفهوش ، في جزء مخفي عن عينيك

الطبيعي منتخيلش اسباب للحكم علي الآخرين
ناهيك بقي عن أم واقفه طول اليوم لوحدها
كل الأيام ، كل الاوقات .. بتتنازل عن حياتها الشخصيه علشان حياة كائن تاني يقدر يعيش
كائن تاني أمنت ان حياته اهم بكتير من حياتها

مفيش انسان يقدر يتخلي ويتبرع ويتنازل بقدر الأم ..

الامهات ...
محتاجين نفهمهم اكتر .. محتاجين نلومهم أقل