قررت ابعد

[walaa farouk]

الي صديق و اخ غالي جمعتنا الايام ..

ايوه باحبك، و ما تستغربش اني بعدت عنك ..

بعدت عنك بعيني باحاول علي قد ما اقدر ما اقابلكش،
و بعدت بعقلي باحاول برضه علي قد ما اقدر ما افكرش فيك ،
و بعدت بمشاعري، باحاول بكل قوتي ما افتكرش ذكريات محبتك
و اقارنها بالجفا اللي بقيت تعاملني بيه..

عارف بعدت ليه ؟ لاني باحبك يا صديقي ، و عايش علي ذكريات زمان معاك،
و مش قادر اشوفك بعد ما اتغيرت و الجفا ملا قلبك ..

حاولت اقرب تاني و افرح معاك بفرحة زمان بدفء صداقتك ، لكن لقيتك اتغيرت
، بقيت واحد تاني، خرجتني من دايرة اهتماماتك، و بقيت تعاملني كواحد عادي
، ترد علي وقت ما تبقي فاضي ، و تمن علي بوقتك لما اجي علي بالك..

كنت اتصل بيك الاقيك مستنيني علي شوق ، عاوز تسمعني و ملهوف تقعد معايا
، دلوقتي مش فاضي حتي ترد ، و لا لي في قلبك مكانتي الاولي..

ما فهمتنيش و لا حاولت تفهمني ، و ما سمعتنيش ،
و حتي لما سمعتنى ما حسيتش بأي كلمة قلتها .. بدلت مشاعرك لي ،
و قفلت قلبك، و رميت اللي بينا ، و خليت حبي ليك رخيص ،
اتصل و اجري نحوك و انت قافل بابك و قلبك ، و قررت انك تقفل عني كل بصيص نور
من غير اي سبب و لا تفسير ..

علشان كده بعدت لاني لسه عاوزك في نظري كبير قوي ،
و تبقي آخر صورة ليك عندي هي احلي صورة ..

بعدت لاني لما جيت "مجرد اعاتبك" ، "مجرد اشرح لك الجرح اللي في"
، لقيتك مش هنا ، في حتة تاني ، و اعتبرت مشاعري المجروحة تطاول عليك .
. حتي نظراتك لي كانت باردة ، غير مودة زمان و كانك بتقول لي سافر و ما تجيش تلح علي تاتي ..

انت اتغيرت ، بس انا لأ..

بعدت لاني لسه باحبك ، و عاوز اشوفك كبير و ما تنزلش من نظري تاني ..

بعدت و انا بادعي لك ، و عايش علي امل محبتنا ترجع، بعدت و انا مخبي وجعي حتي علي نفسي ..

و حتي لو ما رجعتش لمحبتنا الأولي، ح اتني احبك ..