ماتتجوزش_ماتتجوزيش

[walaa farouk]

ماتتجوزش لمجرد إنك خلصت تعليم وجيش واشتغلت، وآن أوان الجواز بقى.. لأنك كده بتعتبر الجواز مجرد قطعة دومينوز بتكمل بيها اللعبة.. وهاتيجى فى يوم وتزهق.. وتمل.. وتحب تغير الدور..
ماتتجوزش لمجرد إن سنك كبر، ومعظم زمايلك وأصدقاءك اتجوزوا.. الحكاية مش كمالة عدد.. الجواز علاقة إنسانية مالهاش أى دعوة بالسن..
ماتتجوزش لمجرد إنك عاوز تطفى وهج غريزتك.. أو تلاقى مخرج لشهوتك.. انت كده بتشترى فقط وعاء بشرى أنثوى ترمى فيه بعض سوائل جسمك..
ماتتجوزش علشان أبوك وأمك قالولك اتجوز.. أو المجتمع قالك اتجوز.. انت كده بتتجوز لحساب أبوك وأمك.. ولحساب المجتمع.. مش لحساب نفسك.. والفرق هنا كبير أوى..
وبالمناسبة.. مافيش حاجة اسمها تتجوز علشان تكمل نص دينك.. كمالة دينك (كله) هاتيجى بعد الجواز كنتيجة لحسن الاختيار وحسن المعاملة وطيب العشرة.. لكنها أبداً مش مبرر للتسرع والاندفاع.. وياللا بينا نتجوز..
ماتتجوزش وانت عندك تحفظات أو ملاحظات (جذرية) على اللى هاتتجوزها، وتقول: أنا هاغيرها بعد الجواز.. وتبدأ بعد كده تتأمر عليها وتضغط على أعصابها وتكفر سيئاتها.. يا تقبلها زى ما هى بكل تفاصيلها.. يابلاش تفصل الناس على مقاسك..
ماتتجوزش واحدة صغيرة وتقول إنك هاتربيها على إيديك (من كتر لفك ودورانك طبعاً).. الجواز مش تبنى.. ولا تربية.. ولا وضع نهاية آمنة للصياعة واللف والدوران..
ماتتجوزش وانت ناوى تقعد مراتك من الشغل.. وتحبسها فى البيت.. وتقطع عنها الهوا والمية.. وتخبيها وتداريها عن الحياة.. ده مايفرقش أى شئ عن وأد البنات فى الجاهلية.. ظلم وجور ودفن مابعده دفن..
ماتتجوزش وانت شايف ان الست أقل منك.. وأنقص منك.. وأقل حكمة وحسن تصرف منك.. وانها المفروض تركعلك وتؤديلك فروض الولاء صبح وليل.. وانك لازم تكون بالنسبة لها نصف إله.. ده مش بيجيب غير التسلط والافترا وسوء المعاملة.. وكتير جداً من الستات أحكم وأحسن تصرفاً من رجالتهم..
ماتتجوزش لمجرد إنك عاوز تجيب عيال قبل ما تكبر.. انت كده بتؤجر (رحم).. مش بتعاشر بنى آدمة..
ماتتجوزش وفى مخيلتك صورة شهريار اللى قاعد على الكنبة يتفرج على التليفزيون.. ومراته مسحولة فى المطبخ والمواعين والغسيل والتنضيف طول النهار.. وآخر الليل تتحول إلى غانية محترفة توفر له كل وسائل المتعة.. بعدها يلف وشه الناحية التانية وينام..
انتى كمان..
ماتتجوزيش لمجرد إنك عاوزة تلبسى فستان الفرح.. بغض النظر عن الشخص اللى هايكون واقف جنبك.. انتى كده بتتجوزى هيكل بشرى.. ممكن تتفاجئى باللى جواه بعد كده..
ماتتجوزيش لمجرد إن معظم أصحابك اتجوزوا.. وشكلك قدامهم إيه.. ونظراتهم ليكى عاملة ازاى.. بعد عشر سنين.. نصهم غالباً هايكون اتطلق (حاليا النسبة حوالى 40%)..
ماتتجوزيش لمجرد إن سنك كبر.. وأهلك بدأوا يقلقوا.. وقطر الجواز اللى بيفوت.. و المجتمع اللى بيدبح.. محدش فى كل دول هاينفعك وانتى دمعتك على خدك كل ليلة نتيجة سوء الاختيار..
