يسوع حبها حتى آخر نقطة دم من دمّاتو

[Mary Naeem]

يسوع حبها حتى آخر نقطة دم من دمّاتو
غسلتها من كل وسخ العالم




الناس حكموا عالزانية بالموت وجابوا حجار قاسية متل قُلُوبن تقيلة متل دمن تيرجموها وتموت …. يسوع شحَوَط عالرمل خطايا الانسان تتنمحى مع أول نسمة حب بتنسم عن تلة الجلجلة… وهيك سقطوا الحجار من عيونن وشافوا حالن قديش خاطيين أكتر منها بكتير…إجا يسوع حول هالحجارة ببركة يمينو ووقعوا ع جسموا جلدات قاسية وكرباج بيوجع والزانية لملمتن وعملت منن بخور بينحرق ع مذبح الرب بيوم الرب….
وصرخ يسوع أنا جيت كرمال زكا، كرمال الأرملة كرمال النازفة كرمال الأبرص كرمال المسكين كرمال المظلوم كرمال الضعيف كرمال المقهور كرمال المرضى مش المتعافيين…
والنَّاس بعدن هني ذاتن ركضوا ع أرض الوعر والهيش جابوا شوك بدل الورد وقندول بدل الغار وعملوا منن تاج العار بدل تاج الانتصار، وغرزوهن بكل قساوة ع جبين الفادي تينصبوا جهلن ملك ع عجبين الحق والحياة….
والرد كان من يسوع نقطة دم كرجت ع وجّو محت خطايا الزانية، وخطايا زكا، ردت الابن الضال اللي كان ميت متل كتير ناس اليوم بيتركوا بيوتن وبيهجروا أهلن تيصيروا يخطوا برياحة، بعد شوي بتلبدن الخطية بالارض وبتصير كرامتهن مرمغة بجيّة الخنازير وبدل ما يرجعوا ع بيت بيُّن بيجيبوا مسامير مجنزرة من حقدن معفنة من كرهن مجوية من خطيتهن وبيدقوها بايدين يسوع تيثبتوا منيح ع الصليب وما يعود قادر يفتحن ويضمن من جديد….
لكن قدر يسحب مسمار وياخد مطرقة وينحت عن جديد قلب جديد بيعرف يحب….
ومتل ما حكموا عالخاطية بالرجم حتى الموت، غفرلا يسوع بالصليب حتى القيامة… هني استغلوها، استعبدوها، سرقوا كرامتها مرمغوها بالوحل… ويسوع حبها حتى آخر نقطة دم من دمّاتو غسلتها من كل وسخ العالم…
واليوم اللي عم يزرع الزؤان بأرض جارو والشوك ع درب خلاص ونهضة البشرية بدّي قلوا ما تتعب وتعّب غيرك قبلك كتار اتهموا يسوع ببعل زبول وهوي يحبن شهدوا عليه بالزور وهوي يحبن فرقوا ولادوا عن بعضن وهوي يحبن…زرعوا شوك زرع الغفران زرعوا الفتنة زرع السلام زرعوا الكذبة زرع الحقيقة زرعوا الموت زرع الحياة.
ما تتعب وتيأس الناس، وتفكر انك ربحان، اذا قلت إنّو اللي عم ينعمل من خير حواليك هيدا لمجد الأشخاص وتفتيش رخيص عن الكسب المادي والمراكز الفانية بتكون عم تتحالف مع اللي اسمو شيطان… وانت وغيرك بتعرف منيح انو الشيطان بس يسمع اسم يسوع بيموت رعبة…. وانو العدرا دعست راسو بطاعتها ومار يوسف انتصر عليه بطهارتو…
اذا شوّهت سمعة غيرك حليف مين بتكون؟ وإذا شككت بنوايا غيرك حليف مين بتكون؟ وإذا زرعت الفتنة بين الناس حليف مين بتكون؟
قوم اتحرر وانفض غبرة الفريسية عنك، وبدل ما تقول عن فلان وعلتان خاطيين كيف يسوع بيفوت ع بيتن كيف بيسلم عليّن؟ وبدل ما ترش السم بعقول الناس قوم عْمول متل هالمرا اشتري قارورة طيب وطيب سمعة غيرك دافع عن الضعيف والمنبوذ… ابكي خطيتك تربنا يرحمك، وبدموعك غسل جرين الخاطي بدل ما ترجمو وتكسرلو جريه وما عاد يقدر يمشي وينهض بحالو وبغيرو، وإذا ما معك منشفة تنشف عرق اللي عم يتعبوا تترجع الحياة لأيا مريض، بشعراتك نشفهن وبرموش عيونك خدمهن بدل ما تساهم بهدهن انت وقاعد عم تعد خطايا غيرك….

اذا غيرك عم يشتغل قلو العوافي اسقيه كباية مي…. اذا عم يعمر قللو الله يعمر معك ساعدوا ببحصة… اذا عم بيصلي قللو الله يقدسك ضوي معو شمعة… ساعتها بتكون حليف يسوع وحليف الحياة…
أغفر لنا يا رب غلاظة قلوبنا واصبر علينا وارحمنا كثيرا رغم اننا نحب قليلا، حول” سيوفنا سككاً ورماحنا مناجل فلا نعود نرفع سيفا على أحد ولا نتعلم الحرب من بعد”(ميخا ٤ / ٣). آمين