ويبقى الوضع !!!!!

[Rena Jesus]

اعمل حسابك ..
انا مش هاسيب شغلى حتى بعد الجواز ..

طبعاً يا حبيبتى ..
انتى عارفة انا ماقدرش ازعلك ..

وبعد كل المراسم والتقاليد ..
انا حامل ..
بس افتكر انى قلت لك انى مش هاسيب الشغل ..

ياستى ومين قال كدة بس ..
اول ما البيبى يشد حيله ..
انزلى الشغل براحتك ..

وبعد 6 شهور ..
بص بقى .. انا هاوديه عند ماما ..
انت عارف انى باصحى بدرى ..
وبارجع متأخر ..
مش هاقدر انزل بيه الصبح ..
وانا شايفة ..
انه يفضل عند ماما طول الاسبوع ..
ويبقى يروح البيت ..
فى اخر كل اسبوع .. واحنا اجازة ..

طب وانا هاشوفه امتى ..
مانتى عارفة انى مش هينفع ابيت هناك ..

انت ابقى خلص شغلك كل يوم وتعالى اقعد معانا ..
العب وشوفه .. وابقى انزل بالليل ..

معانا؟؟
هو انتى كمان هتفضلى هناك ..

مانت عارف مش هينفع افضل رايحة جاية ..
وانا عايزة اركز فى شغلى ..

طيب .. اللى تشوفيه ..

ويروح "سليم" اللى لسة ماكملش سنة عند جدته ..
ويبدأ يلاغى .. ويضحك ..
بس للأسف .. مايلاقيش اللى يرد التحية ..
أصل تيتا وراها حاجات كتير بتعملها ..
وفجأة انتبه سليم على صوت ..
ولقى حد عمال يتنطط ويضحك ..
وموسيقى والوان ..
قعد يتنطط فى الكرسى بتاعه ..
ويحرك ايديه ورجليه ..
بس اللى كان غريب ..
ان اللى قدامه .. مش كل وقت كان بيلاعبه ..
اصل اللى قدامه بيرسل بس .. مش بيستقبل ..
عشان للأسف اللى قدامه ..
"تليفزيون"

ولما ابتدا سليم يدرك ..
لقى حاجت بتحصل .. وبتتكرر ..
ينام بالليل فى حضن ماما ..
يصحى الصبح .. يلاقى تيتا ..
شوية وتيتا تختفى ..
وييجى الصديق الجديد ..
التليفزيون ..
شوية يلاعبه .. وشوية ولا كأن سليم قاعد اصلا ..
وعلى بعد الضهر ..
يلاقى شخص مواظب كل يوم انه يشوفه ..
ويلعب معاه ..
وشوية وتيجى ماما ..
وبعدها بشوية يختفى الشخص ..
وتظهر تيتا ..
وشوية وكلهم يتلموا مع صاحبه ..
وعلى اخر الليل ..
ينام فى حضن ماما ..

وكل كام يوم ..
البيت يتغير ..
وتيتا تختفى يومين ..
وشوية نرجع تانى للبيت الاولانى ..

حطيت نفسى مكانه ..
انا مش فاهم حاجة ..
هو ده بيتنا ولا التانى ..
ومين فى دول ماما ..
وهو التليفزيون ليه هو اللى بيلاعبنى بس ..
ومين الراجل اللى بييجى كل يوم ساعة ويمشى ..
ايوة يعنى اتعلق بيه ولا بلاش ..
عشان هو مش علطول قاعد معايا ..

وكان القرار ..
انا اختصر احسن ..
وخلينى فى حالى ..
هم عمالين يعملوا اصوات ببقهم ..
وانا مش عارف اتعلم اعمل زيهم ..
خلاص خلينى كدة احسن ..
السكوت اريح ..

وتعدى سنة ورا سنة ..
وسليم ساكت ..
وعمال يراقب السيناريو اللى بيتكرر كل يوم ..
باقولك ايه ..
سليم مش بيتكلم .. انا حاسس انه اتأخر ..
متهيألى محتاج اننا نوديه لحد ..

وبعد استشارات ..
انتو لازم تقعدوا معاه وقت اطول ..
ماينفعش انتو الاتنين فى شغلكم ..
وسايبينه لوحده ..
لازم يعيش فى بيته ..
ويشوفكم اطول وقت ممكن ..
ماينفعش يبقى التليفزيون هو اقرب اصدقاءه ..

بعد مارجعوا ..
بصى انا شايف ان موضوع شغلك ..

ماله موضوع شغلى ..
انا اتفقت معاك من الاول ..
انا مش هاسيب شغلى ..
وانت قلت لى انك موافق ..

بس ماكناش نعرف الظروف اللى هتجد علينا ..

هو نصيبه كدة ..
وانا باعمل كل اللى اقدر عليه ..
بس انى اسيب شغلى .. استحالة ..

رجع ابو سليم البيت لوحده زى كل يوم ..
ومليون سؤال داروا فى دماغه ..
هو فين الغلط ..
سليم خلاص بقى عنده 5 سنين ..
ومش بيتكلم ..
ومتأخر فى حاجات كتير ..

الغلط فين ؟؟ ..
مابقيتش عارف ارد عليه اقول له ايه ..
لأنه مش غلط واحد ..
دى تركيبة ..
وعده ليها انها تستمر فى شغلها ..
كان وعد مطلق .. وده غلط .. لأن الظروف بتتغير ..
انه يقبل انه يشوف اول فرحته ..
ساعتين تلاتة فى بيت جدته .. كان غلط ..
لأن سليم اعتبره ضيف وبيمشى ..
ان سليم يعيش فى بيت مش بيته .. كان غلط ..
لأنه كدة بقى يحس انه ضيف فى بيته ..
انه يلاقى التليفزيون هو الصاحب الوحيد ..
اللى بيديله كل اللى هو عايزه .. ده غلط ..
لأن التليفزيون مش هيحضنه ولا هيطبطب عليه ..
انه يبقى اكتر وقت بيقضيه مع جدته .. دا غلط ..
لأنه بيلخبط الادوار .. حتى لو مالخبطش الالقاب ..
حتى التفكير فى الدخل الزيادة والمستقبل المادى .. دا غلط ..
لأن الفرق فى الفلوس ..
هيضيع مراكز تخاطب وتأهيل ..

والغلط الكبير ..
اننا بعد ماعرفنا المشكلة ..
مش قادرين نقف ونقرر اننا نصلح ..
لأن التصليح .. محتاج تضحية ..
وقبل كل ده ..
الغلطة الاولى ..
قرار اننا نجيب طفل ..
قبل ما نكون مقررين اننا هنحافظ عليه ..
وهيبقى عندنا رد لربنا يوم ما يسألنا ..
ليا وديعة عندكم .. ممكن اعرف عملتوا فيها ايه ؟؟؟

كان نفسى اختم الحكاية ..
بنهاية تفرح ..
لكن للأسف ..
سليم اختار حياة يعيشها لوحده ..
لأنه مالقاش اللى يعيشها معاه ..
ويبقى الوضع كما هو عليه ..
وعلى المتضرر "سليم" .. اللجوء للسماء ..

لو الحكاية شبه حكايتك ..
ماتخليش نهايتها .. هى نهايتك ..
اكيد فيه فرص لناس كتير الوضع يتغير ..
والكلام ده حقيقى جدااا ...
أمير تادرس

[Mary Naeem]

ربنا يبارك حياتك

[Rena Jesus]

ميرسى لمرورك الغالى

[walaa farouk]

ميرسى على مشاركتك الجميلة

[Rena Jesus]

ميرسى لمرورك الغالى