معلومة بخصوص سمك القراميط

[walaa farouk]

أولا خليني اصلحك معلومة بخصوص القراميط.

مفيش سمكة بعينها إسمها قرموط! مفيش نوع سمك معين إسمه قراميط لا.. دي رتبة كاملة من الاسماك البحرية تحتها أنواع كتير جداً جداً من الاسماك بيجمعهم صفات كتير منهم انه عندهم شنب يشبه شنب القطة ومن هنا تم تسميتهم catfish او بالعربي سمك السلور او القرموط.. يعني الما بنشتري سمك القراميط، دا مش إسم السمكة، دا نوع من أنواع كتير من القراميط.

ثانيا.
نهر النيل من أكثر الأماكن المليانة بانواع كتير ومختلفة من القراميط، كل نوع منهم مميز عن التاني في الخواص والشكل والطعم والحجم.. في من أول طول صابعك ولغاية بطول شخص بالغ قادر يشدك وينزل للأعماق وماتقدرش تطلع فوق تاني.

من أنواع قراميط النيل دي بقى صدق او لا تصدق، انه في نوع بيكهرب اسمه السلور الكهربائي ودا بيطلع صدمات كهربية قادرة توصل ل400 فولت وممكن تموت الإنسان..

جدي وجدك بجانب إنهم كانوا شايفين اهمية كبيرة للقراميط وإعجاب بقدرتهم وقوتهم وتنوعهم، لكن هما كمان برعوا في استخدام القراميط دي في الطب.. قدماء المصريين كانوا بيستخدموا الشحنات الكهربية دي في علاج آلام العضلات والتشنجات والتهاب المفاصل.

مش بس كده، دول كانوا بيدوروا على احجام معينة من القراميط الكهربية دي عشان يضمنوا إنه الشحنة الكهربية بتاعها مناسبة لحجم ومقدار الألم، ماتكونش شديدة فتقتل ولا ضعيفة فملهاش تأثير.

الكلام دا كان من 4000 سنة، دلوقت مؤخرا بدأنا نستخدم الشحنات الكهربية البسيطة في اجهزة معينة لعلاج الالتهابات دي..
الكلام دا كان من 4000 سنة وهما بيستخدموا الكهربا للعلاج، احنا اكتشفنا الكهربا وتعاملاتها من اقل من 200 سنة.

هما عرفوا الكلام دا إزاي! لو العلوم والاختراعات والاكتشافات دي فضلت مستمرة، كان زمانا دلوقت عاملين حضارات متقدمة على كواكب تانية وخارج المجرة نفسها.