الجحش

[sama smsma]

تنويعات علي اوتار انجيل مرقس
اصحاح ١١ ...نغمة ٤١
الجحش ...!!

1 وَلَمَّا قَرُبُوا مِنْ أُورُشَلِيمَ إِلَى بَيْتِ فَاجِي وَبَيْتِ عَنْيَا، عِنْدَ جَبَلِ الزَّيْتُونِ، أَرْسَلَ اثْنَيْنِ مِنْ تَلاَمِيذِهِ،
2 وَقَالَ لَهُمَا: «اذْهَبَا إِلَى الْقَرْيَةِ الَّتِي أَمَامَكُمَا، فَلِلْوَقْتِ وَأَنْتُمَا دَاخِلاَنِ إِلَيْهَا تَجِدَانِ جَحْشًا مَرْبُوطًا لَمْ يَجْلِسْ عَلَيْهِ أَحَدٌ مِنَ النَّاسِ. فَحُلاَّهُ وَأْتِيَا بِهِ.
3 وَإِنْ قَالَ لَكُمَا أَحَدٌ: لِمَاذَا تَفْعَلاَنِ هذَا؟ فَقُولاَ: الرَّبُّ مُحْتَاجٌ إِلَيْهِ. فَلِلْوَقْتِ يُرْسِلُهُ إِلَى هُنَا».
4 فَمَضَيَا وَوَجَدَا الْجَحْشَ مَرْبُوطًا عِنْدَ الْبَابِ خَارِجًا عَلَى الطَّرِيقِ، فَحَلاَّهُ.
5 فَقَالَ لَهُمَا قَوْمٌ مِنَ الْقِيَامِ هُنَاكَ: «مَاذَا تَفْعَلاَنِ، تَحُلاَّنِ الْجَحْشَ؟»
6 فَقَالاَ لَهُمْ كَمَا أَوْصَى يَسُوعُ. فَتَرَكُوهُمَا.
7 فَأَتَيَا بِالْجَحْشِ إِلَى يَسُوعَ، وَأَلْقَيَا عَلَيْهِ ثِيَابَهُمَا فَجَلَسَ عَلَيْهِ.
8 وَكَثِيرُونَ فَرَشُوا ثِيَابَهُمْ فِي الطَّرِيقِ. وَآخَرُونَ قَطَعُوا أَغْصَانًا مِنَ الشَّجَرِ وَفَرَشُوهَا فِي الطَّرِيقِ.
9 وَالَّذِينَ تَقَدَّمُوا، وَالَّذِينَ تَبِعُوا كَانُوا يَصْرُخُونَ قَائِلِينَ: «أُوصَنَّا! مُبَارَكٌ الآتِي بِاسْمِ الرَّبِّ!
10 مُبَارَكَةٌ مَمْلَكَةُ أَبِينَا دَاوُدَ الآتِيَةُ بِاسْمِ الرَّبِّ! أُوصَنَّا فِي الأَعَالِي!».
بداية الالام و تنفيذ خطة الخلاص ...خد بالك
قربوا من أورشليم ....قربوا دي معناها الطريق مش طويل ..مش حيسيبك تتالم علي طول ..طريق الم اه ما خدعناش و قال لنا عنه لكنه كمان قريب من أورشليم .. السما مش بعيدة جسر نعبر بيه للسما....
خد بالك كمان موكب نصرة يسوع مش موكب عادي ..موكب سماوي ...مش بقوة بطش بشر زي ملوك العالم و حصنة و مركبات حرب و هيصة ...موكب السما علي عربة حربية ترعب الشياطين و تذلهم و تكسرهم عند اقدامنا ..العربة دي اسمها التواضع ...!!!! يسوع اللي لما يتحرك يتحرك علي السحاب و مركبات نار و سيرافيم و كاروبيم ...بيركب جحش .. تواضع بشكل ما يفهمهوش الناس لكن يهز مملكة الشر
خد بالك كمان أصر يقول إن الموكب ابتدأ من قريتين ...فاجي و عنيا ...فاجي يعني فك و عنيا يعني الم ...فك الالم ...تفكرني دي بشاه داود اللي قفش فيها الاسد بانيابه و بقت في حكم الموت بين فكه ...جه داود اللي يشاور علي المسيح فتح الفك بايده الجبارة و ينتزع الشاه المجروحة من حكم الموت و علشان خاطر يديها حياة طبعا الاسد قاومه و جرح أيده بمخالبه بس دي أقصي حاجة يعملها و عملها مع المسيح علي الصليب ..لا سلطان للفك علي المسيح أقصي سلطان لابليس البائس المسيح و اولاده هو الالم و الصليب و التجريح .. و ده اللي يحصل لينا ...تأديبا نتادب لكن للموت ما يسلمناش
اخر حاجة خد بالك من ..الجحش
خد بالك من اللي قاله المسيح ..جحش مربوط لم يجلس عليه أحد من الناس ...
اولا دي شافها زكريا ...أنه يأتي راكبًا على أتان وجحش ابن أتان (زك 9: 9)
