متقوليش لبنتك إنها حلوة

[walaa farouk]

متقوليش لبنتك إنها حلوة
=============



الحوار ده بيتقال في بيوت كتير:

- أنا مش حلوة يا مامي.. و صحابي و قرايبي كلهم أحلى مني😔..
- لا يا حبيبتي، انتي قمر.. ده انتي أحلى بنت أنا شوفتها في حياتي..
- لأ، أنا مش حلوة ، و دي حقيقة.. أنا كان نفسي ابقى حلوة زي صاحبتي..
- الجمال جمال الروح يا حبيبتي، مش كل حاجة جمال الوش..

الحقيقة ان الحوار ده رايح في سكة مش اللي هي خالص، و انتي بتيجي تكحليها، بتعميها الحقيقة 😅..

كل الناس تقريبا بلا استثناء بيحكموا على نفسهم إنهم مش حلوين .. طيب ليه الحكم المتعسف ده؟؟..

📌الأبحاث بتقول إن الإعلام، الأفلام و المسلسلات ، بيعلمنا إننا نحكم على نفسنا و كمان الآخرين من خلال المظهر.. هما دخلوا في دماغنا كده... و أصبح ال benchmark أو المعيار بتاع الجمال عند المراهقات هو إنهم يقولوا مثلا دي حلوة زي جيجي حديد ( والله ما أعرفها غير دلوقتي، بس أنا سألت مين مثل الجمال عند المراهقين دلوقتي، قالولي دي واحدة منهم.. أنا كنت هقول جوليا روبرتس الصراحة، ده كان آخري في أجيال الممثلين 😄، بس الجيل ده بيتابع ناس تانيين طبعا)..

📌طيب، إيه سبب إن البنت ممكن تشوف نفسها وحشة؟..

1. بناتنا كل ما بيبصوا في المراية، مبيدوروش على إيه الحلو اللي في وشهم، هما بيشوفوا كل حاجة وحشة، زي انها بتشوف ان مناخيرها الكبيرة أو حاجبها التخين، أو سنتها المعووجة حاجة وحشة، و يتشوف الحباية اللي طالعة جديد في وشها كبيرة جدا، و كل الكلام ده مبيبقاش حقيقة، هي بتشوف تفاصيلها بطريقة مبالغ فيها و كمان وجود الهرمونات الملخبطة بتخلي شكلهم يتغير عن الطفولة كتير.. و مبتشوفش إن فيه سنتيمتر واحد كويس في وشها أصلا..

2. البنت بتشوف نفسها وحشة دايما بسبب ال attentional bias أو التحيز المتعمد اللي هو إن الشخص يدقق جدا في عيوبه و يفكر فيها طول الوقت أكتر من الوقت اللي بيخصصه إنه يشوف الحاجات الحلوة اللي فيه، طبعا العيوب تكسب.. جليب تسيبورسكي الباحث في السلوكيات بيقول إن ده طبعا بيخلي حكمها على نفسها من أسوأ ما يكون لدرجة إنها بتغرق في عيوبها فقط و الفكرة بتبقى مسيطرة على مخها طول الوقت..

3. قرايبها اللي مبيوزنوش الكلام قبل ما يقولوه و عايزين يحطوا عشر فلاتر على بقهم.. اللي تقولها "إيه ده؟ انتي مامتك بيضا و أختك بيضا، انتي طالعة سمرا لمين؟".. أو واحدة تقولها، "مناخيرك كبيرة، معلش انتو كلكو بيبقى شكلكم كده و انتو في السن ده، متقلقيش شكلك هيتعدل لما تكبري".. ده بقى سواد السواد بصراحة.. الناس دي توقفيهم عند حدهم فورا لأنهم هيعقدوا بنتك like forever..

4. فقدان الأمان ، و دي راجعة يا إما لانتقاد كتير في أي حاجة، مش شرط الشكل و لا اللبس، يعني في مذاكرة، صلاة، طريقة أكل.. أو بتفقد الأمان من كتر الضغط لأن الأهل بيسعوا دايما إن بنتهم تبقى مثالية في كل حاجة..

5. من الأسباب القوية كمان في الموضوع ده إن بعض الأمهات بيبقوا عايزين بنتهم تبقى واثقة في نفسها، فتفضل تقولها إنتي حلوة طول الوقت و من صغرها و هي بتسمع الكلام ده بلزمة و من غير لزمة، فالبنت تحط قيمة كبيرة جدا لموضوع الجمال، فلما تكبر، هتلاقي عشروميت حاجة مش عاجباها في وشها، ولأنها متربية على إنها حلوة، ف وشها و مظهرها هيبقى كل حاجة بالنسبالها، ف طبعا هتشوف نفسها معادتش حلوة زي الأول..

