استغماية

[walaa farouk]

بنتي بتحب تلعب معايا لعبة " استغمايه "
هي تستخبى وانا اقعد اقولها خلاويص ، تقولي لسه
لحد ماتستخبي وتقولي وهي مستخبيه " خلاث "
متعرفش اني بعرف مكانها من صوتها
المشكلة مش في كده
في مرة قررت اسيبها مستخبيه وقعدت قدامها
وهي مش شايفاني
بس ميأستش مني
فضلت ربع ساعه كامله واقفه ورا الستارة ، مبيتحركش فيها غير بطنها من نفسها الداخل والخارج ، وفاكرة اني بدور عليها
لدرجة اني لما زهقت رفعت من عليها الستارة ، راحت ضحكت وجريت في حضني

الثقه عندها ان ابوها بيدور عليها كانت فوق الوصف
الثقه عندها ان مش معقول ابوها يسيبها ويفسخ الاتفاق اللي بينه وبينها
من غير ماتمل او تعري وشها وتبص عليا او تقولي انت فين يابابا
فضلت ساكته تماما ، لأنها عارفه ان مجرد مابابا بدأ معاها اللعبة , فهو اكيد بيدور عليها

• مين فينا عنده الثقه المطلقه ان ربنا دايما بيدور عليه
• مين فينا عنده الإيمان الكامل بان ربنا عمره مايفسخ الاتفاق اللي بينك وبينه اللي بيقول " ادعوني وقت الضيق انقذك فتمجدني "
زي بالظبط دور عليا لما استخبى ولما تلاقيني هجري في حضنك
• مين فينا بيكتفى بطلب امانيه مرة واحدة ويسكت بعدها
وعارف ومقتنع انه مش شرط لو طلبه اكتر من مرة فربنا هيزهق ويحققهوله وخلاص ، او لو طلبه مرة واحدة جايز يكون ربنا مشغول وميسمعهوش
• مين فينا عنده الرجاء الكامل ان في شخص شغال عليه ومش بيسيبه
• مين فينا مملش لما لقى ربنا اتأخر عليه وقال انت ناسيني ليه ، انت سايبني ليه , انت ازاي مش شايفني

بنتي بتعمل معايا حركات صغيره ، بتعلمني بيها دروس كبيرة بدون ماتقصد
علمتني ان فيه اب شايفني ، سامعني ، بيدور عليا ، مهما استخبيت منه ومهما زعلت معاه هيلاقيني وياخدني في حضنه

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى ربنا يفرح قلبك
ويبارك تعب محبتك

[walaa farouk]

مارى
رينا
ميرسي كتير على مروركم الغالى