ثانيا الجحش يشاور علي الهمجية و الغباء و حيوانية الغريزة و الشهوة ... هي دي طبيعتنا قبل ما نعرف يسوع أو نبعد عنه ...اللي يبعد يلاقي نفسه متمرط في خطايا و نجاسات و عاطفة معوجة و ذات و أنانية .. و تبجح و انفلات ..عمرك شفت جحش بينقي مكان متداري علشان مثلا يأكل أو يمارس جنس ..وقت ما تتحرك غريزته يفعلها .. غبي ..طول ما احنا بعيد عنه نعيش في غباء ...غباء الكرامة و الذات ...انا ما اعتذرش لحد أبدا ..انا صح ..انا عملت ..انا ياما شيلته ..ياما فوتتلها ..غباء القنية و البحث عن الأمان في العالم و المال و شحاتة سلام من الناس و كل ده اتقال للغني ...يا غبي!!
خد بالك كمان الجحش مربوط ...الخطية مقيدة ...طول ما انا بعيد اسير انا لشهواتي و كبريائي و طلباتي و امتاع نفسي ...الشيطان في حربه معانا مش مركز في الخطية لاني حتوب و اعترف ...مركز ازاي تتحول لقيد ..عادة جنسية ..تسقط و اقوم و تسقط و اقوم و كلها تكتيك حرب أنه يقنعني أن ما فيش فايدة بقالك كام سنة و انت فيها وهوب نستسلم و هوب يحط قيد العادة و يربطني
خد بالك من حتة لم يجلس عليه انسان ...يسوع بتاع الباكورة بتاع اول حاجة مش كمالة حياة ..يسوع لما يدخل حياتي يحول جحشنتي دي لسماء ...اه ..ماهو جلس عليه و المسيح اصلا موطيء قدميه السما و يتحرك علي السحاب و حيجي علي السحاب ...فلما يقعد علي جحش يحوله لسحاب
اخر حاجة خد بالك الجحش الحيواني الغبي ده مالوش صاحب حقيقي ..مسروق ؟! يمكن ...مسخر ؟! اكيد من اللي ما يملكهوش....طول ما انا بعيد انا مسخر من الناس لتحقيق رغباتهم و استنزاف مشاعري و احاسيسي و حتي جسدي ...عرفناها منين دي .؟! اصل المسيح قال للتلميذين فيه حد حيسالكم لو حد سال بتفكوا الجحش ليه قولوا له الرب محتاج إليه فمرقس يقولك قوم يعني اكتر من واحد سالوهم بتحلوه ليه فردوا زي ما قال يسوع ..سابوهم عادي كده ...مش لأنهم مؤمنين بيسوع . ..لا ..لانهم كانوا فاكرين أن الجحش ده مالوش صاحب فلما قالوا لهم يسوع محتاج إليه تركوهم لأنهم افتكروا صاحبه الحقيقي جه دول لو أصحابه كانوا قطعوا التلاميذ و منعوهم ...كانوا رابطينه و هالكينه سخرة و انتفاع لانه مالوش صاحب ...بس وسط ده كله ما حدش جلس عليه ...اه انا خاطئ اه انامملؤ زنا و غش و بلاوي بس الشيطان ما يملكنيش... لسه جوايا حتة ..محدش جلس عليا ...الخطية ما استقرتش .يستهلكني ؟! اه ...بضعف مني بغباء بجهل لكن مش بقلة حب .. بدليل اول ما جه الجحش للمسيح جلس عليه بسلطان و الجحش لا رفس و لا امتنع و كأنه لقي في المسيح صاحبه الحقيقي ..يايسوع اركب و دلدل رجلك في حياتي براحتك ...الجحش طول عمره مرمي في الشغل و التعب بلا كرامة و ضرب و مهانة ...اول ما يسوع ساد عليه شاف اللي ما عمره ما حلم بيه .. ارض بتتفرشله بالقمصان و هو يدوس عليها و بشر بيهتف و أغصان و ملك قاعد عليه ...حاجة اخر فخفخة ..ده حتة الجحش ده بقي ليه مكان في الكنيسة و تسبحتها فيقولك الجالس فوق الشاروبيم اليوم ظهر في اورشليم راكبا علي جحش بمجد عظيم ...انا لما اقبل يسوع ابقي حتة من الكنيسة و حتة من الجسد المقدس ده بعبلي بعبطي بغبائي..
يارب خليني زي الجحش ده ...فك قيودي و اتضع و ادخل لبيتي و اجلس و املك و انا معاك حشوف السما
لالهنا كل المجد و الكرامة



نبيل شحاتة

[Mary Naeem]

يارب خليني زي الجحش ده ...فك قيودي و اتضع و ادخل لبيتي و اجلس و املك و انا معاك حشوف السما
لالهنا كل المجد و الكرامة

ربنا يبارك حياتك

[walaa farouk]

ميرسى على التامل الجميل