من واقع بيوت كتير (خواطر زوجين )

[walaa farouk]

بيقولوا وصلنا لحارة سد ..
وخلاص ماعادش فاضل حلول ..
وكل ما نقابل او نكلم حد ..
يدور وشه ويجرى علطول ..
ونرجع تانى لنقطة البداية ..
انت سبب اللى احنا فيه ..
لا يا هانم بداية الحكاية ..
انى سبتك تعملى اللى تعمليه ..
طب والعمل انا جبت اخرى ..
يعنى انا اللى مستحملاك ..
مانا كمان ضيعت عمرى ..
وانا عايشة حياتى فى هلاك ..
يعنى خلاص ده اختيارك ..
والفرحة كدة هتدق بابك ..
ولو ده اخر قرارك ..
هتقولى انتى سبتيه ولا هو اللى سابك ..
مش فارق معايا اللى هيتقال ..
هو مين كان عايش معايا ..
ولا مين قسم معايا الاحمال ..
ولا كان بيشوف بدالى اللى ورايا ..
شكلك زعلانة منى ..
طب وماله
ومين فينا ماتغيرش ..
ولا مين فضل على حاله ..
مش انتى بس اللى كان نفسك ..
فى اللى ياخدك فى حضنه ويضم ..
وزى ما كان نفسك ابقى ابوكى ..
حلمت اشوف فيكى حنية ام ..
انت شايفانى قدامك قوى ..
رأى وهيبة ..
ياما هنا وياما هناك ..
صح اللى شايفاه .. بس ناقص
انك تسألى ..
هو انت فيه حاجة واجعاك؟
ماتستغربيش من كلامى ..
الوجع مش ضعف .. ومش ضد طبيعتى
انا ممكن بسهولة ادمع ..
بس ما بحبش .. وبالذات قدامك انتى ..
اقول لك باضعف امتى ..
لما باشوف العند فى عينيكى ..
بابقى نفسى اقولك ارجعى ..
مش العند اللى هيهنيكى ..
باضعف كمان لما باشوفك ..
مصممة تكملى لوحدك ..
بابقى شايف فى عينيكى خوفك ..
وانتى نفسك حد يساعدك ..
عارفة ايه اللى بيمنعك ..
ان كبرياءك واقف قدامك ..
رغم انك لو سمعتينى زى ما باسمعك ..
كنتى عرفتى ان انا برضه هدفى سلامك ..
خلاص انت خلصت كلامك ..
وقلت كل اللى نفسك فيه ..
اسمعنى بقى شوية ..
ولو عندك حل قول لى عليه ..
يوم مارضيت بيك ..
كان عندى احلام من زمان ..
واللى شوفته يومها فى عينيك ..
هو اللى حسسنى بالأمان ..
بس اتبدلت كل الاحوال ..
ولقيتك واحد تانى ..
ما بقيتش عارفة انا ناسية احلامى ..
ولا احلامى هى اللى بقت ناسيانى ..
ومشيت فى الطريق المعتاد ..
بيت ومسئولية وعيال ..
واللى زاد وغطى .. كتر العناد ..
ضهرى اتحنى من كتر ما شال ..
مانكرش انى غلطت فى حقك كتير ..
ويمكن ماكنتش باحس باللى انت فيه ..
بس انت كان لازم تفهمنى ..
وتعلمنى اعمل ايه ..
استنى ماتكمليش ..
هنا سبب المشكلة ..
السبب .. مش انى ماعلمتكيش ..
السبب .. انك شايفة حد تانى مش أنا ..
انتى شايفانى قدامك قوى ..
رأى وهيبة ..
ياما هنا وياما هناك ..
صح اللى شايفاه .. بس ناقص
انك تسألى ..
هو انت فيه حاجة واجعاك؟
ماتستغربيش من كلامى ..
الوجع مش ضعف .. ومش ضد طبيعتى
انا ممكن بسهولة ادمع ..
بس ما بحبش .. وبالذات قدامك انتى ..
اصلك راسمة لى صورة ..
انتى بس اللى شايفاها ..
وكل يوم بتزودى رتوش اسوأ
لغاية مانتى نفسك ..
مابقيتيش طايقاها ..
وبرغم انى عندى الورق والالوان ..
وممكن ارسم بدل الصورة اتنين ..
بس انا عامل حساب الايام ..
ويوم ماتعرفى .. انا مين
اقول لك على سر بينى وبينك ..
ولو مش مصدقانى ..
هاتى عينى فى عينك ..
يوم ما اخترتك .. كان فيه غيرك كتير ..
بس عينى شاورت .. وقلبى دق ..
قلت خلاص .. هاديها حلمى ..
ودعيت يارب توافق وماتقولش ﻷ ..
رسمت الحياة .. بألون فانحة ..
وجيت عند حلمى .. وسبت مكانه ..
قلت اكيد هى هترسمه ..
طالما حبيتك .. يبقى هتفننى فى الوانه ..
ماتستغربيش دموعى اللى شايفاها دلوقتى ..
انا مش باتكسف ولا باخاف ..
دموعى على اللى راح دليل قوتى ..
مايفرقش مين عرف انى بكيت او حتى شاف ..
ممكن ماتكملش كلامك ..
انا عارفاك من يومها ..
وكنت باستغرب كتير تصرفاتك ..
شوية اقبلك .. وكتير بالومها ..
بس عندى ليك عتاب ..
مانا كمان قدامك مش انا ..
انا مش العندية بتاعة المشاكل ..
انا اللى معاشراك من كام سنة ..
باقولك ايه ..
ماتيجى نركن كل اللى فات ..
فى مكان قديم مهجور ..
وناخد بس منه الذكريات ..
اللى هتخلى اللى جى كله نور ..
حتى لو الذكريات مش كتير ..
افتكر اننا اللى عملناها ..
ومسيرنا نعمل زيها واحسن ..
حتى لو بقت قديمة ونسيناها ..
بس اقولك كلمة فى ودنك ..
احنا تاهت عن بالنا حاجة ..
نسينا ان ربنا تالتنا ..
وعمرنا ما بخل علينا بحاجة ..
من ولادنا لبيتنا لصحتنا ..
واحنا من غيره فعلا ولا حاجة ..
انتى كدة جبتى المفيد ..
اللى عمل فينا كدة ..
اننا فعلا بعيد ..
وعمالين نسمع لده وده ..
حتى الصلاة بقت شكليات ..
وكلامنا معاه كله طلبات ..
ورغم انه ياما عدت بينا مشاكل ..
عمرنا ما شكرناه على يوم فات ..
يعنى خلاص .. بداية جديد؟
موافقة نكمل اللى جى سوا؟ ..
وانت فكرك دا طلب يترفض ..
دانا انفذه على عينى .. هوا ..
ممكن ماتزعلش منى على اللى فات ..
او انى دايما فاكرالك السيئات ..
وانتى كمان حقك عليا ..
انى كنت با شوفك بس عندية ..
خواطر زوجين ..
من واقع بيوت كتير

[Mary Naeem]

او انى دايما فاكرالك السيئات ..
وانتى كمان حقك عليا ..
انى كنت با شوفك بس عندية ..
ربنا يفرح قلبك