لو ركزت في حياتك شوية هتكتشف انه محدش يعرفك بطريقة كاملة، محدش شافك من كل النواحي. دايماً اللي حواليك يعرفوا عنك اجزاء صغيرة أو حقيقة ناقصة على حسب ما أنت قادر توصلّهم. والحقيقة انه صعب اوي تلاقي شخص يستحمل يشوفك ١٠٠٪ ، واللي حاصل أن كل واحد ارتاح يشوفك بزاويته الضيقة اللي مريحاه هو ومانعاك تطلع براها.
والحل ببساطة انك تلاقي حد يشوفك كُلك بصورة كاملة.. حد تحكيله وتوريله أنت مين بجد مش اللي قدام الناس. حد يبقى مُلم بكل تفاصيل افكارك وشخصيتك وطباعك حتى المُنفّر والمُتعب منها.
حد روحُه تساع روحك زي ماهي كدة بكل ابعادها..
صدقني وجود شخص في حياتك شايفك من كل النواحي وقابل اللخبطة والتناقضات اللي بيشوفها فيك ده شِفاء في حد ذاته.
وجود حد شايفك زي ما أنت من غير ما تبذل مجهود انك تتجمّل أو تشرحله أنت مين دي نقطة مريحة وآمنة اوي قليلين وصلولها.
فكرة انه في حد فاهمك بجد وقادر يشوفك من جواك كفيل بانه ينهي جزء كبير من احساس الوحدة والبرود النفسي اللي حاسُّه معظم الوقت.
18 - 03 - 2018, 07:36 AM
رد: الحل في حد يشوفك كُلك ويحبك على كدة
العرض المتطور