المخدرات الروحية

[walaa farouk]

أخطر انواع المرضى النفسيين، هو النوع ده "المريض المُتدين".. الروحاني.. الهربان من علاجُه في الدين.. اللي من كُتر ما بيحشي عقله بكلام روحاني، نسي (أو متخيل أنه نسي) مرضُه وموهوم انه كدة اتعالج.. (وده منتشر جداً في مُجتمعنا للاسف).

وفي نفس الوقت.. أصعب مريض نفسي ممكن يتعالج، هو برضو صاحبنا المُتدين ده.. لأنه ببساطة بقى عايش على "مُخدرات حلال"، شوية ترانيم على اجتماعات على شوية آيات من الانجيل بتخلقلُه جو من "النشوة الروحية" تلهيه تماماً عن وجعه النفسي وجروحه الداخلية.. وبيفضل هربان من جروحه دي في الجو الروحي، وده بس تأخير للعلاج مش أكتر.

وايه هو العلاج؟
غالباً العلاج عُمره ما بيبتدي من المريض، لأن الشفاء ده على قد ما هو مُهم.. على قد ما هو مُتعب وصعب. فا غالباً البداية بتبقى نعمة من الله.. لطشة كدة من ايد الله تفوق المريض من حالة النشوة والروحنة الزيادة اللي هربان بيها من مواجهة مرضُه النفسي، بتبقى خبطة إلهية تهز كل أرض صلبة هو مسنود عليها.. وكل البهدلة دي بس عشان يفوق من "المُخدرات الروحية" اللي بقى مُدمنها سنين.. كل ده عشان بس يطلع من حالة "الإنكار النفسي" اللي بقى عايش ومستريح فيها وللأسف هي نفسها اللي مأخرة العلاج..

وامتى يبتدي العلاج؟
يبتدي العلاج في اللحظة اللي بتعترف أنه في مشكلة في حياتك بجد، وانها مشكلة نفسية مش روحية.. وان علاجها نفسي مش روحي.. وان الوقت اللي قضيته في الانكار والتدين محلش حاجة، بالعكس ده زود المشكلة أكتر..

يبتدي العلاج اول ما تبطل حلولك السهلة القديمة، وتعترف انك محتاج تخرج بره دايرة راحتك "الروحية" وتتنفس هوا جديد فيه الحاجات حقيقية (حتى اللي بتوجع)، يبتدي العلاج اول ما تفهم ان مش كل الحياة زي الفل.. ومش كل المشاكل تخلص باجتماع روحي.. ومش كل الامراض لها مخزى روحي.. ومش كل الناس اللي بتصقف وتهلل في الاجتماعات فعلاً مبسوطة، بالعكس ده مُعظمهم جاي بس عشان ينسى وجعُه شوية هنا، وعارف انه بمجرد ما يُخرج من الكنيسة هايرجع لاحزانه واوجاعه تاني.. فعلاً "مُخدرات".

يبتدي العلاج أول ما تبدأ تسأل الفاهمين مش المُتدينين.. والعلاج سكة مش "لمسة سحرية" زي ما وهمونا في الاجتماعات.. انك يدوب تصلي الصلاة دي تبقى ايه!!؟ زي الفل وعالزيرو.. ارفع ايدك بس أو كرر الصلاة دي ورايا بقيت شخص تاني وامراضك كلها راحت!!

العلاج الحقيقي سكة، مش لحظة.. ومُتعب آه مش سهل.. ومكمّل معاك بقيت حياتك مش بيخلص..

نصيحة.. للي بيعاني من مشاكل في نفسيته وشخصيته وعلاقاته.. للي بيصارع مع جروحه وذكريات تربيته الصعبة، روح اقعد مع دكتور نفسي، روح لحد مشورة.. ماتكلمش ناس متدينين.. ماتزودش اللخبطة أكتر..

في مدارس نفسية زي bless، و واحة، وغيرهم.. وفي دكاترة ومشيرين فاهمين، وفي كُتب هاتفيدك بجد، وفي مجموعات مشاركة هاتفرق معاك.. وهايحطوك على سكة الشفاء..
فا لو بتعاني بجد، نصيحة روح اتعالج.. بطل إنكار وبطّل مُخدرات روحية!

[Rena Jesus]

ميرسى ربنا يفرح قلبك

[Mary Naeem]

مشاركة جميلة جدا

ربنا يبارك حياتك

[walaa farouk]

رينا
مارى
ميرسي كتير على مروركم الغالى