قرأتي الأسباب؟؟؟
📌📌اتأكدي إنك قرأتيها الأول قبل ما تقرئي الحلول، و اكتبي ورايا علشان الكلام ده مهم و عايز هدوء:

1. لما بنتك تيجي تقولك إنها وحشة، متقعديش تثبتي و تأكدي أد إيه هي جميلة و إنك شايفاها أحلى واحدة في الدنيا.. ده مش وقته، ممكن تقوليلها كل ده بعدين.. هي دلوقتي مش سامعاكي أصلا ، و مش ده اللي هي عايزة تسمعه دلوقتي خالص.. اسأليها " انتي ليه بتقولي كده؟".. "طيب إيه اللي انتي شايفاه مش جميل فيكي؟"... بالراحة كده و خليكي هادية، خلي المناقشة بينكم تطول على أد ما تقدري و اسمعي أكتر ماتتكلمي.. و لما تقولك على واحدة من اللي بيختاروهم في مسابقات ملكات الجمال اللي مقاييسهم فيها طبعا غريبة جدا بخصوص الطول و الوزن، قوليلها مثلا، دول بيشترطوا عليهم يكونوا رفيعين أوي و إن دي عنصرية، المفروض إنهم يتقبلوا كل البنات سواء كانوا رفيعين أو تخان، كل البنات حلوين، كل البنات طعمين، هزري معاها وضحكيها بس مش باصطناع.. فكي الجو بس جوه الموضوع، متخرجيش براه.. المناقشة دي هتلاقي نتيجتها مذهلة.. هتلاقيها بعبعت باللي جواها إذا اديتيلها الأمان و سمعتيها كويس من غير ما تحاولي تثبتي العكس.. هي أصلا ممكن جدا ترتاح لمجرد إنها عبرت عن اللي جواها.. و أكيد كمان إنتي هتفهمي منها حاجات كتير تاعباها و هتفهمي ليه الصورة المشوهة دي جواها.. دي أهم خطوة في الموضوع كله لأن الحوارات المفتوحة بينكم بتقلل الضغط عن مخها و بتخليه يرتاح و يهدى، فتقدر تفكر بصورة أوضح..

2. متحاوليش تجيبي أبحاث تثبتلها إن حتى الناس الجميلة مش سعداء.. فيه أبحاث كده فعلا.. بس دي طريقة سيئة جدا لتربية بنتك، انتي كده بتعلميها إن أكيد كل الناس عندهم حاجات وحشة بردو.. و إنها تتعود إنها لو لقت حد أحسن منها في أي حاجة، هتدور على الحاجة الوحشة اللي فيه.. لأ عادي، فيه ناس حلوين و عندهم كل حاجة، ربنا يباركلهم..

3. هاتي ورقة وقلم و خليها تقول الحاجات الحلوة اللي فيها سواء الشكلية أو صفاتها الحلوة، و اكتبي وراها، و فكريها بالحاجات الحلوة اللي انتي شايفاها فيها.. املي الورقة كلها و خليها تعلقها في أوضتها.. دايما الكلام لما يبقى قدامها مخها هيلقطه طول الوقت و هيصدقه بسبب وجود جزء في المخ اسمه reticular activating system، بيخلينا نلقط بحواسنا الحاجات اللي احنا بنفكر فيها..

4. اسأليها صحابها مصاحبينها ليه؟؟ هتقولك أسباب ملهاش دعوة بالشكل خالص، و ده إثبات ضمني إن الجمال جمال الروح من غير ما نقول كليشيهات مش مقنعة..

5. في مناسبات مختلفة، امدحيها في الحاجات الحلوة اللي بتعملها، مثلا " انتي شاطرة في تلييق اللبس و الألوان على بعضها، إيه الشياكة و الذوق العالي ده يا ناس".. أو "ستايلك في تسريحات شعرك حلوة جدا، متعمليلي تسريحة زي بتاعتك علشان ابقى حلوة زيك كده"..

أيوة طبعا هتقوليلها إنها حلوة و قمر و جميلة، بس من غير تصنع و من غير إثبات و مش في الوقت اللي هي متوترة فيه.. كلنا محتاجين نسمع how beautiful we are بس في وقتها و مكانها الصح..

[مورا مرمر]

موضوع حلو جدا
ربنا يفرحك

[Mary Naeem]

موضوع مميز
ربنا يباركك

[walaa farouk]

ميرسى على مروركم الغالى