انا يوم فرحي

[walaa farouk]

يوم فرحي محدش هيشوف الشبكه اللي خطيبي جايبهالي انتو مش جايين تقيمونا! اللي جاي يقارن بينا وبين بنت خالة امه او يحكم علينا ميجيش احسن.

مش هنعمل اوبن بوفيه انتو مش جايين مائدة رحمان وهو مش بيشتغل و يتعب ف قلبه عشان يبين ليكو انه مش بخيل،هو بخيل وانا راضيه بيه اللي جاي ياكل ميجيش.

لما نتجوز مش هفرج حد غريب ع حاجه ف الشقه انتو جايين تباركولنا مش داخلين معرض موبيليا!

بنت خاله ابن عمة ابن خال ابوكي جالها شبكه بـ كذا وانتي مش اقل منها انا مش هتجوز الشبكه كفايه عليا يكون ف ايدي دبلة من الشخص اللي قلبي اختاره
لما اكون مخنوقه الشبكه مش هتطبطب عليا وتاخدني ف حضنها، مش هعد اتكلم مع الغويشه الدهب!
مش هجيب 250 فوطه و 300 ملايه و 600 طقم خشاف دا غير الكاسات و طقم الشربات و الصيني والبايركس و الاركوبايركس والاركوبال و شنطه المعالق ال1000 قطعه و طقم سكاكين سيراميك و طقم سكاكين ستانلس دا غير شنطه سكاكين
احنا مش داخلين حرب والله دا غير طبعا مفرش السرير اللي كله ترتر و مالوش اي تلاتين لازمه
هجيب اللي هنستخدمو واللي هنحتاجه بس
هو هيتجوزني نا مش هيتجوز النيش؛))

مش هجيب 6 بيجامات قطيفه و 6 مشجر و 150 جلابيه دا بيتي مش بنك الكساء:'D
هجيب اللبس اللي بحبه و يريحني.

مش عاوزة اوضه نوم من اخشاب السافانا الموجودة ف الغابات الاستوائيه العتيقه المطليه ب ماء الذهب المستخلص من مش عارفه اي اللي هتتكلف كام الف
دا سرير و دا سرير ع فكرة وكدا هننام وكدا هننام هنختار سوا اللي يعجبنا المهم نكون سوا .
مش عاوزة سفرة دائريه من المنتصف بيضاويه الاحرف ب 16 كرسي مش هنعزم الامم المتحدة احنا.
مش عاوزة شقه مليون الف متر 5 اوض و7 رسيبشن و 5 حمام و 4 مطبخ و 16 بلكونه
اي مكان هيجمعنا سوا هنشوفه جنه والله💓.
دي حياتنا و احنا اخترناها مع بعض فككوا مننا شويه
ممكن بدل التفاهات دي نعمل مشروع،نجيب عربيه،نسافر مكان بنحبه او نفسنا نروحه، ناخد كورس هيفيدنا فـ شغلنا.
انتو بعد الفرح هتروحو و احنا اللي هنكمل مع بعض والله ، سيبونا نختار اللي هيريحنا عشان دي حياتنا احنا، و لما نتخانق لا الدهب و لا طقم الكاسات اللي هيرجعونا لبعض، حبنا هو اللي مهما بعدنا هيرجعنا

[Mary Naeem]

ربنا يبارك حياتك

[walaa farouk]

ميرسى على مرورك الغالى مارى

[MenA M.G]

موضوعك مميز .. طرح رائع
ربنا يبارك خدمتك