هو احب حتى للمنتهى .......

[Rena Jesus]

نادر ونيكول اتنين بيحبو بعض كانو مخطوبين وقررو يتجوزو بس قبل الفرح اكتشفو ان نيكول عندها كانسر
الفرح ماتلغاش ولا اتجأل .. اتجوزو فعلا وحققو حلمهم بس نيكول ماتت ..
بس الاكيد انها لسه عايشه جواه فى كل لحظه وثانيه, لان الاكيد ان العلاقات اللى زى دى مابتنتهيش مهما حصل ومهما مرت ظروف صعبه ولا حتى الموت بينهى مشاعر جميله زى دى

انا مؤمنه ان العلاقات اللى زى دى بتكون علاقات خالده مابتموتش ولا تنتهي ..
بتعيش جوه روح كل واحد للمنتهى

.. نادر قرر انه هايتمسك بيها لاخر نفس فى حياته وحياتها.. قرر كل حاجه هاتكون فى ميعادها وبنفس الترتيب اللى كانو مرتبنله وانهم يفرحو رغم كل حاجه صعبه واليمه .. وكان هدفه الوحيد انه يشوفها مبسوطه وفرحانه من قلبها

مافكرش فى ناس او خاف من قرار ماترعبش من المسئوليه ولا قرر يمشي او يأجل
نادر ونيكول اتجوزو و قضو اول فتره فى جوازهم اللى هي المفروض كلها فسح وتنطيط .. قضوها فى المستشفى وسط العلاجات والادويه اللى كان كل هم نادر الفتره دى كلها انه يعمل share للدوا الناقص ويدور عليه ويجرى هنا وهنا ويدور ويسأل ويكون جمبها ويسندها ويقدملها دعم نفسي هو نفسه يمكن كان محتاجه واكتر
ويطبطب ويقدم ويمكن هو كان محتاج نفس اللى بيقدمه يحصل معاه

فى وسط كل الكلاكيع اللى فى العلاقات اللى عايشين وسطيها وفى وسط كم العلاقات اللى بتفشل من اسباب مختلفه لما بشوف علاقه زى دى ناجحه رغم نهايتها اللى مش فى ايد حد بفرح جدا وبحس ان لسه فيه ناس بتعرف تحب بجد
فى ناس بتعرف تمسك فى بعض وتحب بعض وتقبل بعض بالرغم من اى حاجه مش عشان حاجه
بعرف ان لسه فيه امل

.. بتعلم من علاقه زى دى ان مفيش حاجه اسمها مستحيل لو حد بيحب ويعنى ايه راجل بجد اد المسئوليه مش عيل جبان
ان الايد اللى بتحب بتمسك وماترخيش
ان الشخص الامين بيلتزم بالعلاقه مهما حصل
وان الحب اللى بجد انى الاقى ايد بتطبطب وقت المى وحد بيقبلنى بكل تشوهاتى اللى جوايا واللى حواليا
فهمت اكتر يعنى ايه حد بيحتوى بكل حب وبيقدم وهو من جواه فاضى ومحتاج ياخد دعم ومسانده
وان الحب مش مجرد كلام ووقت حلو على اد ماهو التزام ومسئوليه ووقت صعب بنعديه سوا
.. هو احب حتى للمنتهى

[walaa farouk]

ميرسى على مشاركتك الجميلة رينا

[Mary Naeem]

ربنا يبارك حياتك

[Rena Jesus]

ميرسى لمروركم الغالى

[MenA M.G]

موضوعك مميز .. طرح رائع
ربنا يبارك خدمتك

[Rena Jesus]

ميرسى لمرورك الغالى