زوادة اليوم : التّسرّع في الأحكام

[souad jaalouk]

زوادة اليوم: التسرّع في الأحكام

بدّي خَبّركُن اليوم قِصّة رجّال ضيّع فرّاعتو وفتّش عليها كتير، ولما ما لقاها، شكّ إنّو جارو يلّي ساكن بوجّو يكون هوّي اللي سارقها. عَ كل حال، هوّي كان بمجرّد ما يتطلّع فيه، يلاقي بمنظرو منظر سرّاق. إجمالاً، كل تصرّفاتو وحركاتو، تصرفات وحركات سرّاق. ولكن بالصدفة، هوّي وعَم ينكُش الأرض، فجأة، بيلاقي هالرِجّال الفراعة. وتاني يوم، لما تطلّع من جديد بجارو، بالحقيقة ما لقي شي، لا بمنظرو ولا بحركاتو ولا بتصرّفاتو، ما لقي شي أبدًا أبدًا يوحي إنّو حرامي.
الزوّادة بتقلّي وبتقلّك
شو رأيك اليوم، تشيل من فكرك كل الأفكار المسبقة، ومن قلبك كل الأحكام السريعة، وتقرّر تعطي لكل يلّي حواليك فرصة تانية، وتحِط بعينك نظرة الله وتشوف صورتو اللي فيهُن وتعاملُن على هيدا الأساس، والله معك.

[walaa farouk]

ميرسى على زوادة اليوم

[Mary Naeem]

وتحِط بعينك نظرة الله وتشوف صورتو اللي فيهُن وتعاملُن على هيدا الأساس، والله معك

آمين يا رب

[souad jaalouk]

مروركما الغالي أسعدني وشرّفني أختاي الغاليتان ولاء وماري لكما تحيّاتي