ماتتجوزيش وانتى متصورة إن جوزك هو المُخَلِّص والمُنقذ ومُحقق الأحلام.. أحلامك انتى اللى بتصنعيها.. وانتى اللى بتجرى وراها.. وانتى اللى بتحققيها.. هو فقط رفيق فى الرحلة..
ماتتجوزيش وانتى ناوية تتنازلى عن أى حاجة.. أو تضحى بأى حاجة.. أو تدفعى أي تمن.. ماتصدقيش اللى يقولك الحياة الزوجية تنازل وتضحية (بترسى على الزوجة فى الآخر).. الحياة الزوجية مشاركة ومسئولية.. والفرق بين التنازل والمشاركة كبير.. وبين التضحية والمسئولية أكبر..
ماتتجوزيش حد ناوى يفصلك على مقاسه.. هايطبقك ويطفيكى ويدفنك بالحياة.. اللى قابلك زى مانتى أهلاً وسهلاً.. اللى عاوز مواصفات تانية.. يدور عليها فى حد غيرك..
وفى نفس الوقت.. ماتتجوزيش واحد فيه حاجات مش عاجباكى وتقولى: هاغيره بعد الجواز.. احنا مش بنتجوز علشان نغير بعض.. مش بنتجوز علشان نعالج بعض.. مش بنتجوز علشان نربى بعض..
ماتتجوزيش واحد تدورى فيه على (أب).. ده أكبر ظلم بتظلميه لنفسك ولجوزك.. انتى كده هاتحمليه فوق طاقته.. وهاتطلبى منه حاجات مش بتاعته.. وهتلبسيه دور مش دوره.. ولما مايقدرش يلعب الدور ده.. هاتطلعى عينه وعين اللى خلفوه..
وطبعاً ماتتجوزيش حد بيدور على (أم) تتبناه.. مش (زوجة) تعيش معاه.. اللى عاوز خدامة يدور على خدامة.. اللى عاوز مربية يدور على مربية.. اللى عاوز شريكة حياة أهلاً وسهلاً..
وبالمناسبة.. أقل من (شريكة حياة) ماينفعش.. شريكة فى القرارات.. شريكة فى المسئوليات.. شريكة (مش قائمة بمفردك) بأعمال البيت.. شريكة (مش قائمة بمفردك) بتربية الأطفال.. شراكة تامة.. ندية مطلقة (دى أكتر كلمة بيعترض عليها بعض الذكور.. بيحسوا إن فيها تهديد لوجودهم كأنصاف آلهة لا تقبل الندية).. تكافؤ ومساواة لأقصى درجة..
لكل المتجوزين واللى عاوزين يتجوزوا..
الجواز علاقة انسانية بين اتنين قرروا يحيوا (مش بس يعيشوا) مع بعض.. يكبروا مع بعض.. يفرحوا مع بعض.. يتألموا مع بعض..
الجواز قرار محتاج وعى.. ومحتاج مسئولية.. مش شروة وبيعة.. ونكتشف بعض بعد ما يتقفل علينا الباب..
الجواز روضة من رياض الجنة.. أو حفرة من حفر جهنم..
اتجوزوا وقت ما تحسوا إن ده الوقت المناسب.. بغض النظر عن السن والعمر والرقم..
اتجوزوا وقت ما تلاقوا الشخص المناسب.. المناااااسب.. المنااااااااسب..
اتجوزوا وانتوا ناويين تحترموا بعض.. وتساعدوا بعض.. وتسمحوا لبعض بالحياة.. مش بالموت..
اتجوزوا وانتوا قابلين احتمالات الطلاق.. علشان تتحرروا من العبودية لبعض.. والذل لبعض.. وتحمل الإساءة والمهانة خوفاً من الانفصال والوحدة.. صدقوا إن ربنا موجود..
غير كده..
ماتتجوزوش..

[Mary Naeem]

الجواز قرار محتاج وعى.. ومحتاج مسئولية.. مش شروة وبيعة.. ونكتشف بعض بعد ما يتقفل علينا الباب..

[walaa farouk]

ميرسى كتير على مرورك الغالى مرمر